လှာဒကှ်၊ အံက်တဝ်ပါ ၂၄
ပ္ဍဲတွဵုရးကရေၚ် ပွိုၚ်ဍုၚ်လှာဒကှ် ကရောၚ်ပၞာန်ဒပ်ပၞာန်ဗမာလုပ်စပ်ကၠုၚ် အပ္ဍဲကွာန် ခလေဝ်-တဂေါန်ဒေင်တုဲ ပန်ဖျေံမံၚ်လွဟ်ဇၞော်အဆက်က်ဂှ်ရ ညးဒေသလ္ၚဵုတံဒးအာလဝ်ဘဲဝပ်နွံ တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူကဵု အံက်တဝ်ပါ ၁၉ တေံ ကရောၚ်ပၞာန် ဒပ်ကဝ်မယှေန်ပၞာန်ဝွံ နူကဵုတွဵုရးမန် ပွိုၚ်ဍုၚ်မုဟ်ဍုၚ် ပါၚ်ဂၠံၚ်အၜေတ်ဂှ် အတိုၚ်ဂၠံၚ် အၜေတ်-ပုလိၚ်- တဂေါန်ဒေင် စိုပ်ကၠုၚ်ဇရေၚ် တွဵုရးကရေၚ် ပွိုၚ်ဍုၚ်လှာဒကှ် ဒေသဝင်ယဝ် ကွာန်ခလေဝ်တဂေါန်ဒေင်ရဂှ် တမ်ရိုဟ်ကၞက်ပရိုၚ်ဒေသတံ သ္ဂးရ။
ကရောၚ်ပၞာန်ဒပ်ကဝ်မယှေန်ပၞာန် စိုပ်ကၠုၚ်ကွာန်ခလေဝ်-တဂေါန်ဒေင်တံဂှ် လုပ်ကေတ်လဝ်ဒၞာဲ ပ္ဍဲဗ္ဒိုပ်ဗၠာဲသၟိၚ်ကီု သီုကဵု အပ္ဍဲကွာန်ခလေဝ်ဂှ်လေဝ် လုပ်ကေတ်ဒၞာဲပရးလဝ်ဒပ် နွံမံၚ် ညးဒေသတံသ္ဂးရ။
အဃော ကရောၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ်ကွာန် ပ္ဍဲအံက်တဝ်ပါ ၂၁ အခိၚ်ဖျေံလဝ်ဒပ် ပ္ဍဲကဵုကုန်ကျာ်ဒဵု ဂလဲဂှ် ကၠဟ်ဖျေံပန်စုတ်ဏာ လွဟ်ဇၞော် ပွဳပွူဗ္ဒာဲဗ္ဒာဲတံတုဲ အပ္ဍဲကဵုကွာန် တဂေါန်ဒေၚ် မကမ်ဖတုံခတိုဟ်အာဂှ် ညးဍုၚ်ကွာန် ၂ တၠ ဒးလဝ်ဝပ်နွံ ဂွံတီလဝ်နူ ရိုဟ်ကၞက်ပရေၚ်ပၞာန်တံရ။
အခိၚ်ကရောၚ်ပၞာန် ဒပ်ကဝ်မယှေန်ပၞာန်လုပ်ကၠုၚ်ကွာန်ဂှ် ဟွံဂွံဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတး KNLA တံပုဟ် တမ်ရိုဟ်ကၞက်ပရိုၚ်ဒေသတံ ဟီုရ။
ပ္ဍဲကဵုပွိုၚ်ဍုၚ်လှာဒကှ်ဂှ်တှ်ေ စနူကဵုဂိတုသိပ်တမ်ပါဂှ်တုဲ ကရောၚ်ပၞာန်ဒပ်ကဝ်မယှေန်ပၞာန် လုပ်ဂြးမံၚ်အပ္ဍဲကဵုသ္ကုတ်ဂၠံၚ် ကျာ်မြဟ်-လှာဒကှ် ကေုာံ အကြာဇြပ်ဗု-ကျာ်ပိတံ ကရောၚ်ပၞာန် ထပက်လုပ်ကၠုၚ်တုဲ ဒှ်ကၠုၚ်လဝ်ပေါဲဗတိုက်ကဵု ဂကောံဇြဟတ်ပၠန်ဂတး KNLA တံကီုရ။
ပြဟ်ဟ်ဏံ ဒၞာဲဂၠံၚ်လုပ်တိတ်ပွိုၚ်ဍုၚ် လှာဒကှ်ဂှ် ဒပ်ကဝ်မယှေန်ပၞာန်ဖျေံလဝ်ဒပ် ကၟာတ်ဆိုအ်လဝ်ရောၚ် ဂွံတီလဝ်နူ ရိုဟ်ကၞက်ပရေၚ်ပၞာန်တံရ။
ပရိုၚ်-သြၚ်လောန်တိုၚ်မ်
Photo – Social Media