ကွာလာလာန်ပူ၊ အံက်တဝ်ပါ ၂၀
ပ္ဍဲကဵုဍုၚ်ဗမာ ပေါဲရုဲမာဲဒပ်ပၞာန်ကၠောန်အာဏံ ပရေၚ်သၠးပွးဓရ်ယာလေဝ် နွံဟွံမာန်တုဲ နကဵုဂကောံယူရောပ် ဗလးဏာညးလ္ၚတ်ပေါဲရုဲမာဲဟွံသေၚ်ကီု သွက်အပြံၚ်အလှာဲပရေၚ်ဍုၚ်ကွာန်ဍုၚ်ဗမာဂွံဒှ်အာမာန် အာသဳယာန် ညံၚ်ဂွံကဵုဇြဟတ်ဟရိုဟ်ညိဂှ် ညးတာလျိုၚ်အခေါင်အရာမၞိဟ်အဆံၚ်လှုၚ် ဟီုဂးလဝ် ပ္ဍဲအံက်တဝ်ပါ ၁၇ ရ။
ဍုၚ်အာသဳယာန်တံကီု ဍုၚ်ဇိုၚ်ဝုတ်ဒိုဟ်ဖအိုတ်တံကီု သွက်အပြံၚ်အလှာဲဍုၚ်ဗမာ ညံၚ်ဂွံဒှ်အာမာန် ဘိုၚ်ကဵုဇြဟတ်ဟရိုဟ်ဍာံဍာံညိ သၟိၚ်ကဝ်မယှေန်ဏာယူရောပ် ကိုၚ်ဂျာတ်သ် အိုလံၚ်ဂါန် ဟီုဏာပ္ဍဲအေန်တာဗျူ ဍုၚ်ကွာလာလာန်ပူရ။
ပေါဲရုဲမာဲကၠောန်အာ ဒဳဇြမ်ပါ ၂၈ ဏံဂှ်မ္ဂး ဂၠံၚ်ပၞော်အရာသွက်ဂွံဒက်ပ္တန်ပရေၚ်ပညဳပညပ်ပၞာန်အပ္ဍဲဍုၚ်မွဲရောၚ် က္ဍိုပ်သ္ကိုပ်ပၞာန် မေန်အံၚ်လှိုၚ် ဟီုလဝ်ရ။
ဆဂး ပေါဲရုဲမာဲဂှ် ဒှ်ကသပ် အရၚ်သွက်ပရေၚ်အုပ်ဓုပ်ဒပ်ပၞာန် ညံၚ်ဂွံဒှ်အာဗဗွဲဓရ်ရောၚ် ညးစီုသ္ကီုကုလသမဂ္ဂမွဲတၠ၊ ဂကောံအခေါင်ဗၠးဒုဟ်ဂၠးကဝ်ကေုာံ ညးမၚ်လ္ၚတ်ရံၚ်ပရေၚ်ဍုၚ်ဗမာတံသ္ဂးတုဲ တးပါဲလဝ်ရ။
ပ္ဍဲကဵုဍုၚ်ဗမာ ယဝ်ရပရေၚ်ညိၚ်ဝပ်ဟၟဲမ္ဂး အလုံမွဲဒေသလေဝ် အရာဟွံညိၚ်ဝပ်ဒှ်ကၠုၚ်မာန် ရိုဟ်ကၞက်မွဲဒှ်မံၚ်ဏီမ္ဂး သွက်အာသဳယာန် ပရေၚ်ဒွိင်ဒွာဲမုက်ဂၞန်မွဲဂှ် ဒှ်မံၚ်ဍုၚ်ဗမာဍုၚ်ဏီရောၚ် ညးတာလျိုၚ် ကိုၚ်ဂျာတ်သ် အိုလံၚ်ဂါန် ဟီုရ။
ကၠာဟွံစိုပ်သဘၚ်ကောံဓရီုအာသဳယာန် ပ္ဍဲကွာလာလာန်ပူ ပ္ဍဲသတ္တဟဏံ ပရေၚ်လဟီုသ္ဂးဏံ မံက်တိတ်ကၠုၚ်လဝ်မဒှ်တုဲ ပ္ဍဲကဵုပေါဲရုဲမာဲဒပ်ပၞာန်ကၠောန်အာဏံ ဂကောံအာသဳယာန် ဗလးညးစၞးအာရံၚ်လ္ၚတ်နွံ/ဟၟဲဂှ် ဘိုအ်ဂွံသ္ဂုတ်သွာတ်အာနွံရ။
ပ္ဍဲကဵုဍုၚ်ဗမာ ဗွဲမပြဟ်ညံၚ်ဂွံဒေါအ်ပှော်ကီု တင်တုပ်စိုတ်ဘုံ ၅ တၚ် အာသဳယာန်တံဂှ် ဒပ်ပၞာန် ဟွံဂွံထမံက်ရုပ်ရဴဏီ။
ပရေၚ်အာတ်မိက်အာသဳယာန်တံဂှ် မုအရာမှ ဟွံဒှ်ကၠုၚ်မံၚ်တုဲ ပရေၚ်ပရာတ်တံဂှ် ဒပ်ပၞာန်ဆက်ကၠောန်မံၚ်ဖိုအ်ရ။
ပေါဲရုဲမာဲ နွံကဵုသၠးပွးပရေၚ်ဓရ်ယာညံၚ်ဂွံဒှ် ပ္ဍဲကဵုလၟေၚ်တရဴဥက္ကဌအာသဳယာန် ဝန်ဇၞော်ဍုၚ်သ္အာၚ်မလေဝ်ယှာ အာစိုပ်လဝ်နေပျဳတဝ်တေံ ဗတိုက်ဖအောဝ်ဟီုကီုလေဝ် နကဵုသၞောတ်ထ္ၜးအလုံဍုၚ်မွဲ ကၠောန်အာပေါဲရုဲမာဲဟွံမာန်ပုဟ်ဂှ် က္ဍိုပ်သ္ကိုပ်ပၞာန် ဒုၚ်လဝ်ဝန်နွံရ။
ပ္ဍဲကဵုဍုၚ်ဗမာ ဂကောံဆေၚ်စပ်သီုဖအိုတ်တံ ဒေါအ်ထောံပန်ပှော်တုဲ ညံၚ်ဂွံကၠောန်ဗ္ဒျ်အာ ပေါဲသဳကၠဳဆဵုဂဗဍာံ ညးတာလျိုၚ်ယူရောပ်အဆံၚ်လှုၚ် ဗတိုက်ဖအောဝ်လဝ်ရ။
Ref:AFP