နေပျဳတဝ် ၊ အံက်တဝ်ပါ ၂၄
သွက်ညးစၞးအလံၚ်အမာတ် လုပ်ပြိုၚ်ပေါဲရုဲမာဲတံ ကၠောန်ပေါဲဟီုတွံကီု အခိၚ်စန်ဒက်တံၚ်မာဲ ကြပ်ကၠုၚ်မံၚ်ဏံဂှ် ညံၚ်ဂွံသၠုၚ်ပတိုန်လဝ်ပရေၚ်ဂီုကၠီု သ္ကိုပ်ဝန်ဇၞော်ကဝ်မယှေန်ပၞာန် ဥူညိုသဝ် ကဵုသတိဟီုဂးဏာရ။
ပ္ဍဲကဵုကောံဓရီု ဂကောံအလဵုအသဳကၟိန်ဍုၚ် ကဝ်မယှေန်ပၞာန်ဂှ် ညံၚ်ဂွံဇြိုဟ်နက်ကဵုပရေၚ်ဂီုကၠီု အပ္ဍဲကဵုကာလပေါဲရုဲမာဲ သ္ကိုပ်ဝန်ဇၞော် ဟီုဂးဏာလဝ် ပ္ဍဲလိက်ပရိုၚ်တြးဝါဒဒပ်ပၞာန်ဗမာတံ ချူလဝ်ရ။
ပ္ဍဲကဵုတွဵုရးမန် သွက်ဂွံကၠောန်အာပေါဲရုဲမာဲမာန်ဂှ် နကဵုလၟေၚ်ဒေသ သၠုၚ်လဝ်ပရေၚ်ဂီုကၠီုတုဲ အပ္ဍဲကဵုပၞော်လုပ်တိတ်ဍုၚ် ဒၞာဲဂိက်သၞေဟ်ကၚ်တံ သၠုၚ်အသိၚ် မာတ်ဆိုအ်စၟဳစၟတ်မံၚ်ဂှ် ဂွံတီလဝ် နူကဵုညးဒေသတံရ။
လပါ်ဒေသ ဂကောံပၠန်ဂတးတံချဳဒရာၚ်မံၚ်ဂှ် ဒပ်ပၞာန်ထ္ၜးဇြဟတ်တုဲ သၠုၚ်လဝ်ပရေၚ်ဂီုကၠီုရဂှ် ညးတာလျိုၚ်ဒပ်ပၞာန်စဵုဒၞာညးဍုၚ်ကွာန် PDF ခရိုၚ်သဓီု ကိုဧမေန်ထောန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ကံၚ်သဳပၞာန်(စကမ) ဍေံတံကၠောန်အာပေါဲရုဲမာဲဟွံလုပ်သၞောဝ်ဏံ ဂၠိုၚ်နူကဵုအခိၚ်ကၠာကၠာတေံ ဖျေံလဝ်ပရေၚ်ဂီုကၠီုနွံမံၚ်။ ဗွဲမဂၠိုၚ် အကြာဍုၚ်မ္ဂး ရဲဂီုကၠီုကယျိုၚ်အရာပ်တံလဝ် နွံမံၚ်။ မွဲပၠန် ပ္ဍဲကဵု ကွာန်ကြပ်မံၚ်ကဵုဂၠံၚ်ကွဳစက်ဇၞော်တံဂှ်တှ်ေ အောပ်မၚ်ကၚ်ဒမၠုက်တံ ဂေတ်မံၚ်ကရောၚ်ပၞာန်တံ ထ္ၜးလဝ်ဇြဟတ်ဗီုတံဏံနွံမံၚ်။ ပေါဲရုဲမာဲကဝ်မယှေန်ပၞာန်ကၠောန်ဏံ လုပ်ဗဗွဲသၞောဝ်ဟွံသေၚ်ပုဟ်။ ဟိုတ်ဂှ်ရ နကဵုနဲကဲစုၚ်စုၚ် ပိုဲတံဒးဗတိုက်သရိုဟ်အာဏောၚ်” သာ်ဝွံ သ္ဂးရ။
ပ္ဍဲကဵုဒဳဇြမ်ပါ ၂၈ ဏံ စကၠောန်အာပေါဲရုဲမာဲသ္ကုတ် ၁ ဂှ် အလုံဍုၚ်မွဲ ၁၀၂ ပွိုၚ်ဍုၚ်သွက်ဂွံစုတ်အာမာဲနွံတုဲ သှ်ေမံၚ် ၁၀၀ ပွိုၚ်ဍုၚ်တံဂှ် နဒဒှ်သ္ကုတ် ၂ အလန်ဒုတိယ ပ္ဍဲကဵုသၞာံတၟိတေံမံက် ဂိတုဂျာန်နဝါရဳ ဘိုအ်ဂွံကၠောန်အာ တော်ခယျလဝ်ရ။
ပ္ဍဲကဵုတွဵုရးမန် အလုံတွဵုရးမွဲဂှ် သွက်ဂွံကၠောန်အာပေါဲရုဲမာဲ ကဝ်မယှေန်ပၞာန်ရန်လဝ်တုဲ နဒဒှ်သ္ကုတ် ၁ ဂှ်တှ်ေ ပ္ဍဲကဵုပွိုၚ်ဍုၚ် ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံကၠောန်ဗ္ဒျ်အာရောၚ်။
ပွိုၚ်ဍုၚ်သှ်ေမံၚ်ဂှ်တှ်ေ ပ္ဍဲကဵုဂိတုဂျာန်နဝါရဳသၞာံဂတး ပေါဲရုဲမာဲ သ္ကုတ် ၂ သွက်ဂွံကၠောန်အာ ဟီုမံၚ်ကီုလေဝ် ညးဍုၚ်ကွာန်တၠဆန္ဒမာဲ ဗွဲမဂၠိုၚ်တံ ဘိုအ်ဂွံအာရံၚ်ဗဵုစရၚ်မာဲဂှ် စိုတ်ဟွံလုပ်စပုဟ်။
“ဆေၚ်စပ်ကဵုပေါဲရုဲမာဲဏံဂှ် ပ္ဍဲကဵုပွိုၚ်ဍုၚ်ရေဝ်ပိုဲ သွက်ဂွံကၠောန်အာ ဂိတုဂျာန်နဝါရဳဟီုကီုလေဝ် ရဲလပါ်ပိုဲဏံ စိုတ်ဟွံလုပ်စပုဟ်။ စပ်ကဵုပရေၚ်ကိစ္စရုဲမာဲတံဟီုတှ်ေ စရၚ်မာဲဒှ်မံၚ်ဗီုလဵုဂှ်လေဝ် ညးဍုၚ်ကွာန်တံ စိုတ်ဟွံလုပ်စပုဟ်။ စနူအခိၚ်လၟုဟ် ပ္ဍဲစရၚ်မာဲ ယၟုဇကုပါဟွံပါ ဟွံအာရံၚ်အိုတ်ပုဟ်ဟီုတှ်ေ စိုပ်အခိၚ်ရုဲမာဲတေံမ္ဂး ဗွဲမဂၠိုၚ်(ညးတၠဆန္ဒမာဲ) တံ အာစုတ်မာဲဟွံသေၚ်ပုဟ်။ ရဲမသကောဒေံအမာတ်(အလံၚ်ညးစၞးအမာတ်) ဆၜိုတ်ပွဳဗွိုၚ်ညးတံ ဗၞတ်ၜိုတ် ၃၀%ဟေၚ် အာစုတ်မာဲမာန် အဲညာတ်” သာ်ဝွံ ညးဒေသပွိုၚ်ဍုၚ်ရေဝ်မွဲတၠ ဟီုရ။
ညံၚ်ဂွံဒှ်ပေါဲရုဲမာဲနွံကဵုသၠးပွး ဗဗွဲဓရ် ဗွဲမအံၚ်ဇၞး သွက်ဂွံကၠောန်ဗ္ဒျ်အာမာန် စပ်ကဵုပေါဲရုဲမာဲအတိုၚ်လၟေၚ်ကမၠောန် အရာကၠးဖ္ဍး သွက်ဂွံဖန်ဇန်ရေၚ်တၠုၚ်အာညိဂှ် သ္ကိုပ်ဝန်ဇၞော်ကဝ်မယှေန်ပၞာန် ဟီုရ။
တုဲပၠန် ပ္ဍဲကဵုပေါဲရုဲမာဲ စကာအာစက်စုတ်မာဲ အဳလက်ထရဝ်နေတ် MEVM ဂှ် ညးဍုၚ်ကွာန်တံ ညံၚ်ဂွံစကာလေပ်မာန် အစဳဇန်ပရေၚ်ကဵုပညာတံလေဝ် သွက်ဂွံဖန်ဇန်ရေၚ်တၠုၚ်အာ ကဵုလဝ်စၞောန် ပ္ဍဲကောံဓရီုဂှ်ရ။
ပြဟ်ဟ်ဏံ စရၚ်ယၟုအလံၚ်ညးစၞးအမာတ် လုပ်ပြိုၚ်ပေါဲရုဲမာဲတံ ဂှ်လေဝ် ဒၞာဲရးဒေသကဵု တွဵုရးကဝ်မယှေန်ပၞာန် ထိၚ်ချုက်လဝ် ပ္ဍဲကဵု ဇၟာပ်ဂကောံပါ် ကဝ်မယှေန်ပွိုၚ်ဍုၚ်ဆေင်စပ်တံ လလောၚ်တြး ကဵုလဝ် တုဲတုဲ မဒှ်ရ။
ပ္ဍဲကဵုတွဵုရးမန် စၠတ်ထဝ်ညးဍုၚ်ကွာန်၊ စၠတ်ထဝ်ကောန်ဂကူကဵု စၠတ်ထဝ်တွဵုရးဟွံက ဒၞာဲဒေသဆန္ဒမာဲ ဂကူကောန်ဍုၚ်အရၚ် ၃ ဒၞာဲ တံမ္ဂး ဗော်ပရေၚ်ဍုၚ်ကွာန် ၉ ဗော်ကဵု ပူဂဵုပုဂ္ဂလညးမွဲဓဝ် ပါလုပ် အပံၚ်ဖအိုတ် အလံၚ်ညးစၞးအမာတ် ၂၅၀ ပြၚ် သွက်ဂွံလုပ်ပြိုၚ်မာဲ မဒှ်ရ။
သွက်အရာဏံ ကၠောန်ပေါဲဟီုတွံကဵု အခိၚ်ကာလသွက်ဂွံတံၚ်ဂြဲမာဲဂှ် စနူအံက်တဝ်ပါ ၂၈ ဒဵုကဵုဒဳဇြမ်ပါ ၂၆ တေံ ကဵုလဝ်အခေါၚ် ပွိုၚ် ၆၀ တ္ၚဲရောၚ် နူကဝ်မယှေန်ပေါဲရုဲမာဲကၟိၚ်ဍုၚ် ကဵုလဝ်သမ္တီနွံရ။
ဆဂး ပရေၚ်စန်ဒက်မာဲ ကောံဇက်ဂၠောဲပြေၚ်ရေၚ်မၞိဟ်တံဂှ် ထ္ၜးဟိုတ်ပရေၚ်ဂီုကၠီုတုဲ နူကဵု ကဝ်မယှေန်ပေါဲရုဲမာဲကၟိန်ဍုၚ် ဟွံကဵုလဝ်အခေါၚ်ကၟာတ်လဝ်ရောၚ် ဗော်ပရေၚ်ဍုၚ်ကွာန်လ္ၚဵုတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပြဟ်ဟ်ဏံ သွက်ပရေၚ်ဂီုကၠီုဂးတုဲ ပ္ဍဲဗ္ဒိုပ်ဗၠာဲသၟိၚ်အကြာကွာန်တံမ္ဂး ပဵုတုဲ ဇြဟတ်ဒးနွံထေက်ဂှ်တုဲ ဒပ်ပၞာန်ထပေၚ်ထပဵုဟလိုၚ်လဝ်ဇြဟတ်နွံမံၚ်ရောၚ် သ္ကိုပ်ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် MSFC နာဲတလနာဲ ဟီုရ။
“သွက်ပရေၚ်ဂီုကၠီုဂးတုဲ ပ္ဍဲအကြာကွာန် ဒၞာဲဗဒိုပ်ဗၠာဲသၟိၚ်တံဂှ် သၠုၚ်ထပဵုလဝ်ဇြဟတ်ၜက်မံၚ် ဂၠိုၚ်နူကဵုဇြဟတ်နွံထေက်ဂှ်ဏီ။ ဆဂး ပ္ဍဲသတ္တဟတုဲဏံ အကာဲအရာ ကရောၚ်ပၞာန် ထပက်နွံမံၚ်။ ပြဟ်ဟ်ဏံ ၜိုတ်ဏံရနွံမံၚ်။ ဒးဟီုမ္ဂး ပ္ဍဲအခိၚ်စန်ဒက်တံၚ်ဂြဲမာဲဏံ မွဲနဲမွဲဗီု လပါ်ဍေံတံ ဘိုအ်ဂွံပလေဝ်စနွံမာန် အဲခယျ” သာ်ဝွံ သ္ဂးရ။
သၟဝ်ဌာနပရေၚ်စဵုဒၞာ MSFC မ္ဂး ဒပ်ပၠန်ဂတးဍုၚ်မန် MSRF ကဵု ဒပ်စဵုဒၞာညးဍုၚ်ကွာန်ဍုၚ်ရေဝ် YPDF တံ ပံၚ်တောဲကဵုဂကောံမဟာမိတ်တံတုဲ ချဳဒရာၚ်မံၚ် ပ္ဍဲကဵုတွဵုရးမန်သၠုၚ်ကျာကဵု ပွိုၚ်ဍုၚ်ဍာ်ဗုရ။
ကံၚ်သဳဖိတ်ဒရေဝ်ဍုၚ်မန်ကီု ဂကောံဇြဟတ်ပၠန်ဂတးတံကီုဂှ် ပေါဲရုဲမာဲကဝ်မယှေန်ပၞာန် တက်ပေါဲအလီရောၚ် ခုတ်စၟတ်လဝ်တုဲ ဒစဵုဒစးဗတိုက်သရိုဟ်အာရောၚ် ဟီုပတိတ်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media