ကျာ်ထဝ်၊ ဂျောန် ၁၇
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ်ဂှ် ဟိုတ်နူဒပ်ကံၚ်ဇြဳပၞာန် ပန်ကဵုလွဟ်ဇၞော်တုဲ ညးဗြဴဒေသၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် နူကဵုခရိုၚ်သဓီု ဗော်သွးကောန်ဂကူကရေၚ် KNU ရ။
တုဲကၠုၚ် ဂိတုဂျောန် စၟတ်တ္ၚဲ ၁၄ ပယျာံဂယး ၁၀ နာဍဳဂှ် နူဌာန်ဂအုပ်ပၞာန်ကံၚ်ဇြဳပၞာန် ၝောံဒပ် ၄၄ ဖျေံသ္ဇိုၚ်ကျာ်ထဝ်ဂှ် ပေါဲဗ္တိုက်ဟွံမွဲမွဲသာ် ပန်ကၠုၚ်ကဵုလွဟ်ဇၞော်ဒ္စါံမ ပ္ဍဲကဵုကွာန်(ဇီးကုန်း) ပွိုၚ်ဍုၚ်ကျာ်ထဝ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ဒဝ်အေသာန် အာယုက် ၅၃ သၞာံ ဒၟံၚ်ကွာန်(ဇီးကုန်း) ဝွံ ဒးအာကဝေက်လွဟ်ဇၞော် ပ္ဍဲထာၚ်ဒဳ ကလိဂွံလဝ်ဝပ်တုဲ သ္ၚိဒၟံၚ်ၜါမ ဒးလီုလာ်အာလဝ်ရ။
ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ်လေဝ် ပေါဲဗ္တိုက်ဟွံမွဲမွဲသာ် နူကဵုတမ်ဒပ်ကံၚ်ဇြဳပၞာန် ခမရ စၟတ် (၃) ဖျေံသ္ဇိုၚ်ၜဳကလေၚ်ဂှ် ထပ်ပန်လဝ်လွဟ်ဇၞော်ၜါမ ပ္ဍဲကဵုကွာန်အလူကျဳ ပွိုၚ်ဍုၚ်ၜဳကလေၚ်ရ။
ဟိုတ်နူလွဟ်ဇၞော်တုဲ ကောန်ကွာန်အလူကျဳ မဝါဝါဥူ အာယုက်မၞုံ ၃၀ သၞာံဂှ်လေဝ် ဒးအာကဝေက်လွဟ်ဇၞော် ပ္ဍဲထာၚ်ဒဳတုဲ ကလိဂွံလဝ်ဝပ်ရ။
ညးအုပ်ကာ ခရိုၚ်သဓီု KNU ပဒိုဝ်သဝ်အေနာၚ်ဂှ်တှ်ေ ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ပန်ကၠုၚ်ဒၟံၚ်လွဟ်ဇၞော်ဂှ်ဝွံ နကဵုတၚ်ရန်တၟံနွံနွံ ဗ္တိုက်ဒၟံၚ်ညးဍုၚ်ကွာန်ကောန်အရာပ်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကွာန်ဒးဒုၚ်ပန်လဝ်လွဟ်ဇၞော် ၜါကွာန်ဏံဂှ်ဝွံ ဒှ်ကွာန်နူကဵုတိဍာ် KNU ပ္ဍဲခရိုၚ်သဓီုဂှ် ဂွံတီကေတ်ရ။
တုဲကၠုၚ်ဂိတုဂျောန် စၟတ်တ္ၚဲ ၁၁ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ကၠုၚ်လွဟ်ဇၞော် ပ္ဍဲကွာန်အလူကျဳ ပွိုၚ်ဍုၚ်ၜဳကလေၚ်ဂှ်တုဲ ညးဍုၚ်ကွာန်မွဲတၠ ချိုတ်တုဲ ပန်တၠ ဇီုကပိုက်ကလိဂွံလဝ်ဝပ်ရောၚ် ခရိုၚ်သဓီု KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU