ဗြဝတဳ၊ အံက်တဝ်ပါ ၂၃
ပ္ဍဲတွဵုရးကရေၚ် ပွိုၚ်ဍုၚ်ဗြဝတဳ ဗ္ဒာဲပယျဵုသေံ-ဗမာ ဒၞာဲဒပ်မၚ်ပယျဵု ကရေၚ် BGF ထိၚ်လဝ် KK Park ဂှ် ဒပ်ပၞာန်ဗမာလုပ်စၟဳစၟတ်အာရောၚ် ပရိုၚ်တိတ်မံၚ်တုဲ သၟာကမၠောန်နွံအပ္ဍဲဒၞါဲဏံ ဗွဲမဂၠိုၚ် ဂြိပ်ပါဲတိတ်အာရဂှ် ဂွံတီနူညးဒေသတံရ။
ပ္ဍဲအံက်တဝ်ပါ ၂၂ ဒၞာဲအပ္ဍဲဗွိုၚ် “ကျာဖျ” KK Park ဂှ် ဒပ်ပၞာန်ဗမာ လုပ်စၟဳစၟတ်အာရောၚ် ပရိုၚ်တိတ်မံၚ်တုဲ ကောန်ဍုၚ်ကြုက် ဗွဲမဂၠိုၚ်တံဂှ် ရဲဒပ် BGF ဖ္ဍိုက်ကွဳစက် ကော်ပတိတ်ပြံၚ်ပဆုဲဏာ ဌာန်ဒၞာဲတၞဟ်ဟ်ကီု သၟာကမၠောန်တံလေဝ် ဂြိပ်ပါဲတိတ်အာရဂှ် ဂွံတီရ။
ပြဟ်ဟ်ဏံ ကောန်ဍုၚ်ကြုက် ဂြိပ်ပါဲလဝ်နူဏံဗွဲမဂၠိုၚ်တံ စိုပ်ကၠုၚ်အပ္ဍဲဍုၚ်ဗြဝတဳတုဲ ဒၞာဲဟဝ်တေဝ်ကဵု ဗ္ဒိုပ်ဇူဒီုဂမၠိုၚ် မၞိဟ်ပေၚ်ကၟိုဟ်အာယျဂှ် တမ်ရိုဟ်ကၞက်ပရိုၚ်ညးဒေသဗြဝတဳလ္ၚဵု သ္ဂးရ။
တုဲကၠုၚ်အံက်တဝ်ပါ ၁၉ တေံ ပ္ဍဲကဵုဒၞာဲဗွိုၚ် “ကျာဖျ” KK Park ဏံ အခိၚ်ဒပ်ပၞာန်ဗမာ လုပ်စၟဳစၟတ်လဝ်ဂှ် လၟိဟ်မၞိဟ်နကဵုလ္ၚီပြၚ် စမြိုၚ်ဒၟံၚ်လၟိဟ်ကဵုကၠံ ဆဵုလဝ်တုဲ သီကေတ်လဝ် စက် Starlink တံနွံရောၚ် နူကဵုကဝ်မယှေန်ပၞာန် လလောၚ်ပတိတ်လဝ်ပရိုၚ်ရ။
အခိၚ်ဒပ်ပၞာန်ဗမာ လုပ်စၟဳစၟတ်လဝ်ဟီုမ္ဂး ဆၜိုတ်ဗီုပြၚ်ဂွံထ္ၜးစရ ဒှ်ကီု ပညဳလဝ်ကဵုဒပ်မၚ်ပယျဵုကရေၚ် BGF တုဲမှလေဝ် လုပ်စၟဳစၟတ်လဝ်ရောၚ် တမ်ရိုဟ်ကၞက်ပရိုၚ်တံ သ္ဂးရ။
လပါ်သၠုၚ်ကျာဗြဝတဳ ပ္ဍဲကဵုကွာန်မေဝ်ထဝ်သလေဝ်၊ အေၚ်ဂျေၚ်မျာၚ်တံဂှ် ကရောၚ်ပၞာန်ဒပ်ကဝ်မယှေန်ပၞာန် လုပ်စိုပ်ကၠုၚ်လဝ်တုဲ ဗွဲကြဴဏံ ဒၞာဲ BGF တံထိၚ်ချုက်လဝ် KK Park နွံမံၚ်အပ္ဍဲကွာန်ဏံဂှ် ဒပ်ပၞာန်ဗမာတံ လုပ်စၟဳစၟတ်လဝ် ဒှ်ကၠုၚ်ရ။
ပရိုၚ်-သြၚ်လောန်တိုၚ်မ်
Photo – Social Media