တိုကျို-အံက်တဝ်ပါ ၂၂
သာနေတာကာအဳချဳဝွံ ပ္ဍဲကဵုပေါဲရုဲမာဲ ဂွံဇၞးလုပ်အာဝင်တုဲ ဒှ်ကၠုၚ်သ္ကိုပ်ဝန်ဇၞော်ညးဗြဴ ဍုၚ်ဂျပန် ပထမကိုပ်ကၠာအိုတ်ရ။
နကဵုပသဲက္ဍာၚ်ညးဗြဴဂျပါန်ရောၚ် ညးဂမၠိုၚ်တီညာတ်လဝ် ညးဗြဴကန်သာဗေတေတ် အယုက် ၆၄ သၞာံဏံဝွံ ညးစွံအဲပရဲကု သ္ကိုပ်ဝန်ဇၞော်တြေံဍုၚ်အဂႅလိက် မာဂရက် တက်ချာ မဒှ်ရ။
သွက်ဂွံဒှ်ကၠုၚ် က္ဍိုပ်သ္ကိုပ်ဂျပါန် ပရေၚ်ဂစာန်လွဳညးတေံ အလန်တတိယ မဒှ်တုဲ ပ္ဍဲကဵုပရေၚ်ယှုက်ထုဲဗော် လေတ်ဗရဴဒဳမဝ်ကရိတ်တေတ် LDP အကြာက္တဵုဒှ်မံၚ် ပွိုၚ်မသုန်သၞာံဏံဂှ် ဒှ်ကၠုၚ်သ္ကိုပ်ဝန်ဇၞော် မရနုက်ကဵု စတုတ္ထရ။
ညးတေံဝွံ အပ္ဍဲကဵုဗော် LDP မ္ဂး ဒှ်မၞိဟ်သဘဴလစွံစိုတ်ကြံၚ်မ္ၚိုဟ်မွဲတုဲ ဒှ်ကောန်ကွးဒုၚ်သြဇာ သ္ကိုပ်ဝန်ဇၞော်တြေံစုတိ ယှေန်ဇြိုအာဗေ မဒှ်ရ။
ညးမၞုံကဵုဥာဏ်ပရေၚ်ပညာသၠဲလးတုဲ ဒှ်ပူဂဵုညးဂမၠိုၚ်ရှ်ေသှ်ေမွဲရောၚ် သမ္မတအမေရိကာန် ဒဝ်နေဝ်ထရ အခိၚ်ကၠာတေံ ကေၚ်ဟီုလဝ်ရ။
နကဵုသ္ကိုပ်ဝန်ဇၞော် သာနေတာကာအဳချဳ ဂွံဒုၚ်ရုဲစှ်လဝ်တုဲ ပရေၚ်ပိုန်ဒြပ်အိၚ်ဇိၚ်မံၚ်တံဂှ် သွက်ဂွံပလေဝ်အာ၊ ပရေၚ်ဆက်ဆောံဟွံပြေပြံၚ်လဝ် အကြာဂျပါန်-အမေရိကာန်တံ သွက်ဂွံကၠောန်ပခိုဟ်တိုန်၊ ဗော်ဂွံအဝဵု ဒကးပြးဇးမံၚ်ဂှ် သွက်ဂွံကလေၚ်စန်ပကောံအာ ရဴသာ်ဝွံ မ္ဒးဆဵုဂဗအာကဵု တၚ်ကော်ဆောတံဏံ မဒှ်ရောၚ်။
ပ္ဍဲအခိၚ်ညးတေံ စကေတ်တာလျိုၚ် သ္ကိုပ်ဝန်ဇၞော် နကဵုတာလျိုၚ်မွဲ သွက်ဂွံဆဵုဂဗအာကဵု သမ္မတအမေရိကာန် ဘိုအ်ဂွံကၠုၚ်စိုပ်ဂျပါန် ပ္ဍဲအကြာကၞောတ်ဂိတုဏံရ။
အခိၚ်ကၠာတေံ သ္ကိုပ်ဝန်ဇၞော် ယှဳဂဳရူ အဳယှဳဗာဟာ အာစိုပ်လဝ် ဝါယှေန်တန်တုဲ အကြာဒစးဒုၚ်တော်ဆလဝ်ဝါတ်အိုတ် ပရေၚ်ဆဵုဂဗလဝ်ကဵု ထရ ပြေပြံၚ်ကၠုၚ်လဝ်ရ။
ပ္ဍဲတာကာအဳချဳ အခိၚ်ဒစးဒုၚ် သွက်ဂွံလ္ၚတ် ကဵုအခိၚ်ဗွဲမဂၠိုၚ်ဟွံဂွံကီုလေဝ် ညးတေံလေဝ် ညံၚ်ရဴထရကီု သၟာတဲပုၚ် ဝါဒမၞိဟ်အပြောံမွဲဒှ်မံၚ်ဂှ်ရ သွက်ဆဵုဂဗညးၜါ ပြေပြံၚ်မာန်ရောၚ် ညးလ္ၚတ်မံၚ်တံ ဟီုရ။
သွဟ်ပေါဲရုဲမာဲ ဂျပါန်ဝွံ ဒှ်အရာကေၚ်ကာပရေၚ်အပ္ဍဲဍုၚ်ဂျပါန်ကီုလေဝ် စပ်ကဵု ထာဲဝါန်တုဲ ပရေၚ်ကတိကဵုလဝ်တံ ညံၚ်ဂွံစွံဇြိဟ်နက်ညိဂှ် ညးအခေါင်ဟီုဂးနွံ ဌာနဝန်ဇၞော်ကြုက် ကျဳယာကောန် ဗတိုက်ဖအောဝ်ဟီုဂးလဝ်နွံရ။
ပ္ဍဲဂကောံအလဵုအသဳ တာကာအဳချဳဏံ ကောန်ကွး ယှေန်ဇြိုအာဗေ “သာတ်သူကဳ ကာတာမာယာဟာ”တၠုၚ်လအာ ဘိုအ်ဂွံဒှ်ကၠုၚ် ဝန်ဇၞော်ပရေၚ်ဘဏ္ဍာမာန်ရောၚ်။
ကောန်ဗၠာဲသ္ကိုပ်ဝန်ဇၞော်တြေံ “ယှေန်ဂျဳရို ကိုအိဇုမိ” ဒှ်ကၠုၚ် ဝန်ဇၞော်ပရေၚ်စဵုဒၞာမာန်ရောၚ်။
တာကာအဳချဳဂှ် သၟာတက်ဒရာမ် ဟေဝ်ဗဳမက်တေဝ်မွဲတုဲ ဇၟာပ်အလန်ညးတေံ တက်ဒရာမ်မ္ဂး လေံပိုတ်အာလေပ်မံၚ်ဟဂှ်တုဲ ဒးပကောံဘိုအ်စွံလဝ်လေံဒရာမ်နွံမံၚ် ဂွံတီရ။
ညးတေံဝွံ ဒှ်သၟာဗၠိုတ်ဍာ်မွဲတုဲ ဒှ်ညးတၠဝါသနာကွဳစက်မွဲကီုရ။ အခိၚ်တိုန်မံၚ်တက္ကသိုလ်ဂှ် သွက်ကောန်ညးဗြဴ ထံက်ပၚ်စရိတ်တက္ကသိုလ်ဟွံမာန်ပုဟ် မိမညးတေံဟီုတုဲ နကဵုစရိတ်ဇကုကဵုဇကု ဂၠာဲကေတ်တုဲ ညးတေံတိုန်လဝ်ဘာ မဒှ်ရ။
Ref:BBC