မတ်မလီု၊ အံက်တဝ်ပါ ၂၂
ပ္ဍဲကဵုတွဵုရးမန် ကမၠောန်ထၜိုတ်ရာဘာတံ ကလေၚ်စမံၚ်ကီုလေဝ် ဟိုတ်နူကရောၚ်ပၞာန် ဒပ်ကဝ်မယှေန်ပၞာန်သီအဝဵုတံဂှ် သွက်ဂွံခွာတ်ရာဘာ ဒှ်မံၚ်အခက်ခုဲအိုတ်ရဂှ် ရဲခွာတ်ရာဘာတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲပွိုၚ်ဍုၚ်ကျာ်ထဝ်၊ ၜဳလေၚ်၊ သဓီုကဵု ရေဝ် ပွိုၚ်ဍုၚ်ဗွဲမဂၠိုၚ်တံဂှ် ဒပ်ကဝ်မယှေန်ပၞာန် လုပ်ဖျေံလဝ်ဗ္ဒိုပ် အကြာကၠအ်ရာဘာ၊ ကရောၚ်ပၞာန်လုပ်အာ အကြာကၠအ်တုဲ အောပ်မၚ်ကင်ဒမၠုက်တံ ကၠောန်မံၚ်နွံရ။
ပ္ဍဲအကြာကၠအ်ရာဘာ ဟိုတ်နူကရောၚ်ပၞာန်ဒပ်ပၞာန်တံ နွံမံၚ်ဂှ်ရ ရဲခွာတ်ရာဘာတံ အခိၚ်ဟွံရုဲဒးဒုၚ်ရပ်ဗွဲအဓ္ဓမမာန်၊ ဒးဂွိၚ်ဖေက် ဗၠေတ်စမၞိဟ်တုဲ ပန်စုတ်ဏာကီု၊ ပရေၚ်ဂီုကၠီုဟၟဲတုဲ သွက်ဂွံခွာတ်ရာဘာဂှ် ဒှ်မံၚ်အခက်ခုဲအိုတ်ရ။
ကရောၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ်မ္ဂး ကော်ရပ်ဏာ ကောန်ကွာန်တံနွံမံၚ်တုဲ ယဝ်ရကရောၚ်ပၞာန် စိုပ်ကၠုၚ်တှ်ေလေဝ် ဒးဒေါအ်ထောံလဝ် ကမၠောန်ခွာတ်ရာဘာတံရဂှ် တၠကၠအ်ရာဘာ ပွိုၚ်ဍုၚ်ရေဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“မွဲအလန်တေံ ကရောၚ်ပၞာန် ထပက်စိုပ်ကၠုၚ်တုဲ ကော်ဏာရဲကွာန်တံဏံ။ ကော်ဏာတုဲ ကလေၚ်ဗလးနၚ်လဝ်၊ ကရောၚ်ပၞာန်ကၠုၚ်တှ်ေ ပိုဲဒေါအ်ထောံကမၠောန်အိုတ်။ ပါဲဂြိပ်အာသီုညးဖအိုတ်ရ။ ကၠအ်ပိုဲလ္တူဍုၚ်ကဵု ကၠအ်ဗ္ဒာဲတံ ဍေံတံအခက်အခုဲနွံညိကီု” သာ်ဝွံ သ္ဂးရ။
ဟိုတ်နူကရောၚ်ပၞာန် ဒပ်ကဝ်မယှေန်ပၞာန်တံဂှ် ကမၠောန်ခွာတ်ရာဘာ ဒးလီုအာသၟးဟွံက ညးမွဲမှ ဟွံဂံၚ်ဆက်မံၚ် အကြာကၠအ်တုဲ စနူဒးကော်သၟာကမၠောန်တံဂှ် ဒှ်တိုန်မံၚ်အခက်အခုဲပၠန် ညးဆက်ဟီုရ။
ဒပ်ကဝ်မယှေန်ပၞာန် ထပက်ကၠုၚ်ကရောၚ်ပၞာန်မ္ဂး အကြာဒၞာဲလုပ်တိတ်ကွာန်ကီု အကြာကၠအ်ရာဘာတံကီု တပ်ပါမ်လဝ် မာၚ်တပ်တိတံနွံမံၚ်ရောၚ် ညးဒေသၜဳလေၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဒၞာဲကရောၚ်ပၞာန်ဍေံတံ ထပက်အာလဝ် ပ္ဍဲပၞော်လုပ်တိတ်ကွာန်တံ အကြာကၠအ်ရာဘာတံ ပါမ်လဝ်မာၚ်နွံတှ်ေ ပိုဲမၞိဟ်ဝါတ် သၟာကမၠောန်သ္ဇိုၚ်သၟဝ်တံ သွက်ဂွံကၠောန်စကမၠောန်ဂှ် ဒှ်အာအခက်အခုဲ တၚ်ဝါတ်ဗွဲမဂၠိုၚ်၊ တုဲပၠန် ဆဵုမၞိဟ်တှ်ေ ဍေံတံရပ်ကော်ဏာမံၚ်ကီု” သာ်ဝွံ သ္ဂးရ။
အဃောကၠောန်မံၚ်ကမၠောန် ပ္ဍဲကၠအ်ရာဘာတံဂှ် ဂဗစုတ်ကရောၚ်ပၞာန်တုဲ ဒးဒုၚ်ရပ်မ္ဂး အောန်အိုတ်ဒးဒုၚ်ၜုၚ်တက်ဏာဟွံက သီုကဵုဒးဒုၚ်ပကောံကောန်ပၞာန်တၟိ နနဲအဓ္ဓမလေဝ်နွံမံၚ်ဂှ်ရ သွက်ဂွံအာကၠောန်ကမၠောန်ရာဘာတံ အလဵုလဵုဖေက်မံၚ်ဒှ်ကၠုၚ်လဝ်နွံ ညးဆက်ဟီုရ။
မွဲလပါ်ပၠန် နူကဵုဌာနက္ဍိုက်ပ်ပရေၚ်တဵုလွဳ သၟဝ်တဲကဝ်မယှေန်ပၞာန်ဝွံ ပ္ဍဲဍုၚ်ဗမာ ဒၞာဲဒေသအဓိက တဵုမံၚ်ရာဘာ ပ္ဍဲရးတနၚ်သဳ၊ ဗဂေါ၊ မန်၊ ကရေၚ်ကဵု တွဵုရးသေံတံမ္ဂး ပ္ဍဲကဵုရာဘာမွဲဧက ညံၚ်ဂွံတိတ်လျိုၚ် ၁၀၀၀ ပံၚ်မာန် တံၚ်ဓဇက်မံၚ် ကိုန်အစဳဇန်နွံမံၚ်ရောၚ် ပ္ဍဲကဵုလိက်ပရိုၚ် တြးဝါဒ ကဝ်မယှေန်ပၞာန် ချူပတိတ်လဝ် အံက်တဝ်ပါ ၂၁ ဂှ်ရ။
အသိၚ်ရာဘာညံၚ်ဂွံတိတ်ဂၠိုၚ်တိုန် နူကဵုကဝ်မယှေန်ပၞာန် ကၠောန်သ္ပ ရေၚ်တၠုၚ်မံၚ် ၜိုန်ရဟီုမံၚ်ကီုလေဝ် နတဲဏံမ္ဂး အပ္ဍဲဒေသ ရာဘာတိတ်မံၚ်ဏံ ဟိုတ်နူကရောၚ်ပၞာန် ဒပ်ကဝ်မယှေန်ပၞာန်တံတုဲ ခွာတ်ရာဘာပေၚ်ၚ်ဟွံမာန်ကီု ဂၠာဲကောန်ကမၠောန်လေဝ်ဝါတ် စရိတ်ပတိတ်ရာဘာ ၚုဟ်မးအိုတ်ဂၠိုၚ်မံၚ်တုဲ ဗီုအခိၚ်ကၠာတေံ ခွာတ်ပတိတ်ထၜိုတ် ရာဘာဟွံမာန်ပုဟ် တၠကၠအ်တံ ဟီုရ။
တွဵုရးမန်ဝွံ အတိုၚ်မွဲဍုၚ်မ္ဂး တဵုလဝ်ရာဘာဂၠိုၚ်အိုတ်ကီု တဵုလွဳလဝ်နွံမံၚ် ဧက ၅ ကိုတ်ပြၚ်တုဲ မွဲသၞာံမ္ဂး လျိုၚ်ရာဘာ တာန်မွဲကိုတ်ပြၚ် တိတ်မံၚ်ရ။
ဌာန်ပရိုၚ်-သြင်လောန်တိုင်မ်
Photo – Social Media