တနင်သဳ၊ အံက်တဝ်ပါ ၂၄
စိုပ်ကၠုၚ်အခိၚ်မုဟ်ကျာဏံဂှ် ပေါဲဗတိုက် အကြာဒပ်ကဝ်မယှေန်ပၞာန်ကဵု ဂကောံဒပ်ပၠန်ဂတးတံကီု ဟိုတ်နူၜၚ်ကျာထောံဖျေံဗုမ်ကီုတုဲ ပ္ဍဲရးတနၚ်သဳ ဒးဒုၚ်ထောံသ္ၚိဌာန် ပါဲစိုပ်အာဌာန်သ္ၚောဲ လၟိဟ်ရဲဒဴပၞာန် ၈၀၀၀၀ ပြၚ်နွံမံၚ် ဂွံတီနူဂကောံသုတေသန FE5 Thanintharyi ရ။
အပ္ဍဲကဵု ဂိတသိပ်တမ်ပါတေံဂှ်ရ နူကဵုကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ်အပ္ဍဲကွာန်တံကီု၊ ရပ်ဒက်ညးဍုၚ်ကွာန်ကောန် အရာပ်ဓမ္မတာတံတုဲ ဂစိုတ်လဝ်ကီု စံၚ်ပလီုလဝ်သ္ၚိ ပန်ဖျေံကဵုၜၚ်ကျာတံကီု ဟိုတ်တံဏံဂှ်ရ ဒးထောံလဝ်သ္ၚိဌာန်တုဲ ဗွဲမဂၠိုၚ်ဂှ် ဒဴပါဲစိုပ်အာဌာန်သ္ၚောဲတေံရ။
အကြာခရိုၚ်ထဝါဲ ပ္ဍဲကဵုပွိုၚ်ဍုၚ်ထဝါဲ၊ လံၚ်လုၚ်၊ ဍာ်ဗုကဵု တယိတ်ချံၚ် တံဂှ် လၟိဟ်ရဲဒဴပၞာန်စိုပ်အာ ၃၆၈၀၀ တၠပြၚ်အာ သ္ဂးရ။
ပ္ဍဲကဵု ပွိုၚ်ဍုၚ်ပလဝ်၊ ဗိက်၊ တနၚ်သဳ ကဵု ကျောန်သု ခရိုၚ်ဗိက်မ္ဂး ဟိုတ်နူပေါဲဗတိုက်ကဵု ၜၚ်ကျာဖျေံလဝ်ဗုမ်တုဲ ညးဒဴပါဲအာဌာန်သ္ၚောဲ ၄၄၀၀၀ ပြၚ်နွံရ။
ပ္ဍဲကဵုပွိုၚ်ပလဝ်မွဲဟေၚ် ထောံလဝ်သ္ၚိဌာန်တုဲ ညးဒဴပါဲအာ ၂၀၀၀၀ ပြၚ်နွံကၠုၚ်လဝ်တုဲ အပ္ဍဲဏံ ပ္ဍဲကဵုဗ္ဒိုပ် ဒဴပၞာန်ပလဝ်ဂှ် မၞိဟ်ကရပ် ၃၀၀၀ မံၚ်ဒၟံၚ်တုဲ ပ္ဍဲကဵုပွိုၚ်ဍုၚ်တနၚ်သဳမ္ဂး ဟိုတ်နူပေါဲဗတိုက်တ္ၚဲဇမၠိၚ်ကဵု ၜၚ်ကျာဖျေံဗုမ်ဂှ်ရ ညးဍုၚ်ကွာန်ကရပ် ၂၁၀၀၀ အလုံကွာန်မွဲ ဒးဂြိပ်ပါဲဒဴအိုတ်မံၚ်ရ FE5 Thanintharyi သ္ဂးရ။
ဟိုတ်နူဒပ်ကဝ်မယှေန်ပၞာန် ကၟာတ်ဆိုအ်လဝ်နာနာသာ်တံတုဲ ပြဟ်ဟ်ဏံ ရဲဒဴပၞာန် အပ္ဍဲရးဒေသဏံ ဗွဲမဂၠိုၚ်တံဂှ် ဂဥုဲဇဗပိုတ်မံၚ်ကီု ကပေါတ်ရပ်စပ်သုၚ်စောဲ စကာနာနာအိုဿီု ၚုဟ်သၠုၚ်တိုန်အာအိုတ်အစောန် ဒှ်မံၚ်ရ။
တုဲပၠန် ရဲဒဴပၞာန်ဗွဲမဂၠိုၚ်တံဂှ် စၞစသုၚ်ဇွောံမနာနာ၊ ဂဥုဲဇဗသၟးဟွံက ကပေါတ်စကာသုၚ်စောဲနာနာတံ နွံမံၚ်ပၟိက်ဗွဲမဂၠိုၚ်ကီုလေဝ် နူကဵုဂကောံဂၠးကဝ်တံ ပရေၚ်ရီုဗၚ်မွဲသာ်မှ မွဲလှ်ေဟွံကေၚ်ဂွံလဝ်ပုဟ် ညးကဵုမံၚ်အရီုဗၚ်ပါဲဒဴပၞာန်တံ ဟီုရ။
တုဲကၠုၚ်ပ္ဍဲဂိတုအဝ်ဂတ်တေံလေဝ် ပ္ဍဲရးတနၚ်သဳ အကြာပေါဲဗတိုက် ဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံသၟးဟွံက ဟိုတ်နူပၞာန်ဍာ် ပၞာန်ကျာတံ ဗတိုက်မံၚ်တုဲ ညးပါဲဒဴဘဲပၞာန် ဒဵုကဵု ၇၉၈၀၀ ပြၚ် နွံကၠုၚ်လဝ် ဂွံတီရ။
ပရိုၚ်-သြၚ်လောန်တိုၚ်မ်
Photo – နွေဦးမေတ္တာစစ်ဘေးရှောင်ကူညီပံ့ပိုးရေးအဖွဲ့