သဓီု၊ အံက်တဝ်ပါ ၂၅
ပ္ဍဲတွဵုရးမန် ပွိုၚ်ဍုၚ်သဓီု ပ္ဍဲပေါဲဗတိုက်ဒှ်လဝ် အကြာကွာန်ယေဝေကဵု ချံၚ်သံက်တံဂှ် နူကဵုဒပ်ကဝ်မယှေန်ပၞာန် ရပ်ကော်ဏာလဝ် ကောန်ကွာန်ပိတၠရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုဂိတုအံက်တဝ်ပါ စနူအခိၚ်နူဂယး ၜိုတ် ၁၁ နာဍဳဂှ် နူကဵု ဒပ်ကဝ်မယှေန်ပၞာန် ဇြဟတ်ၜိုတ် ၁၀၀ ထပက်ကရောၚ်ပၞာန် ဒှ်လဝ်ပေါဲဗတိုက်ကု ဒပ်မဟာမိတ်ပံၚ်တောဲဂကောံပၠန်ဂတးတံရ။
အပ္ဍဲကဵုပေါဲဗတိုက်ဏံ ဒပ်ကဝ်မယှေန်ပၞာန်ဗမာဒးဂိအာတုဲ အခိၚ်ကလေၚ်ဆုတ်စဴဂှ် ရပ်ကော်ဏာ ကောန်ကွာန် ယေဝေ ၃ တၠ “မောင်တာနေထူး၊ မောင်ဂွ ကဵု ဦးဖားဒေး” တံ မဒှ်ရ။
ဟိုတ်နူဒပ်ကဝ်မယှေန်ပၞာန်ဗမာ ရပ်ကော်ဏာကောန်ကွာန် ယေဝေ ၃ တၠဏံဂှ်ရ ရဲကၟိန်သ္ၚိဌာန်အိန်ထံၚ်ညးတံ ဂွိၚ်မံၚ်ကဵု ဘဲအန္တရာဲလမျီု ညးတံရ။
အပ္ဍဲကဵုပေါဲဗတိုက်ဏံ ဒပ်ကဝ်မယှေန်ပၞာန်ဗမာ ဟွံအောန်နူ ၅ တၠ ဒးဝပ်ချိုတ်အာနွံတုဲ ရဲလပါ်ဂကောံပၠန်ဂတးဂှ် ကောန်သ္ဂံၚ်မွဲတၠ ဒးအာလဝ်ဝပ်နွံရဂှ် တမ်ရိုဟ်ကၞက်ပရိုၚ် ဒပ်ပၠန်ဂတးတံ ဟီုရ။
ဟိုတ်နူပေါဲဗတိုက်အကြာၜါလွးဏံတုဲကောန်ကွာန် ယေဝေ ၃၀၀ ပြၚ်တံ ဂြိပ်ပါဲတိတ်အာ လပါ်ကွာန် မိချံၚ်အာၚ် ယှိုဲကျီ ယှိုဲယံၚ်ပျ တံနွံ ဂွံတီရ။
တုဲကၠုၚ်အံက်တဝ်ပါ ၂၂ အခိၚ်ဗ္တံဂှ်လေဝ် ပ္ဍဲပွိုၚ်ဍုၚ်သဓီု အကြာသ္ကုတ်ဂၠံၚ် မိုဝ်ကံၚ်-ချံၚ်သံက် ပေါဲဗတိုက်ဒှ်လဝ်ဂှ် ကွဳစက်ဇၞော် ဖ္ဍိုက်ကပေါတ်ဗၞိက်(ဟနိက်) မွဲမ ဒးဘဲလွဟ်ဇၞော် လီုလာ်အာလဝ်နွံရ။
ပရိုၚ်-သြၚ်လောန်တိုၚ်မ်
Photo – CJ