ကအ်ကြိက်၊ အံက်တဝ်ပါ ၂၅
ပ္ဍဲတွဵုရးကရေၚ် ပ္ဍဲဂကောံကွာန်မျပတိုၚ် ဒေသသၟဝ်ကျာ ကအ်ကြိက် ကရောၚ်ပၞာန်ဒပ်ကဝ်မယှေန်ပၞာန် ထပက်ကၠုၚ်ဂှ်တုဲ ဒှ်လဝ်ပေါဲဗတိုက်ကု ဒပ်ပံၚ်တောဲ KNLA, KNDO အကြာၜါလ္ပာ် ပေါဲဗတိုက်သ္ကာတ်မြဟ်မံၚ်ရောၚ် တမ်ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲအံက်တဝ်ပါ ၂၃ အခိၚ်နူဂယးဂှ် အကြာကွာန်မျပတိုၚ်ကဵု ကအ်ဖာန်ယာတ်တံ ပေါဲဗတိုက်ၜါလပါ်ဒှ် လအ်အာကဵုနာဍဳနွံမံၚ်တုဲ ရဲလပါ် ဒပ်ကဝ်မယှေန်ပၞာန် ချိုတ်ဂၠိုၚ်မံၚ်ရောၚ် တမ်ရိုဟ်ကၞက်ပရိုၚ်ဒေသတံ သ္ဂးရ။
ပ္ဍဲအံက်တဝ်ပါ ၆ ဂှ် ဒပ်ကဝ်မယှေန်ပၞာန် ကလေၚ်ထိၚ်ချုက်ဂွံအာ ဂၠံၚ် နဗူ-ကအ်ကြိက်တုဲ ကရောၚ်ပၞာန် ဆက်ထပက်အာ လ္ပာ်ကွာန်မျပတိုၚ်၊ ကအ်ဖာန်ယာတ်၊ နံၚ်မဳ၊ ထဳဖိုဝ်သာန်၊ နံၚ်တပေါဲ ဂှ် ဆက်ဒှ်လဝ် ပေါဲဗတိုက်ကဵု ဒပ်ပံၚ်တောဲ KNLA, KNDO တံရ။
ပ္ဍဲအံက်တဝ်ပါ ၂၀ အခိၚ်ဗတမ်ပၠန် ဒေသသၟဝ်ကျာကအ်ကြိက် ပ္ဍဲကွာန်ထဳဖိုဝ်သာန်ဂှ် ၜၚ်ကျာ ဒပ်ကဝ်မယှေန်ပၞာန် ကြဳဖျေံဏာဗုမ် လၟိဟ်မဗွဲမဂၠိုၚ်တုဲ ကရပ်ဘာလကျာ် ဗုမ်ခတိုဟ်အာလဝ်ဂှ်တှ်ေ သ္ၚိဌာန်လ္ၚဵုတံ ပၟတ်တူဆောံလေၚ်အာရ။
‘
ဒပ်ကဝ်မယှေန်ပၞာန်တံဂှ် နူကဵု ကွာန်မျပတိုၚ်၊ ကအ်ဖာန်ယာတ်၊ ထဳဖိုဝ်သာန်တံမွဲအဆံၚ် ဆက်အာကွာန် နံၚ်နိုၚ်၊ ယာန်ကုက်တံတုဲ ဘိုအ်ဂွံဆက်တိုန်အာ ဒၞာဲတာဲဗိုလ်သၟဝ် ဂၠံၚ်တြေံ လ္တူဒဵုဒဝ်နတေံ နွံမံၚ်ရောၚ် တမ်ရိုဟ်ကၞက်ပရိုၚ်ဒေသတံ သ္ဂးရ။
ပ္ဍဲကဵုပေါဲဗတိုက် ဒေသသၟဝ်ကျာကအ်ကြိက်တံဏံဂှ် ဒပ်ကရေၚ်မၚ်ပယျဵု BGF ကဵု ဗိုလ်ဗိ DKBA ပါ်တိတ်တံ ပံၚ်တောဲကဵု ဒပ်ကဝ်မယှေန်ပၞာန်တုဲ ပ္ဍဲကဵုဒၞာဲကွာန် ဒပ်ကဝ်မယှေန်ပၞာန်တံ လုပ်ဖျေံဒပ်မ္ဂး ကၠတ်ဂၠံက်ကေတ်ကပေါတ် သ္ၚိဌာန် ညးဍုၚ်ကွာန် တံကီု သီုကဵုရပ်ကော်ဏာ ညးဒေသလ္ၚဵုလ္ၚဵုတံကီု ဂွံပရိုၚ်ရ။
ဟိုတ်နူပေါဲဗတိုက်တံဏံဂှ် ကောန်ကွာန်ညးဒေသ ကွာန်မျပတိုၚ်၊ ကအ်ဖာန်ယာတ်၊ နံၚ်မဳ၊ မိဖာလေဝ်၊ နံၚ်တပေါဲ၊ လာန်ဗိုၚ်ခိုၚ်တံ ဒၞာဲဗၠးဘဲအန္တရာဲမာန် ဒးဂြိပ်ပါဲမံၚ်အိုတ်တုဲ ဒဵုအခိၚ်တ္ၚဲဏံ ညးတံဟွံဂံၚ်ကလေၚ်စဴ ဒၞာဲသ္ၚိဌာန်ညးတံဏီ ညးဒေသတံ ဟီုရ။
ပရိုၚ်-သြၚ်လောန်တိုၚ်မ်
Photo – CJ