လံၚ်လုၚ်၊ အံက်တဝ်ပါ ၂၅
ပ္ဍဲကဵုရးတနၚ်သဳ ပွိုၚ်ဍုၚ်လံၚ်လုၚ် ကရောၚ်ပၞာန်ဒပ်ကဝ်မယှေန်ပၞာန် ထပက်ကၠုၚ်လဝ်ဂှ် နဒဒှ်ဂဒံၚ်မၞိဟ် ရပ်ကော်ဏာ ညးဒေသ ၅၀ ပြၚ်နွံမံၚ်ရဂှ် ညးတာလျိုၚ်လလောၚ်ပရိုၚ် ဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန်ပၞာန် ဇြဟတ် ၁၀၀ ပြၚ်ဝွံ စနူကဵုံအံက်တဝ်ပါ ၁၉ ဂှ် နူကဵုဂၠံၚ်ဍာ်မွဲအဆံၚ် လုပ်ကၠုၚ်ကွာန်တၟံစိၚ်တုဲ ထပက်မံၚ်ကရောၚ်ပၞာန် ပ္ဍဲကဵုပွဳပွူ သၞေဟ်တဗောအ်၊ ကရၚ်ကျဳကဵု ကွာန်ကာန်ပနဳ တံရ။
အဃောကရောၚ်ပၞာန် ဒပ်ကဝ်မယှေန်ပၞာန် ထပက်ကၠုၚ်မွဲဒမြိပ်ဂှ် အကြာကၠအ်ကီု အကြာဂၠံၚ်ကီု ဆဵုညာတ်အာ ရဲပါဲဒါဲပၞာန် ညးတြုံညးဗြဴ ၅၀ ပြၚ်ၚ် ကောန်ကွာန်တၟံစိၚ်၊ သၞေဟ်တဗောအ်၊ ကရၚ်ကျဳကဵု ကွာန်ကာန်ပနဳတံဂှ် နဒဒှ် ဂဒံၚ်မၞိဟ် ကော်ရပ်ဏာလဝ် မဒှ်ရ။
ဟိုတ်နူ ဒပ်ကဝ်မယှေန်ပၞာန် ထပက်ကၠုၚ်ကရောၚ်ပၞာန် တ္ၚဲအံက်တဝ်ပါ ၂၁ ဂှ် ပ္ဍဲကရပ်ကွာန် ကရၚ်ကျဳကီု၊ အံက်တဝ်ပါ ၂၂ ဂှ် ပ္ဍဲကွာန်ကာန်ပနဳဂှ်ကီု ဒှ်ပေါဲဗတိုက်ကဵု ဒပ်ပၠန်ဂတးတံရ။
ကရောၚ်ပၞာန် ဒပ်ကဝ်မယှေန်ပၞာန်ဏံ ဒဵုကဵုအံက်တဝ်ပါ ၂၃ ဂှ် ဆက်နွံမံၚ် အကြာပွဳဗွိုၚ်ကွာန်ကာန်ပနဳဖိုအ်တုဲ နကဵုဂဒံၚ်မၞိဟ် ကော်ရပ်ဏာလဝ် ညးဒေသ ၅၀ ပြၚ်တံဂှ်လေဝ် ဟွံကလေၚ်ဗလးဖျဴဏီပုဟ် သ္ဂးရ။
ဟိုတ်နူ ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန် ဗီုဏံဂှ်ရ ကောန်ကွာန်တၟံစိၚ်၊ သၞေဟ်တဗောအ်၊ ကရၚ်ကျဳကဵု ကွာန်ကာန်ပနဳ ၃၀၀၀ ပြၚ် ထောံလဝ်သ္ၚိဌာန်တုဲ ဒးဂြိပ်ပါဲအောပ်မံၚ်ဖိုဟ်ရ။
အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi မ္ဂး ပ္ဍဲကဵုရးတနၚ်သဳ ပေါဲဗတိုက်အကြာၜါလွးဏံကီု ၜၚ်ကျာပၞာန်လဝ် ဟိုတ်နူဗတိုက်မံၚ်ကီုတုဲ ထောံသ္ၚိဌာန်တုဲ ညးဒးဂြိပ်ပါဲဒဴမံၚ် ၈၀၀၀၀ ပြၚ် နွံမံၚ် သ္ဂးရ။
ပရိုၚ်-သြၚ်လောန်တိုၚ်မ်
Photo – CJ