သဓီု ၊ အံက်တဝ်ပါ ၂၀
ပ္ဍဲကဵုခရိုၚ်သဓီု ဗော်သွးကောန်ဂကူကရေၚ် KNU ကွာန်မၞုံဒေသ အပ္ဍဲကဵုမဟာဒပ် (၁) တံဂှ် ဒပ်ကဝ်မယှေန်ပၞာန် နကဵုၜၚ်ကျာကၚ် ထံၚ်ပရိုၚ်တုဲ ကၠောန်ကၠုၚ်ပရေၚ်ကြဳဖျေံဗုမ် ပဵုဂၠိုၚ်တိုန်မံၚ်ရောၚ် ဒပ်ပၠန်ဂတးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုပွိုၚ်ဍုၚ် ကျာ်ထဝ်၊ ၜဳလေၚ်ကဵု သဓီုဂှ် စနူဂိတုတုဲကၠုၚ်ဏံတုဲ နကဵုမခၞံကျာ Spy၊ ဒရုၚ်၊ ၜၚ်ကျာ Y-12 တံ ဒပ်ကဝ်မယှေန်ပၞာန်ကၠောန်မံၚ် ပရေၚ်ထံၚ်ပရိုၚ်ကျာ ပဵုဂၠိုၚ်တိုန် မဒှ်ရ။
ဒပ်ကဝ်မယှေန်ပၞာန် ကၠောန်မံၚ်ပရေၚ်ထံၚ်ပရိုၚ်ကျာ ပဵုဂၠိုၚ်တိုန်တုဲ ပ္ဍဲအံက်တဝ်ပါ ၁၇ ဖျေံကြဳဏာဗုမ် ကွာန်တၟအ်လးကဵု ကွာန်သ္ၚိဗယိ ပွိုၚ်ဍုၚ်ကျာ်ထဝ်ရဂှ် ညးဍုၚ်ကွာန်မွဲတၠ ဒးအာဘဲဝပ်ရ။
ဗီုပြၚ်ဏံကီု ပ္ဍဲအံက်တဝ်ပါ ၉ တေံလေဝ် ဒၞာဲ KNU ချဳဒရာၚ် ပွိုၚ်ဍုၚ်ၜဳလေၚ်ကွာန်သၞေဟ်ဟနဳဂှ် ဒပ်ပၞာန်ကျာ ကဝ်မယှေန်ပၞာန် ဟိုတ်နူကြဳဖျေံဗုမ်ဂှ် ကောန်ၚာ် ၅ တၠချိုတ်၊ ၁၂ တၠ ဒးအာဝပ်ရ။
လ္တူဒပ်ပၞာန်ကျာကဝ်မယှေန်ပၞာန် စွံပွန်ကဵု ဒၞာဲညးဍုၚ်ကွာန်တံမံၚ်စံၚ်တုဲ ကြဳဖျေံမံၚ်ဗုမ် ပ္ဍဲကဵုကွာန်တံဂှ် ဗော်သွးကောန်ဂကူကရေၚ် KNU မဟာဒပ် (၁) ပ္ဍဲကဵုခရိုၚ်သဓီု ပျုတ်ဗ္ဒေက်လဝ် ပိုတ်တ်ရ။
အခိၚ်ညောန်ကြပ်ကၠုၚ်ကဵု ပေါဲရုဲမာဲဟဍၚ် ပ္ဍဲကဵုဒၞာဲဒေသတိဍာ် ဒပ်ပၠန်ဂတးကောန်ဍုၚ်အရၚ်ရပ်လွဟ် ထိၚ်ချုက်လဝ်တံဂှ် ၜၚ်ကျာဒပ်ကဝ်မယှေန်ပၞာန် ထပဵုဗတိုက်ကၠုၚ်တုဲ ကောန်ညးဍုၚ်ကွာန်တံ ပရေၚ်ဒးဝပ် ချိုတ်ဂၠိုၚ် အသိၚ်သၠုၚ်တိုန်ကၠုၚ်မံၚ်ရ။
ပရိုၚ်-သြၚ်လောန်တိုၚ်မ်
Photo – Social Media