မတ်မလီု ၊ အံက်တဝ်ပါ ၂၀
ပ္ဍဲကဵုတွဵုရးမန် သွက်ဘာဗတောန်ယိုက်ဂၠေၚ်ဝန်ပၞာန် လၟေၚ် ၁၈ ဏံ သၟတ်ပ္ဍဲဒေသ ကရပ် ၂၅၀ တၠ နဒဒှ်ကောန်ပၞာန်တၟိ ဒးဒုၚ်ပကောံဏာရဂှ် အတိုၚ်ကဝ်မယှေန်ပၞာန် လလောၚ်တြးလဝ် ဂွံတီရ။
နဒဒှ်ကောန်ပၞာန်တၟိ သၟတ်ဒးဒုၚ်ပကောံလဝ်တံဏံဂှ် ဂကောံအလဵုအသဳတွဵုရးမန် ကဝ်မယှေန်ပၞာန်ခါန်ကၞက်လဝ်တံ ပ္ဍဲအံက်တဝ်ပါ ၁၇ အာဆဵုဂဗလဝ် ဒၞာဲကဵုဂအုပ်ဌာန်ပၞာန်ရးအဂၞဲ ဍုၚ်မတ်မလီုရ။
သၟတ်ဗွဲမဂၠိုၚ်တံဏံဂှ်တှ်ေ ဒးဒုၚ်ရပ်တံၚ်ဏာလဝ်ပဝ်တာ၊ အခိၚ်ဗ္တံတိတ်မ္ၚး ဒးဒုၚ်ရပ်ဏာ၊ အခိၚ်စဴနူကမၠောန် ဒးဒုၚ်ရပ်လဝ်တုဲ နဒဒှ်ကောန်ပၞာန်တၟိ ဒးဒုၚ်ပကောံဏာလဝ်မဒှ်ရ။
နဒဒှ်ကောန်ပၞာန်တၟိ သၟတ်ဒးဒုၚ်ပကောံဏာလဝ် ဗွဲမဂၠိုၚ်ဂှ်တှ်ေ အပ္ဍဲကဵုဂိက်သၞေဟ်ကၚ် လုပ်တိတ်ဍုၚ် ဒးဒုၚ်ရပ်ဏာလဝ်တုဲ သီုဗ္တံ သီုတ္ၚဲ ရဲတိတ်မ္ၚးတံ ဒးဒုၚ်ရပ်ဏာ ပါလုပ်အာလဝ်ရဂှ် ညးဒေသ တွဵုရးမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လၟုဟ်အတိုၚ်ပိုဲမိၚ်လဝ်ဂှ်တှ်ေ သၟတ်တံ ဒးတတ်အာကၠုၚ်မံၚ် ဂိက်သၞေဟ်ကၚ်တံနွံမံၚ်၊ ပ္ဍဲအခိၚ်ဗ္တံဍေံတံ မၚ်ရပ်မၚ်ပ္ဍဲဂိက်လုပ်တိတ်ဍုၚ် ဗီုဏံကီု အခိၚ်ဗ္တံဟွံသေၚ် ဒေါဝ်တ္ၚဲဒင်င် ဍေံတံဗက်ရပ်မံၚ်ပဝ်တာနွံမံၚ်” သာ်ဝွံ သ္ဂးရ။
အပ္ဍဲကဵုဒေသ ဒၟာနူဟိုတ်နာနာသာ်တုဲ ဒပ်ကဝ်မယှေန်ပၞာန်ရပ်ဏာ မၞိဟ်ဗွဲမဂၠိုၚ်တံဏံ ကလေၚ်ဗၠးတိတ်မာန်ဟွံသေၚ်၊ နဒဒှ်ကောန်ပၞာန်တၟိ ဒးဒုၚ်ပကောံဏာလဝ်တုဲ ရဲကြပ်မံၚ်ကဵုကဝ်မယှေန်ပၞာန် ညိညတံ နုက်ကဵုသြန်ဗွဲမဂၠိုၚ်မှ ကလေၚ်ဗၠးတိတ်ကၠုၚ်မာန်ရောၚ် ညးဆက်ဟီုရ။
ဗွဲကြဴဏံ သ္ကိုပ်အုပ်ဓုပ်အရာပ်/ကွာန်တံဂှ် သွက်ဂွံထပက်အဇာ လိၚ်မၞိဟ်ဟွံဂွံရတုဲ သွက်ဂွံယိုက်ဂၠေၚ်ဝန်ပၞာန် စွံပွန်ပတဝ်ဏာလဝ်ကဵု သၟတ်အပ္ဍဲဒေသတံဂှ်ရ သီုဗ္တံတ္ၚဲ ပရေၚ်ဂီုကၠီုဟၟဲရပုဟ် သၟတ်တံ သ္ဂးရ။
မွဲလပါ်ပၠန် ဥပဒေအရာယိုက်ဂၠေၚ်ဝန်ပၞာန်ဂှ် ကဝ်မယှေန်ပၞာန် ကလေၚ်ထပၠုပ်လမျီုတုဲ ဗွဲကြဴဏံ အပ္ဍဲကဵုတွဵုရးမန် ပံက်ကၠုၚ်လဝ်တန်ဗတောန်ပၞာန် လၟေၚ်ဂိတုနွံကၠုၚ်ဂှ်ကီု၊ ကြပ်ကၠုၚ်ကဵု ပေါဲရုဲမာဲဟဍၚ် ပဵုတုဲပကောံတိုန် ကောန်ပၞာန်တၟိ သွက်ဂွံယိုက်ဝန်ပၞာန် မဒှ်ရ။
အတိုၚ်တၚ်နၚ်ဌာန်ပရိုၚ်သြၚ်လောန်တိုၚ်မ် ပကောံဂွံလဝ်တံမ္ဂး အပ္ဍဲကဵုတွဵုရးမန် ပ္ဍဲကဵုတန်ဗတောန်ပၞာန် အရာယိုက်ဂၠေင်ဝန်ပၞာန် စနူလၟေၚ် ၁ ဒဵုစိုပ် ၁၈ ဏံ သၟတ်ဒေသလုပ်အဝေါၚ် ယိုက်ဝန်ပၞာန် ပွဳပွူ ၃၃၀၀ ဒးဒုၚ်ပကောံဏာ ကောန်ပၞာန်တၟိ မဒှ်ရ။
ပရိုၚ်-သြၚ်လောန်တိုၚ်မ်
Photo – MOI