မတ်မလီု၊ အံက်တဝ်ပါ ၁၈
အနှေန်ထဝ်ဂၠးကဝ်ကီု အနှေန်ထဝ်အပ္ဍဲဍုၚ်ကီု သၠုၚ်တိုန်အာ ၜက်နူသၞောတ်တုဲ နူကဵုကဝ်မယှေန်ပၞာန် ကဵုလဝ်စၞောန် နကဵုဗံက်ချာ ကဝ်မယှေန်ပၞာန်ပတိတ်လဝ်ဟေၚ် ညံၚ်ဂွံကၠောန်အာ ကဵုလဝ်စၞောန်နွံရဂှ် တၠဆေၚ်ထဝ်တံ ဟီုကဵု ဌာန်ပရိုၚ်သြၚ်လောန်တိုင်မ်ရ။
ဆေၚ်ထဝ်တံဂှ် အခိၚ်ကၠာတေံ နကဵုတဆိပ်ဇကု ဗံက်ချာဇကု ကၠောန်ကၠုၚ်မံၚ်ပရေၚ်သွံရာန်တံဂှ် အခိၚ်လၟုဟ်မ္ဂး နကဵု ဗံက်ချာ ကဝ်မယှေန်ပၞာန်ပတိတ်ကဵုလဝ် နူကဵုဌာနဝန်ဇၞော်သယံဇာတကဵု ထိၚ်ဒဝ်ပွဳပွူသဘာဝ စၟတ်(၂) ဂှ်ဟေၚ် ဒးကၠောန်အာ ပရေၚ်သွံရာန် ထဝ် တံရောၚ် သ္ဂးရ။
ရဲကၠောန်ကမၠောန် ပရေၚ်သွံရာန်ဆေၚ်ထဝ်တံ သွက်သ္ဂောံဂွံ ဗံက်ချာကဝ်မယှေန်ပၞာန် ပတိတ်လဝ်ဏံဂှ် ဒးပတိုန်လိုၚ်သေင် ပရေၚ်သွံရာန် ဓါတ်သတ္တု(ထဝ်) ကိုပ်ကၠာတုဲ လိုင်သေၚ်စှ်ေကၠုၚ်မှ ဗံက်ချာကဝ်မယှေန်ပၞာန် ပတိတ်လဝ်ဂှ် ရာန်စကာသုၚ်စောဲအာ ဂွံမာန်ရောၚ်။
ပရေၚ်စၞောန်ကဝ်မယှေန်ပၞာန်ဂှ် သွက်ဂွံထိၚ်ချုက် အနှေန်ၚုဟ်မး ထဝ် ဒှ်ကီုလေဝ် အနှေန်ထဝ်တံဂှ် တန်တဴမံၚ်ကဵု ၚုဟ်ထဝ်ဂၠးကဝ်တုဲ နကဵုကဝ်မယှေန်ပၞာန် ဗီုလဵုမှ ထိၚ်အာၚုဟ်မးအနှေန်ထဝ် ဒှ်ဟွံမာန်ပုဟ် ညးတၠကမၠောန်ဆေင်ထဝ်မွဲတၠ ဟီုကဵု ဌာန်ပရိုၚ်သြၚ်လောန်တိုင်မ်ရ။
“အခိၚ်လၟုဟ် အနှေန်ထဝ်ဂၠးကဝ် ၚုဟ်သၠုၚ်တိုန်မံၚ်အိုတ်စောန်တုဲ ဍေံတံ ၚုဟ်ထဝ်ဂွံညိၚ် မိက်ဂွံထိၚ်ချုက်လေဝ် ပါမံၚ်ဏောၚ်။ ဆဂး ထိၚ်ဟွံဂွံပုဟ်လေဝ်။ ၚုဟ်ထဝ်ဂှ် ဍေံတံ ထိၚ်ချုက်အာဗီုပြၚ်ဏံလဝ် အံၚ်ဇၞးဟွံသေၚ်ပုဟ်။ နကဵုလိက်အုပ်ဗံက်ချာဏံရ ထိၚ်ၚုဟ်ထဝ် ဟွံဂွံပုဟ်။ မုဒှ်ရောဟီုတှ်ေ ပ္ဍဲဂၠးကဝ်ဂှ် ၚုဟ်မးထဝ် နွံမံၚ်တုဲတုဲရ။ ဍေံတံ ယှအ်ဖျေံနူကဵု အနှေန်ထဝ်ဂၠးကဝ်တုဲ ထိၚ်ဂှ် ဗီုလဵုမှ ထိၚ်ဂွံဟွံသေၚ်ပုဟ်” သာ်ဝွံ သ္ဂးရ။
တုဲပၠန် ဒးသွံရာန်ထဝ် နကဵုဗံက်ချာကဝ်မယှေန်ပၞာန်ဏံရ ဟီုဂှ်တှ်ေ အတိုၚ်ၚုဟ်မးဍေံတံ စၟတ်ခုတ်ကဵုလဝ်တံမ္ဂး အတိုၚ်ၚုဟ်ထဝ်မ္ၚး နတဲညးဂမၠိုၚ်သွံရာန်မံၚ်တံ ပရေၚ်ကိတ်ညဳလေဝ်ဟၟဲတုဲ ဒၞာဲလဵုမှ ဗက်ဂၠာဲရာန်ဂွံဟွံမာန်၊ အနှေန်ထဝ်လေဝ် ထိၚ်ချုက်ဟွံမာန်ပုဟ် ညးဆက်ဟီုရ။
ပ္ဍဲဗွဝ်ဖျာမ္ဂး အတိုၚ်ကဝ်မယှေန်ပၞာန် ခုတ်စၟတ်လဝ်ၚုဟ်ဂှ် ချူစုတ်လဝ်ကဵု ဗံက်ချာဍေံတံပတိတ်ကဵုလဝ်ဂှ်တုဲ ပ္ဍဲဗံက်ချာဆေင်ဂှ်တှ်ေ အတိုၚ်ၚုဟ်ကာလမံက်မံၚ် ချူတုဲ ကၠောန်မံၚ် ပရေၚ်သွံရာန်ကီု လ္ၚဵုနကဵုပရေၚ်သွံရာန်ဒမၠုက် ကၠောန်မံၚ်လေဝ်နွံ သ္ဂးရ။
နူကဵုကဝ်မတဳ ခုတ်စၟတ် ၚုဟ်မးဓာတ်သတ္တူ(ထဝ်) သၟဝ်တဲ ကဝ်မယှေန်ဂှ် ထဝ်ဍာ်ဒကေဝ်ပေၚ် လျိုၚ်မွဲဒကေဝ် ခုတ်လဝ် ၅,၉၉၀,၀၀၀ ဒကေဝ်ကီုလေဝ် အပ္ဍဲကဵုဒၞာဲဆေၚ်ထဝ်မ္ၚး ညးဂမၠိုၚ်တံ သွံရာန်မံၚ်ဂှ်တှ်ေ ဒဵုကဵု ၈,၈၀၀,၀၀၀ ၚုဟ်သၠုၚ်တိုန်မံၚ် မဒှ်ရ။
ဌာန်ပရိုၚ်-သြၚ်လောန်တိုင်မ်
Photo – Social Media