ကအ်ကြိက်၊ အံက်တဝ်ပါ ၂၂
ပ္ဍဲတွဵုရးကရေၚ် ကွာန်သၟဝ်ကျာ ဍုၚ်ကအ်ကြိက်တံ ဒပ်ပၞာန်ဗမာ ကြဳဖျေံဗုမ်မံၚ်အဆက်ဆက်တုဲ ဘာလကျာ်ကဵု စမြိုၚ်ဒၞာဲဒၟံၚ်တံ ဒးဗုမ် ပၟတ်တူ ဆေၚ်လေၚ်အာလဝ်နွံရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲသၟဝ်ကျာကအ်ကြိက် ဒၞာဲကွာန်မၞုံမံၚ် တိဍာ် KNU မဟာဒပ် ၇ တံ နူကဵုဒပ်ကဝ်မယှေန်ပၞာန်ဗမာ၊ ဒပ် BGF ၊ ဒပ် DKBA ပါ်တိတ်ဗိုလ်ဗိတံ ပံၚ်တောဲတုဲ ထပက်လဝ်ကရောၚ်ပၞာန်သၟးဟွံက နူကဵုဒပ်ပၞာန်ကျာဂှ်လေဝ် ဖျေံဗုမ်ဗတိုက်မံၚ် မွဲခဏမွဲခဏ ကၠောန်သ္ပမံၚ်ရောၚ် တမ်ရိုဟ်ကၞက်ဒေသတံ သ္ဂးရ။
ပ္ဍဲအံက်တဝ်ပါ ၂၀ ၜိုတ်အခိၚ်သဝ်တ္ၚဲ ၃ နာဍဳပြၚ်ၚ်ဂှ် ပွိုၚ်ဍုၚ်ကအ်ကြိက် သၟဝ်ကျာ ပ္ဍဲကဵုမွဲပွဳပွူ ထဳဖိုဝ်သာန်၊ ကအ်ဖာန်ယာပ်၊ နံၚ်မဳ၊ မိဖာလေဝ်တံဂှ် ၜၚ်ကျာဒပ်ပၞာန်ဗမာ ၜါမ ပဝ်ယာန်ဂေတ်ဂေၚ်မံၚ်တုဲ ကြဳဖျေံဗုမ်ဗတိုက်ဏာဂှ် ဘာလကျာ်ကဵု သ္ၚိဌာန်လ္ၚဵု ပ္ဍဲကဵုကွာန်ထဳဖိုဝ်သာန် ဒးဘဲလီုလာ်ဆောံလေၚ်အာ ရဂှ် တမ်ရိုဟ်ကၞက်ဒေသတံ ဟီုလဝ်ရ။
ဒၞာဲပေါဲဗတိုက်ဟွံဒှ်လဝ်ဂှ်လေဝ် ဒပ်ကဝ်မယှေန်ပၞာန် ကြဳဖျေံဗုမ် နူကဵုၜၚ်ကျာဟီုဂှ် စွံပွန်ပတဝ်လဝ်ကဵု ကွာန်ဂမၠိုၚ် တၚ်ရန်တၟံနွံနွံ ကြဳဗုမ်ဗတိုက်လဝ်ရောၚ် ညးဒေသတံ ဟီုဂးမံၚ်ရ။
ဒပ်ကဝ်မယှေန်ပၞာန်တံဂှ် ပ္ဍဲအံက်တဝ်ပါ ၆ ကလေၚ်ထိၚ်ချုက်ဂွံ သၟဝ်ကျာကအ်ကြိက် သ္ကုတ်ဂၠံၚ် နဗူ-ကအ်ကြိက် ဂှ်တုဲ ကရောၚ်ပၞာန်ထပက်ကၠုၚ်လပါ်ကွာန် မျပတိုၚ်၊ နံၚ်မဳ၊ နာန်ကဝ်တေတံဂှ် ဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတး KNLA တံရ။
တုဲပၠန် လပါ်သၟဝ်ကျာ ဍုၚ်ကအ်ကြိက် ဒၞာဲဂၠံၚ်လ္တူဒဵုဒဝ်န ဗြဝတဳ-ကအ်ကြိက်ပၠန် ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်တုဲ ပြဟ်ဟ်ဏံ ဖျေံလဝ်ဒပ်လပါ်ကွာန် နံၚ်နာၚ် ယာန်ကုက်တံရောၚ် တမ်ရိုဟ်ကၞက်ပရေၚ်ပၞာန်တံ သ္ဂးရ။
ကရောၚ်ပၞာန်ဒပ်ပံၚ်တောဲ ဒပ်ကဝ်မယှေန်ပၞာန်ဗမာ၊ ဒပ် BGF ၊ ဒပ် DKBA ပါ်တိတ်တံ လုပ်ကၠုၚ်လဝ်ကွာန် သၟဝ်ကျာဍုၚ်ကအ်ကြိက်ဂှ် ရပ်ဏာမၞိဟ်တံလေဝ်နွံ ပလီုသ္ၚိ သီကေတ်ဏာကပေါတ်လေဝ်နွံ ဂွံတီကေတ် နူကဵုညးဒေသတံရ။
ဌာန်ပရိုၚ်-သြင်လောန်တိုင်မ်
Photo – Social Media