မတ်မလီု၊ ဂျောန် ၁၇
ၚုဟ်ထဝ်မဳလေန် အပ္ဍဲဍုၚ်ဂှ်ဝွံ အပ္ဍဲဂိတုဂျောန်ဏံဂှ် သၠုၚ်တိုန်ကၠုၚ်ဒၟံၚ် သိုက်က်ကီုလေဝ် လ္ပာ်ကံၚ်ဇြဳပၞာန် ထိၚ်ဟွံမာန်ဏီပုဟ်ဂှ် တၠကမၠောန်ထဝ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်မဳဠေန်အပ္ဍဲဍုၚ် မွဲဒကေဝ် ၚုဟ်မၞုံ ၇၀ ကိုဋ်ဂှ်ဝွံ စိုပ်ဂိတုဂျောန် စၟတ်တ္ၚဲ ၁၆ ဂှ် ထဝ်မွဲဒကေဝ်ဂှ် ဒှ်အာစဵုကဵုဗ္ဒါဲ ၈၁ ကိုဋ်ဒ္ကေဝ်ရ။
ဟိုတ်နူၚုဟ်ထဝ် သၠုၚ်တိုန်ကၠုၚ်ဒၟံၚ်ဂှ်တုဲ ကံၚ်ဇြဳပၞာန် ဗက်ရပ်ဒၟံၚ် တၠကမၠောန်ထဝ်တအ်ကီုလေဝ် ၚုဟ်ထဝ်အပ္ဍဲဍုၚ်ဂှ်တှ်ေ ဟွံကလေၚ်စှ်ေလဝ်ရ။
တၠကမၠောန်ထဝ်မွဲတၠဂှ်တှ်ေ ၚုဟ်ထဝ်မ္ဒးသၠုၚ်တိုန်ကၠုၚ်ဂှ်ဝွံ ကၠာပေါဲရုဲမာဲကံၚ်ဇြဳပၞာန်ဏံဂှ် ဟိုတ်နူသၟာပရေၚ်ပိုန်ဒြပ်ဂမၠိုၚ် တံၚ်ပတိုန်ဒၟံၚ်ၚုဟ်ထဝ်ဟွံသ္ကုတ်ဏောၚ်ဂှ် ဟီုလဝ်ရ။
“ၚုဟ်ထဝ်တိုန်ဟီုဂှ် သၞာံဏံ ပ္ဍဲဂိတုဒဳဇြေမ်ဗာ ဟွံသေၚ်မ္ဂး ဂိတုဂျာန္နဝါရဳတေံ ကၠောန်အာပေါဲရုဲမာဲဂှ် သၟာပရေၚ်ပိုန်ဒြပ်ဂမၠိုၚ် တီလဝ်ရ။ ဟိုတ်ဂှ်ရ ကၠာဟွံဂွံကော်ကောံဓရီုဂီုကၠီုစဵုဒၞါ (ကာလုံ) ဂှ် ဍေံတံ ဝေၚ်အာၚုဟ်ၜါဒၞါဲ ပ္ဍဲထဝ်ကဵု ပ္ဍဲတိ။ ၚုဟ်ထဝ်ဏံဂှ်လေဝ် သာ်ဂှ်ကီုရ တံၚ်ပတိုန်မံၚ်ဟွံသ္ကုတ်၊ ၚုဟ်ဒဝ်ဠာဂှ် ဟွံတိုန်မွဲသာ် ၚုဟ်ထဝ်မွဲဂကူရ ဆက်တိုန်မံၚ်” သာ်ဝွံ သ္ဂးရ။
ဟိုတ်နူၚုဟ်ထဝ် သၠုၚ်တိုန်ကၠုၚ်မံၚ်တုဲ ကံၚ်ဇြဳပၞာန် ဗက်ရပ်ဒက်ဒၟံၚ်ဂှ်ရ ဆေၚ်သွံတြးဒၟံၚ်ထဝ်လ္ၚဵုတအ် ဒေါအ်ဇူလဝ်ပရေၚ်သွံရာန် ဗွဲယာယဳကီုလေဝ် သွံရာန်ဒၟံၚ် နကဵုဗွဝ်ဖျာဒလုက်ဂှ် နွံရောၚ် ဂွံတီကေတ်ရ။
ၚုဟ်ထဝ်ဂွံသၠုၚ်တိုန်ကၠုၚ်ဂှ်ဝွံ က္ဍၚ်ကၠုၚ်ဗီုဓမ္မတာဟွံသေၚ် ဟိုတ်နူရဲဝေၚ်ၚုဟ်ဂမၠိုၚ် တံၚ်ပတိုန်ဒၟံၚ်ၚုဟ်တုဲ မ္ဒးက္ဍၚ်ဒၟံၚ်ဂှ်ရ နကဵုညးဍုၚ်ကွာန်ဂမၠိုၚ် ဟွံမွဲပၟိက်မွဲသာ် ယဝ်ရာန်မ္ဂး ပရေၚ်ဆောံလေၚ်ဂၠိုၚ်မာန်ဏောၚ်ဂှ် တၠကမၠောန်ဆေၚ်ထဝ်ဂမၠိုၚ် ကဵုလဝ်သတိရ။
ၚုဟ်ထဝ်သၠုၚ်တိုန်ဒၟံၚ်ကီုလေဝ် ၚုဟ်ထဝ်ကံၚ်ဇြဳပၞာန်တအ် မခုတ်ကၠုၚ်လဝ် ပ္ဍဲဂိတုဂျောန် စၟတ်တ္ၚဲ ၁၆ ဂှ်တှ်ေ မွဲဒကေဝ်ဂှ် ခုတ်လဝ် ၅၉ ကိုဋ်ဒ္ကေဝ်ဓဝ်ဂှ်ရ ယဝ်ဒးၜတ်ကၞာတ်ကဵုဗွဝ်ဖျာမ္ၚးဏံမ္ဂး မွဲဒကေဝ်ဂှ် ၚုဟ်ခြာဒၟံၚ် ၂၀ ကိုဋ်ဒ္ကေဝ်ပြၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ