ဂျဳနဳပါ ၊ အံက်တဝ်ပါ ၂၃
လ္တူသွဟ် ဂကောံပၞာန်ကၠောန်အာ ပေါဲရုဲမာဲအလီဏံ သွက်ဂွံဒစဵုဒစးစောဒကအာ ကေုာံ ညံၚ်ဟွံဂွံသ္ပစၟတ်သမ္တီ ပ္ဍဲကဵုသဘၚ်သဳကၠဳ ဂကောံပါလီမာန် အမာတ်ဂၠးကဝ် IPU ဂှ် ကမ္မတဳညးစၞးစၠတ်ထဝ် ကၟိန်ဍုၚ် CRPH ဗတိုက်ဖအောဝ်လဝ်ရ။
ပ္ဍဲနိဂီုဍုၚ်သွေတ်ဇြာလာန် ဍုၚ်ဂျဳနဳပါ စနူအံက်တဝ်ပါ ၁၉ ဒဵုစိုပ် ၂၃ ကၠောန်သ္ပလဝ် သဘၚ်သဳကၠဳ မရနုက်ကဵု (၁၅၁) ဝါ ကေုာံ ကောံဓရီုဆက်စပ်တံဂှ် ဂကောံညးစၞးအမာတ်စၠတ်ထဝ်ဍုၚ်ဗမာ ဒံက်တာ ဝေၚ်မျာတ်ဧ ကဵု ဒဝ်ဇြေန်မာအံၚ်တံ သ္ကိုပ်သ္ကတိုန်စိုပ်လဝ်ရ။
အပ္ဍဲဏံ ဂကောံညးစၞးအမာတ်စၠတ်ထဝ် နူကဵုဍုၚ်သေံ၊ အဳတလဳ၊ ခါနေတာ၊ သွဳဒေန်၊ အဝ်သတေယျာတံဂှ်လေဝ် ဗွဲတၞဟ်ခြာ ဆဵုဂဗသဳကၠဳလဝ်နွံ CRPH လလောၚ်ပတိတ်လဝ်ပရိုၚ်ရ။
ပရူပရာ ဒပ်ပၞာန်ဗတိုက်မံၚ်ကဵုၜၚ်ကျာတံကီု၊ ပရေၚ်ဖံက်ပကဝ် အခေါၚ်အရာမၞိဟ်၊ ဟိုတ်နူပရေၚ်ပကီုပရာတ်တံတုဲ ညးဒဴဘဲပၞာန်တံ ဗီုဒးစ္ဍးခြာမံၚ် နူကဵုဌာန်ဒၟံၚ်ကီု ဗီုဒးဆဵုညာတ်မံၚ်ကဵု ဘဲဒဒိုက်နာနာ ပရူပရာသၟာကမၠောန်စိုပ်မံၚ်ဍုၚ်မ္ၚးတံကီု စပ်ကဵုပရေၚ်ဍုၚ်ကွာန်ဗမာ က္တဵုဒှ်မံၚ်တ္ၚဲဏံ သောၚ်ကလးပတိုန်ထ္ၜးလဝ်နွံရ။
လုပ်ဗဗွဲသၞောဝ်ဟွံသေၚ် ဂကောံပၞာန်ကၠောန်အာပေါဲရုဲမာဲအလီဏံ သွက်ဂွံဒစဵုစး စောဒကအာသွဟ်ဂှ်ကီု ညံၚ်ဟွံသ္ပကဵုစၟတ်သမ္တီကီု က္ဍိုပ်သ္ကိုပ်ဍုၚ်၊ ညးစၞးစၠတ်ထဝ်၊ ကောန်ထံၚ်ပရေၚ်ဍုၚ်ကွာန် ဒးဒုၚ်ရပ်လဝ်တံ သွက်ဂွံဗၠးတိတ်မာန် ဗတိုက်ဖအောဝ်လဝ်ရ။
ညးစၞးစၠတ်ထဝ် ပေါဲရုဲမာဲ ၂၀၂၀ တံကီု CRPH ကီု နူကဵုဗွိုၚ် စၠတ်ထဝ် ဂၠးကဝ်တံ ညံၚ်ဂွံဆက်သ္ပကဵုစၟတ်သမ္တီ ပ္ဍဲအရာသောၚ်ကလး ပဋိပက္ခ ပြဟ်ဟ်ဏံကဵု ပရေၚ်ဂၠာဲသွဟ် သွက်ဍာ်ဇမၠိၚ်တံဂှ် ပံၚ်တောဲအာကဵု ဇြဟတ်ပၠန်ဂတးတံတုဲ လ္တူလၟေၚ်ပရေၚ်ကမၠောန်တံဏံ ညံၚ်ဂွံကဵုအရီုဗၚ် ဗွဲမစိုပ်တရဴမာန် သဳကၠဳဗတိုက်ဖအောဝ်လဝ်ရောၚ် သ္ဂးရ။
ဂကောံပါလီမာန်အမာတ်ဂၠးကဝ် IPU ဂှ် နကဵုအဆံၚ်စၠတ်ထဝ်ဍုၚ်နိဂီု (၁၈၃) ဍုၚ် ဒက်ပ္တန်လဝ်ရ။ ပ္ဍဲဍုၚ်ဗမာ စနူဒပ်ပၞာန်သီလဝ်အဝဵုသၞာံ ၂၀၂၁ တေံတုဲ ဗွဲကြဴ နူကဵုကေၚ်ကာကံၚ်သဳ IPU သ္ပကၠုၚ်စၟတ်သမ္တီ CRPH ဂှ် နဒဒှ် ဂကောံမိတ်သဳကၠဳမွဲတုဲ ဒဵုကဵုတ္ၚဲဏံ ဆက်သ္ပလဝ်စၟတ်သမ္တီဖိုအ်ရ။
ဂကောံပၞာန်ပြံၚ်သၠာဲလဝ်ယၟု ကဝ်မယှေန်ပၞာန် သ္ကိုပ်သ္ကတုဲ ပ္ဍဲကဵုစိုပ်ကၞောတ် ဒဳဇြမ်ပါမ္ဂး ပေါဲရုဲမာဲသ္ကုတ်ကဵုသ္ကုတ် ကၠောန်အာဏံ ဂှ် ဍုၚ်ဇြဟတ်ဇၞော် ကြုက်၊ ရတ်ယှာကဵု အန္ဒိယတံ ကဵုမံၚ်ဇြဟတ် ထံက်လဝ်ဂလာန်ရောၚ်။
ပရိုၚ်-သြၚ်လောန်တိုၚ်မ်
Photo – CRPH