သဓီု၊ ဂျောန် ၁၇
ဒပ်ကံၚ်ဇြဳပၞာန် ကေတ်ဒၟံၚ်ဂီုကၠီု ဂၠံၚ်ကွဳပၟတ်လ္ဂုၚ်−မတ်မလီု ပ္ဍဲကဵုကွာန်(ကရင်လေးဆိပ်) ပွိုၚ်ဍုၚ်သဓီု တွဵုရးဍုၚ်မန်ဂှ် ဒးဒုၚ်ဗတိုဟ်မာၚ် ဗ္တိုက်လဝ်တုဲ ပရေၚ်ဇီုကပိုက်ချိုတ်အာ နွံဂှ် ဂွံတီကေတ် ဇရေၚ်ဂကောံစဵုဒၞါညးဍုၚ်ကွာန်ခရိုၚ်သဓီုရ။
ပ္ဍဲဂိတုဂျောန် စၟတ်တ္ၚဲ ၁၆ ပယျာံဂယး ၜိုတ် ၆ နာဍဳဝိုက်ဂှ် ဂကောံစဵုဒၞါညးဍုၚ်ကွာန်ခရိုၚ်သဓီု ဗတိုဟ်လဝ်မာၚ် ကုဒပ်ကံၚ်ဇြဳပၞာန် ဇြဟတ် (၆) တၠ မကေတ်လဝ်ဂီုကၠီုဂၠံၚ်ဂှ်ရ။
အပ္ဍဲပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန်မွဲတၠ ပြာတ်တိတ်အာတုဲ ကောန်ဒပ်ကံၚ်ဇြဳပၞာန်လ္ၚဵုလေဝ် ဇီုကပိုက်ကလိဂွံလဝ်ဝပ် နွံဂှ် ညးတာလျိုၚ်ပကဖ ခရိုၚ်သဓီု မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပရေၚ်ဗ္တိုက်ဏံဝွံ ဟိုတ်နူဂွံပရိုၚ် လ္ပာ်ကံၚ်ဇြဳပၞာန်တအ် သ္ဂောံကၠုၚ်ကေတ်ဂီုကၠီုဂၠံၚ်ကွဳပၟတ် နွံဒၟံၚ်ဂးတုဲ မၚ်တုဲဗ္တိုက်လဝ်ရောၚ် သ္ဂးရ။
ကောန်ဒပ်ဇီုကပိုက်ကလိဂွံဝပ် အပ္ဍဲပရေၚ်ဗတိုဟ်မာၚ်ဂှ် လ္ပာ်ကံၚ်ဇြဳပၞာန် ကၠုၚ်ကပှ်ကေတ်ဏာလဝ်တုဲ ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန်ခရိုၚ်သဓီုရောၚ် ဂၠိုက်ဂၠါဲဂွံတီကေတ်ရ။
ဂၠံၚ်ကွဳပၟတ် ပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီု တွဵုရးဍုၚ်မန်ဂှ် ဒးဒုၚ်ဗတိုဟ်မံၚ်မာၚ် မွဲဏှမွဲဏှတုဲ ပပ္တံနူဂိတုဂျောန်ဏံတုဲဂှ် ဒပ်ကံၚ်ဇြဳပၞာန် ကေတ်ဒၟံၚ်ဂီုကၠီုဂၠံၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Thaton PDF