ဗြဝတဳ၊ အံက်တဝ်ပါ ၁၈
ပ္ဍဲတွဵုရးကရေၚ် ပွိုၚ်ဍုၚ်ဗြဝတဳ သ္ကုတ်ဂၠံၚ် ဗြဝတဳ-ဝဝ်လေဝ်ကေုာံ ပ္ဍဲအကြာကွာန်အေန်ဂျေၚ်မျာၚ်ကဵု မေန်လက်ပါန်ဂှ် ကရောၚ်ပၞာန် ဒပ်ကဝ်မယှေန်ပၞာန်ကဵု ဒပ်ပံၚ်တောဲ KNLA တံ ပေါဲဗတိုက် သ္ကာတ်မြဟ် ဒှ်မံၚ်ရောၚ် ဂွံတီကေတ် နူကဵုတမ်ရိုဟ်ကၞက်ပရိုင် ညးဒေသတံရ။
သွက်ဂွံကလေၚ်ထိၚ်ချုက် သ္ကုတ်ဂၠံၚ် ဗြဝတဳ-ဝဝ်လေဝ်မာန် ကရောၚ်ပၞာန် ဒပ်ကဝ်မယှေန်ပၞာန်ဝွံ နကဵုအရီုဗၚ် ဒပ်မၚ်ပယျဵုကရေၚ် BGF ထပက်ကၠုၚ်ကရောၚ်ပၞာန်တုဲ ပ္ဍဲကဵုအံက်တဝ် ၁၅ အခိၚ်နူဂယး စိုပ်ကၠုၚ် ပ္ဍဲကွာန်အေန်ဂျေင်မျာင် နကဵုဇြဟတ်ဗွဲမဂၠိုၚ် ကေတ်ဒၞာဲဖျေံလဝ်ဒပ်ရ။
ကရောၚ်ပၞာန်ဒပ်ကဝ်မယှေန်ပၞာန် နူကဵု ကွာန်အေန်ဂျေင်မျာင်ဂှ် ပတဝ်ဏာ ကွာန်မေန်လက်ပါန်တုဲ ကရောၚ်ပၞာန်ဆက်ထပက်အာဂှ် ဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတး KNLA ပ္ဍဲအကြာကွာန်အေန်ဂျေၚ်မျာၚ်ကဵု မေန်လက်ပါန် သာ်ဝွံ ညးဒေသမွဲတၠ ဟီုရ။
နူကဵုဒပ်ကဝ်မယှေန်ပၞာန် သွက်ဂွံကလေၚ်ထိၚ်ချုက် သ္ကုတ်ဂၠံၚ် ဗြဝတဳ-ဝဝ်လေဝ်မာန် အခိၚ်ထပက်မံၚ်ပၞာန်ဏံ စနူအံက်တဝ်ပါ ၁၅ ကၟာတ်ထောံလဝ် သ္ကုတ်ဂၠံၚ်ဏံတုဲ ညးအာကၠုၚ်မံၚ် ကရပ်ဗ္ဒာဲဗ္ဒာဲတံဏံ ဒပ်ကဝ်မယှန်ပၞာန်ဗမာ သၟာန်သၟုက်စၟဳစၟတ်မံၚ် လေဝ်နွံမံၚ်ရောၚ်ဂှ် ဂွံတီကေတ် နူညးဒေသတံရ။
ပေါဲဗတိုက် အကြာၜါလပါ်ဒှ်လဝ် အံက်တဝ်ပါ ၁၆ ဂှ်မ္ဂး မကမ်လ္ၚဵု ၜက်စိုပ်ဖတိုဟ်လဝ် ပ္ဍဲတိဍာ်သေံ ဒၞာဲစမြိုၚ်ဒၟံၚ်တံ ဒးအာဘဲမကမ် လီုလာ်လဝ်ညိညနွံမံၚ်ရောၚ်ဂှ် နူကဵုသေံတံ လလောၚ်ပတိတ်လဝ် ပရိုၚ်ရ။
ဒပ်ကဝ်မယှေန်ပၞာန်ဝွံ ပ္ဍဲကဵု ဍုၚ်တၟိလေဝ်ကေကဝ် နွံမံၚ်သၠုၚ်ကျာ ဗြဝတဳဂှ်လေဝ် ထပက်မံၚ်ကရောၚ်ကီု ပ္ဍဲကဵု သ္ကုတ်ဂၠံၚ်ကွဳစက် ဗြဝတဳ-ဝဝ်လေဝ် ကရောၚ်ပၞာန်ထပက်မံၚ်ဂှ်ရ ညးဒေသ လေဝ်ကေကဝ်ကီု သီုကဵုကောန်ကွာန်ဟွံအောန်နူ ၈ ကွာန် ညးဒေသ ဗွဲမဂၠိုၚ်တံ ဒးဂြိပ်ပါဲဒဴမံၚ်ဘဲပၞာန် ဒၞာဲဗၠးဘဲတံရ။
ဌာန်ပရိုၚ်-သြၚ်လောန်တိုင်မ်
Photo – KNU