ကျိုက်ထဝ်၊ အံက်တဝ်ပါ ၂၀
ပ္ဍဲတွဵုရးမန် ပွိုၚ်ဍုၚ်ကျာ်ထဝ် ကွာန်တၟအ်လးကဵု ပ္ဍဲကဵုကွာန်သ္ၚိဗယိတံဂှ် နူကဵုၜၚ်ကျာဒပ်ကဝ်မယှေန်ပၞာန် ကြဳဖျေံဗုမ် ဗတိုက်လဝ်ရောၚ် ဂွံတီလဝ် နူကဵုညးဒေသတံကဵုဒပ်ပၠန်ဂတးတံရ။
ပ္ဍဲကဵုအံက်တဝ်ပါ ၁၇ အခိၚ်နူဂယးၜိုတ် ၁၀ နာဍဳကဝက် အပ္ဍဲကဵုကွာန်ၜါကွာန်ဏံ ဒပ်ကဝ်မယှေန်ပၞာန် ကြဳဖျေံဗုမ် ၄ မ နကဵုၜၚ်ကျာ Jet Fighter မဒှ်ရ။
အပ္ဍဲကဵုပရေၚ်ကြဳဗုမ်ဏံမ္ဂး ဗုမ်မွဲမဂှ် ဖတုံစှ်ေအာ အပ္ဍဲကွာန်တၟအ်လးတုဲ ညးတြုံအယုက် ၂၀ မွဲတၠ ဒးကဝက်ဗုမ်ပ္ဍဲဍိုပ်ကီု သ္ၚိမွဲမလေဝ် ဒးဗုမ်လီုလာ်အာကီုရ။
ပ္ဍဲကဵုပရေၚ်ကြဳလဝ်ဗုမ် ကွာန်သ္ၚိဗယိဂှ် ဗုမ်ဖတုံပြဟ်စှ်ေအာလဝ် မ္ၚးကွာန်တုဲ သ္ၚိဌာန်ကီု မၞိဟ်ကီု ဒးအာလဝ်ဘဲဝပ်ဟၟဲ သ္ဂးရ။
ဒၞာဲကွာန်ၜါကွာန် ဒပ်ကဝ်မယှေန်ပၞာန် ကြဳဏာဗုမ်ဏံဂှ် ဒှ်မံၚ်တိဍာ်အုပ်ဓုပ် ဗော်သွးကောန်ဂကူကရေၚ် KNU မဟာဒပ် (၁) ခရိုၚ်သဓီုရ။
လောန်ကၠုၚ်အံက်တဝ်ပါ ၉ တေံကီုလေဝ် ဒၞာဲတိဍာ် KNU ပွိုၚ်ဍုၚ်ၜဳလေၚ် ပ္ဍဲကဵုကွာန်သၞေဟ်ဟနဳဂှ် ၜၚ်ကျာဒပ် ကဝ်မယှေန်ပၞာန် ကြဳဖျေံဗုမ်ဗတိုက်ဏာတုဲ ကောန်ၚာ် ၅ တၠ ချိုတ်အာ ၁၂ တၠဂှ် ဒးလဝ်ဘဲဝပ်နွံရ။
အခိၚ်ပေါဲရုဲမာဲကြပ်ကၠုၚ်ဟဍၚ် ပ္ဍဲကဵုဒၞာဲဒေသတိဍာ် ဒပ်ပၠန်ဂတး ကောန်ဍုၚ်အရၚ်ရပ်လွဟ်တံထိၚ်ချုက်လဝ်တံဂှ် ၜၚ်ကျာ ဒပ်ကဝ်မယှေန်ပၞာန် ထပဵုဗတိုက်ကၠုၚ်တုဲ ကောန်ညးဍုၚ်ကွာန်တံ ပရေၚ်ဒးဝပ် ချိုတ်ဂၠိုၚ်အသိၚ်သၠုၚ်တိုန်ကၠုၚ်မံၚ်ရ။
ပရိုၚ်-သြၚ်လောန်တိုၚ်မ်
Photo – CJ