ဘာအင်၊ အံက်တဝ်ပါ ၂၃
တွဵုရးကရေၚ် ပွိုၚ်ဍုၚ်ဘာအၚ် ပေါဲဗတိုက်ဟၟဲမွဲသာ် ပ္ဍဲကွာန်ဘာပံၚ် နူကဵုဒပ်ကဝ်မယှေန်ပၞာန် ပန်ကဵုလွဟ်ဇၞော်တုဲ ညးဍုၚ်ကွာန် ၂ တၠချိုတ်၊ ၁၅ တၠဒးလဝ်ဘဲဝပ်နွံ ဂွံတီနူ KNU ခရိုၚ်သဓီုရ။
တုဲကၠုၚ်အံက်တဝ်ပါ ၂၀ သဝ်တ္ၚဲ ၜိုတ် ၆ နာဍဳဂှ် နူကဵုဒပ် ကဝ်မယှေန်ပၞာန် ဖျေံသ္ဇိုၚ် ကမမံၚ် ပန်ဏာကဵုလွဟ်ဇၞော် ၁၂၀ မမမွဲမ အပ္ဍဲကဵုကွာန်ဘာပံၚ် မဒှ်ရ။
ဟိုတ်နူမကမ်လွဟ်ဇၞော်ဒတုံခတိုဟ်အာဂှ် ကောန်ကွာန်ဘာပံၚ် “မနော်ဝါးဘဲ”အယုက် ၁၂ ကဵု “ကိုတာတူး” အယုက် ၃၇ တံ ချိုတ်အာပ္ဍဲဒၞာဲဂှ် မွဲအလန်ဓဝ်ရ။
ပ္ဍဲလၟေၚ်ဒဒှ်ဏံမ္ဂး ကောန်ၚာ် ၉ တၠပါလုပ် ညးဍုၚ်ကွာန် ၁၅ တၠ ဒးအာဘဲဝပ်တုဲ သ္ၚိဌာန်ဟွံအောန်နူကဵုပိမ လီုလာ်အာလဝ်နွံ ညးအုပ်ကာဗော်သွးကောန်ဂကူကရေၚ် KNU ခရိုၚ်သဓီု ပဒိုသဝ်ဧနိုၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပွမပန်လွဟ်ဇၞော်ဏံမ္ဂး ပေါဲဗတိုက်ဟၟဲမွဲသာ် အပ္ဍဲကွာန်ဒၞာဲသ္ၚိဌာန် ညးဍုၚ်ကွာန်တံ မံၚ်စံၚ်တန်တဴမံၚ်တံဂှ် ပန်စုတ်ဏာသက်က်ရောၚ် သ္ဂးရ။
အကြာဂိတုဏံ ပ္ဍဲကဵုတိဍာ် KNU ခရိုၚ်သဓီု ပွိုၚ်ဍုၚ်ၜဳလေၚ်၊ ကျာ်ထဝ်ကဵု ဘာအၚ်တံဂှ် နူကဵုဒပ်ကဝ်မယှေန်ပၞာန် ပဵုတုဲ ပန်မံၚ်ကဵုလွဟ်ဇၞော်ကီု နကဵုပၞာန်ကျာ ကၠောန်သ္ပကၠုၚ် မဒှ်ရ။
ပ္ဍဲကဵုအံက်တဝ်ပါ ၉ တေံဂှ်လေဝ် ပ္ဍဲကဵုပွိုၚ်ဍုၚ်ၜဳလေၚ် ဟိုတ်နူၜၚ်ကျာဒပ်ပၞာန် ပန်ဖျေံဏာ ပ္ဍဲကဵုကွာန်သၞေဟ်ဟနဳဂှ် ကောန်ၚာ် ၅ တၠချိုတ်အာတုဲ ၁၂ တၠ ဒးအာလဝ်ဘဲဝပ်နွံရ။
ပရိုၚ်-သြၚ်လောန်တိုၚ်မ်
Photo – CJ