နေပျဳတဝ် ၊ အံက်တဝ်ပါ ၂၅
သမ္မတအမေရိကာန် သွက်ဂွံတိုန်စိုပ် ပ္ဍဲကဵုကောံဓရီုအာသဳယာန် ကဆံၚ်သၠုၚ် မရနုက်ကဵု ၄၇ ဝါဂှ်ကီု လ္တူက္ဍိုပ်သ္ကိုပ်ပၞာန်ဗမာ အခေါၚ်တိုန်စိုပ်ဟၟဲဏံဂှ် စပ်ကဵုပရေၚ်ဍုၚ်ဗမာ ဘိုအ်ဂွံဒှ်ကၠုၚ် အပြံၚ်အလှာဲတၟေၚ် နွံမံၚ်ကီုဟာ ညးဂမၠိုၚ်တံ စိုတ်လုပ်စမံၚ် အိုတ်ရ။
စနူဂိတုအံက်တဝ်ဗာ ၂၆ ဒဵုကဵု ၂၈ ပ္ဍဲကောံဓရီုအာသဳယာန် ကဆံၚ်သၠုၚ် ကၠောန်ဗ္ဒျ်အာ ပ္ဍဲကဵုဍုၚ်ကွာလာလာမ်ပူဏံ က္ဍိုပ်သ္ကိုပ်ပၞာန်ဗမာ မေန်အံၚ်လှိုၚ် ကဵု သမ္မတရတ်ယှာ ပူတေန်တံ တိုန်စိုပ် ဟွံသေၚ်ရောၚ် သ္ကိုပ်ဝန်ဇၞော် မလေဝ်ယှာ အန်ဝါအေဗရာဟေၚ် သ္ပလဝ်ဒတန်ရ။
ပ္ဍဲကဵု ကောံဓရီုအာသဳယာန်ကဆံၚ်သၠုၚ်ဏံ က္ဍိုပ်သ္ကိုပ် ဂကောံဍုၚ်အာသဳယာန်တံသၟးဟွံက က္ဍိုပ်သ္ကိုပ် အမေရိကာန်၊ ကြုက်၊ ဂျပါန်ကဵု အန္ဒိယ နဒဒှ်ဍုၚ် ပံၚ်တောဲတံ တိုန်စိုပ်ကီုရောၚ်။
နူကဵုဍုၚ်ဗမာဂှ် ဌာနဝန်ဇၞော်ပရေၚ်ဍုၚ်သ္အာၚ် ကဝ်မယှေန်ပၞာန် သ္ကိုပ်ဝန်ကေင်ကာလၟိုန် ဥူဟဝ်ခါန်သန် သွက်ဂွံတိုန်ကောံဓရီု နူကဵုအံက်တဝ်ပါ ၂၃ ဂှ် စိုပ်မံၚ် ဍုၚ်မလေဝ်ယှာရ။
အခိၚ်သီအဝဵုတုဲဗွဲကြဴဏံ ပ္ဍဲကဵုကောံဓရီုအာသဳယာန်ကဆံၚ်သၠုၚ်တံ နဒဒှ်ညးစၞးဍုၚ်ဗမာ စွံကဵုလဝ်ခုၚ်သၠးသၠးမွဲမတုဲ ဗွဲကြဴဂှ်ပၠန် ကဵုအခေါၚ်ညးတာလျိုၚ်ဟွံဆေၚ်စပ်ကဵု သွာၚ်ပရေၚ်ဍုၚ်ကွာန်မွဲတၠ တိုန်စိုပ်ရ။
ပ္ဍဲကောံဓရီုအာသဳယာန်ဏံ စပ်ကဵုကိစ္စဍုၚ်ဗမာ၊ ပရူပရာအမေရိကာန် ကံက်အခေါန်သၠုၚ်မံၚ်ဂှ်ကီု၊ စပ်ကဵုပရေၚ်ဂီုကၠီုဒေသတံစွံအဓိကတုဲ ဘိုအ်ဂွံသဳကၠဳအာ ပရိုၚ်ဂၠးကဝ်တံချူထ္မံက်မံၚ်ရ။
ပ္ဍဲအရာသောၚ်ကလးပရေၚ်ဍုၚ်ဗမာဂှ် နူကဵုအာသဳယာန်ဟွံညဳသၟတ်မံၚ်ဏံ မုတၚ်နၚ်လဵု သွက်ဂွံစၟဳစအာဟၟဲတုဲ လ္တူသမ္မတအမေရိကာန် မုဟီုဂးရောဂှ် ဒးမၚ်ရံၚ်အာဏာရောၚ် ညးလ္ၚတ်ပရေၚ်ဍုၚ်ကွာန်ဗမာ ဦးကျဳမျေအ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အာသဳယာန် ပရေၚ်ညဳသၟဟ်ဟၟဲပုဟ်။ နူကဵုအာသဳယာန် မုလေဝ်လ္ပစၟဳညိ။ လ္တူပေါဲရုဲမာဲ တၚ်ဘုံညးဂမၠိုၚ်တုပ်စိုတ်ကဵု ပေါဲရုဲမာဲဏံ ဒှ်ဖဵုအရၚ်ညးဍုၚ်ကွာန်တံဟွံသေၚ်ပုဟ်။ ဟွံကိတ်ညဳမံၚ်ကဵု ညးတံဖျေံလဝ်တၚ်တုပ်စိုတ်ဘုံ ၅ တၚ်ပုဟ် ပတိတ်လိက်လလောၚ်တြးတှ်ေ စၟဳစဂွံမံၚ်အိုတ်စောန်ဏီ။ ဗီုဏံလေဝ်ညဳသၟဟ်ဟွံသေၚ်ပုဟ်။ အလဵုအသဳပၞာန်လေဝ် စွံမံၚ်ဂရုပရေၚ်တံဏံဟွံသေၚ်ပုဟ်။ သမ္မတအမေရိကာန် (ဒဝ်နေဝ်ထရ) မုဟီုဏာရော။ ဒးမံၚ်ရံၚ်အာ လ္တူဏံရသဘဴနွံမံၚ်” သာ်ဝွံ သ္ဂးရ။
ပြဟ်ဟ်ဏံ စပ်ကဵုပရေၚ်ကိစ္စ “ကျာဖျ” လီဠာန်သြန်အန်လာၚ် ပ္ဍဲကဵုပွိုၚ်ဍုၚ်ဗြတဳ တွဵုရးကရေၚ်တံမ္ဂး လ္တူသမ္မတအမေရိကာန် ဗီုလဵုရပ်စပ်အာဂှ်ရ ဘိုအ်ဂွံစၟဳမၚ်စနွံမာန်ရောၚ် ညးဆက်ဟီုရ။
မွဲလပါ်ပၠန် ပ္ဍဲကဵုကၞောတ်သၞာံဏံ နူကဵုကဝ်မယှေန်ပၞာန်သ္ကိုပ်သ္က သွက်ဂွံကၠောန်အာပေါဲရုဲမာဲဏံ လ္တူပလေဝ်ပလေတ်စမံၚ်တံ နူကဵုအာသဳယာန် ဒစဵုဒစးလဝ်ပိုတ်တ်သက္ကုတ်သ္ကုတ်ဟၟဲဏီပုဟ်။
ပ္ဍဲအရာသောၚ်ကလးအာ ပဋိပက္ခဍုၚ်ဗမာမ္ဂး ပေါဲရုဲမာဲဂှ်သွဟ်ဟွံသေၚ်ပုဟ် ဆၜိုတ်ဟီုဂးမံၚ်နွံညိညကီုရ။
ဟိုတ်ဂှ်တုဲ ယဝ်ရပေါဲရုဲမာဲဒှ်အာမ္ဂး ကဝ်မယှေန်ပၞာန်သီအဝဵုဂှ် နဒဒှ်အလဵုအသဳကောန်အရာပ် သွက်ဂွံပြံၚ်သၠာဲအာ ဗီုပြၚ်နွံမံၚ်တုဲ ပါ်ပရအ်ဏာအဝဵုပိတန်ကီုလေဝ် တၞဟ်ခြာဟွံသေၚ်ပုဟ် ညးလ္ၚတ်တံ ထံက်ထ္ၜးမံၚ်အိုတ်ရ။
အလဵုအသဳတၟိတိုန်ကၠုၚ်လဝ် နူကဵုပေါဲရုဲမာဲကဵု ဂကောံအာသဳယာန်တံ ပံၚ်တောဲကၠောန်အာ တၠုၚ်လအာနွံမာန်ကီုလေဝ် အရာပရေၚ်ဍုၚ်ဗမာဂှ် အပြံၚ်အလှာဲတၟေၚ်တိုန်ဟၟဲပုဟ် က္ဍိုပ်သ္ကိုပ်ကွးဘာတြေံ “ကိုမၚ်းသွေးသစ်” ဟီုကဵုဌာန်ပရိုၚ်သြၚ်လောန်တိုၚ်မ်ရ။
“နူကဵုအာသဳယာန်ဂှ်တှ်ေ ညးတံဆက်ပံၚ်တောဲအာကဵု အလဵုအသဳ အရာပ်ဏောၚ် မုကၠောန်အာဏောၚ် ဍုၚ်ဂၠးကဝ်တံဂှ် အာဗီုဗီုဏံရဏောၚ်။ လ္တူသဘဴလစွံစိုတ် ပရေၚ်ပၠန်ဂတး ညးဍုၚ်ကွာန်ပိုဲ လစွံစိုတ်လ္တူတၠအဝဵုပၞာန်တံ ကဵု ပရူပရာညးဍုၚ်ကွာန်စိုပ်မံၚ်ဒဒိုက်ဘဲပကီုပရာတ်နာနာတံ ပရေၚ်ရီုဗၚ်ဂၠးကဝ်တံ စိုတ်လုပ်စအောန်မံၚ်ဏီတုဲ တၠုၚ်လအာဂကောံအာသဳဂှ် လက်ထက်အလဵုအသဳတၟိဏံ ပြံၚ်လှာဲမာန် ဒှ်မာန်ကီုလေဝ် သွက်ပရေၚ်ဍုၚ်ကွာန်ဍုၚ်ပိုဲ ပရေၚ်စသုၚ်မံၚ်စံၚ်ညးဍုၚ်ကွာန်ပိုဲ ကိစ္စပရေၚ်ဂီုကၠီုတံဟီုတှ်ေ ဗွဲတၟေၚ်ပြံၚ်လှာဲအာမာန်ဟွံသေၚ်ပုဟ် ပိုဲညာတ်” သာ်ဝွံ သ္ဂးရ။
ပ္ဍဲကဵုဍုၚ်ဗမာ ဒပ်ပၞာန်သီအဝဵုတုဲ က္ဍိုပ်သ္ကိုပ်ပၞာန် ဂအုပ်သ္ကိုပ်ပၞာန်ဇၞော် မေန်အံၚ်လှိုၚ် တိုန်စိုပ်တုဲ ပ္ဍဲဂတမုက်က္ဍိုပ်သ္ကိုပ် ဂကောံအာသဳယာန် ဂမၠိုၚ် ဒဂေတ်ဗက်အာ တၚ်တုပ်စိုတ်ဘုံ ၅ တၚ်ရောၚ် ပ္ဍဲသၞာံ ၂၀၂၁ ဂိတုအေဗရဴဂှ် ထပက်လဝ်စၟတ်တဲနွံရ။
ပ္ဍဲကဵု တၚ်တုပ်စိုတ်ဘုံ ၅ တၚ်မ္ဂး က္ဍိုပ်သ္ကိုပ်ပရေၚ်ဍုၚ်ကွာန် ဒးဒုၚ်ရပ်လဝ်တံဂှ် ညံၚ်ဂွံကလေၚ်ဗလးပတိတ်ကဵုဂှ်ကီု၊ ပရေၚ်ပကီု ပရာတ် ညံၚ်ဂွံဒေါအ်ထောအ်၊ ညံၚ်ဂွံသဳကၠဳအာကဵု ဂကောံဆေၚ်စပ် သီုဖအိုတ်တံ ကေုာံ သွက်ဂွံကဵုအထံက်ပၚ်ပရေၚ်ဗ္စာရဏာမၞိဟ်တံ ပါလုပ်ရ။
ဆဂး ဥက္ကဌအာသဳယာန်တံဂှ်ရ အလန်ညးကဵုညး ပရေၚ် အပြံၚ်အလှာဲဍုင်မွဲတုဲမွဲ ဒှ်ကၠုၚ်ကီုလေဝ် တၚ်တုပ်စိုတ်ဘုံ ၅ တၚ်ဂှ် နူလပါ် ကဝ်မယှေန်ပၞာန်တံ ထမံက်ရုပ်ရဴဟွံမာန်ဏီရ။
တၚ်တုပ်စိုတ်ဘုံ ၅ တၚ်ဏံဝွံ သွက်အရာဂွံသောၚ်ကလးအာ ပရေၚ်ပဋိပက္ခဍုၚ်ဗမာဂှ် စိုပ်တရဴမာန်ဟွံသေၚ်ကီု နကဵုဂကောံ အာသဳယာန်ပၠန်လေဝ် အကာဲအရာဘိုအ်ဂွံအုပ်ဓလီု ကၠောန်အာမာန်ဟွံသေၚ် ညးလ္ၚတ်တံ ပါ်ပါဲဟီုဂးလဝ်နွံရ။
ပရိုၚ်-သြၚ်လောန်တိုၚ်မ်
Photo – Social Media