ဝါယှေန်တာန်၊ ဂျောန် ၁၇
ဒဒှ်ရသမ္မတအမေရိကာန် ဒဝ်နေဝ်ထြာမ် ဟွံဒုၚ်တဲအစဳဇန်အေဿရေ သ္ဂောံဂစိုတ် က္ဍိုပ်သ္ကိုပ်အဳရာန် အာယာတဝ်လာ အလဳ ခါမေနဳဂှ် သၞာဲဒဴအမေရိကာန်ပိတၠ ဟီုလဝ် ပ္ဍဲဌာန်ပရိုၚ် CBS News ရ။
အစဳဇန် သ္ဂောံကၠတ်ဂစိုတ်က္ဍိုပ်သ္ကိုပ် ခါမေနဳ ဂှ်ဝွံ အစဳဇန်ဟွံသေၚ်ပုဟ်ဂှ် သမ္မတထြာမ် ဒဒှ်ရဟီုလဝ် ကုသ္ကိုပ်ဝန်ဇၞော်အေဿရေ နေတာန်ညာဟုဂှ် သၞာဲဒဴမွဲတၠ လဴထ္ၜးလဝ်ရ။
ထြာမ်ဂှ်တှ်ေ စပ်ကဵုပရိုၚ်ဏံတုဲ ဟီုလဝ်ဂတညးဂမၠိုၚ်ဂှ် ဟွံမွဲဏီရ။
အေဿရေ စဗ္တိုက်အဳရာန်တုဲ ခြာဟွံလအ်ဂှ် ထြာမ် ကေုာံ နေတာန်ညာဟု တက်လဝ်ကျာညးသ္ကအ် သာ်ဏံရောၚ် ဂွံတီကေတ်ရ။
စပ်ကဵုအစဳဇန် ကၠတ်ဂစိုတ် ခါမေနဳဂှ်တုဲ ထြာမ် ရပ်စပ်အဝဵုဝဳတိုဝ်တုဲ တးပါဲလဝ်တုဲ ပ္ဍဲကဵုဌာန်ပရိုၚ်ရာ်တာ မထ္မံက်ထ္ၜးလဝ် ဒဒှ်ရတးပါဲလဝ်သာ်ဏံဂှ် အခိၚ်သ္ကိုပ်ဝန်ဇၞော် နေတာန်ညာဟု သ္ပအေန်တာဗျူ ကုဌာန်ပရိုၚ် Fox News ဂှ် ညးတးပါဲလဝ်လေဝ်ဟွံမွဲ သ္ပဒတန်လဝ်လေဝ်ဟွံမွဲရ။
ဂလာန်ညးဟွံဂွံဟီုပ္တိတ်လဝ်မွဲလှ်ေဂှ်လေဝ် ဒဒှ်ရညးဟီုလဝ်ဂှ် ပရိုၚ်ဗၠေတ်တ်သာ်ဏံ မံက်တိတ်ဒၟံၚ်တၟာဂလိုၚ်ရောၚ် နေတာန်ညာဟု ဟီုဏာလဝ် ပ္ဍဲအေန်တာန်ဗျူဝွံရ။
အေဿရေ ဂှ်တှ်ေ စွံပွန်ကဵုစမြိုၚ်နျူကလဳယျာ ကေုာံ သၞာဲဒဴဒပ်ပၞာန် အဳရာန်တံဂှ်တုဲ ဗ္တိုက်လဝ်ရ။
အဳရာန် ကလေၚ်ပလန်တဲ ဗ္တိုက်လဝ် နကဵုဒရုၚ်တုဲ ဆက်တုဲဗ္တိုက်ဒၟံၚ် သီုကဵုပၞာန်ကျာရ။
ကၠာတေံ အဳရာန် ကေၚ်ဟီုကြီုလဝ် ယဝ်ရအေဿရေ ဗ္တိုက်ကၠုၚ်ညးတံမ္ဂး ကလေၚ်ဗ္တိုက်အာ ဗ္ဒိုပ်ပၞာန်အမေရိကာန် မၞုံအပ္ဍဲဒေသတံဂှ်ဏောၚ်ကီုလေဝ် ဝန်ဇၞော်ကာဍုၚ်သ္အာၚ်အဳရာန်ဂှ်တှ်ေ ပဋိပက္ခကုအေဿရေ ညံၚ်ဂွံဇၞော်ကၠုၚ် ဟွံမိက်ကဵုဒှ်ကီုလေဝ် စဵုဒၞါအာဇကုဇကုညးတအ်ဏောၚ်ဂှ် ဟီုလဝ်ရ။
အဳရာန်ဝွံ ဒှ်ကၠုၚ်အန္တရာယ် သွက်ဍုၚ်ညးတံ ဂွံဂျိုၚ်လမျီုဒတူလိုၚ်ဂှ်ယျဂှ် အေဿရေ ဟီုလဝ်တုဲ ပ္ဍဲဂိတုဂျောန် ၁၃ ဂှ် စဗ္တိုက်ကၠုၚ်လဝ်ရ။
စဵုကဵုဂိတုဂျောန် စၟတ်တ္ၚဲ ၁၅ ဂှ် ၜါဍုၚ်ဏံ ဗတိုက်ဒၟံၚ်ညးသကအ်ကီုလေဝ် သမ္မတထြာမ်ဂှ်တှ်ေ ခြာဟွံလအ် ကလိဂွံအာပရေၚ်ၜိုဟ်လလမ်ဏောၚ်ဂှ် ဟီုလဝ်ရ။
သ္ပဟိုတ်နူကဵု ကောန်ဍုၚ်အေဿရေ ကောန်အရာပ်ဂမၠိုၚ် မဒးပကာဂစိုတ်ဂှ်တုဲ နကဵုအဳရာန် ဒးဒုၚ်ပလန်ကဵုညးတံ ဇၞော်ကဵုဇြဟတ်ဏောၚ်ဂှ် နေတာန်ညာဟု ဘပဠလဝ်တုဲ ပရေၚ်ဗ္တိုက်အကြာၜါဍုၚ်ဏံ ဗီုပြၚ်ဂွံဒေါအ်ဒေၚ်အာ ခြာဟွံလအ်ဂှ် ဟွံဂွံဆဵုကေတ်ဏီရ။
Ref: BBC