မတ်မလီု ၊ အံက်တဝ်ပါ ၂၈
ပ္ဍဲတွဵုရးမန် ကၠာဟွံစိုပ်တ္ၚဲအလံၚ်ညးစၞးအမာတ်တံ စန်ဒက်မာဲဏီဏံ ဂှ် ကဝ်မယှေန်ပၞာန် သၠုၚ်လဝ်ပရေၚ်ဂီုကၠီုတုဲ ပရေၚ်မာတ်ဆိုအ် စၟဳစၟတ်တံ ကၠောန်အာမံၚ်ဆက်က်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တ္ၚဲအလံၚ်ညးစၞးအမာတ်တံ ဂွံစန်ဒက်မာဲဂှ် စနူအံက်တဝ်ပါ ၂၈ ဒဵုကဵု ဒဳဇြမ်ပါ ၂၆ ပွိုၚ် ၆၀ တ္ၚဲ နူကဵုကဝ်မယှေန်ပေါဲရုဲမာဲကၟိန်ဍုၚ် ခုတ်စၟတ်ကဵုလဝ်ရ။
ဗွဲတၟေၚ် ဒၞာဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်မံၚ် အပ္ဍဲကဵုပွိုၚ်ဍုၚ်ကျာ်ထဝ်၊ ၜဳလေၚ်၊ သဓီုကဵု ပွိုၚ်ဍုၚ်ရေဝ်တံဂှ် ကဝ်မယှေန်ပၞာန်စကာသုၚ်စောဲ သၠုၚ်လဝ်ပရေၚ်ဂီုကၠီု ဗွဲမဂၠိုၚ်တုဲ ပ္ဍဲကဵုပွိုၚ်ဍုၚ် တၞဟ်ဟ်တံဂှ်လေဝ် ထပ်ဟပဵုလဝ်ဇြဟတ်ကီုရ။
အတိုၚ်ညးဒေသတံဟီုလဴမ္ဂး ဒပ်ကဝ်မယှေန်ပၞာန်တံ အခိၚ်ကၠာတေံ ပ္ဍဲကဵုကွာန် ဒၞါဲဟွံကေၚ်ဖျေံလဝ် ကၚ်ဒမၠုက်တံဂှ်လေဝ် လၟုဟ်မ္ဂး ထပဵုဖျေံစွံလဝ်ကၚ်ဒမၠုက်တံတုဲ မၞိဟ်ဟွံသၚ်ကာတံဂှ်တှ်ေ ၜုၚ်တက် ပျဲပျာံလဝ်နွံမံၚ် ဂွံတီရ။
ကဝ်မယှေန်ပၞာန် သၠုၚ်လဝ်ပရေၚ်ဂီုကၠီုဝွံ သၟတ်အပ္ဍဲဒေသတံဂှ်လေဝ် ဟွံထေၚ်မ္ဂး ဗီုဟွံထေၚ် ရပ်ကော်ဏာရဂှ် ညးဒေသ ၜဳလေၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဍေံတံဂေတ်မံၚ်ကဵုကွဳစက်တုဲ ကော်ပတိုန်ဏာဟဂှ်ရဏောၚ်။ သၟတ်တံ ဒးဒုၚ်ရပ်မံၚ်လၟိုန်။ ဒးဒုၚ်ကော်ဏာ။ လပါ်ဒေသပိုဲ သ္ကုတ်တံၚ်သောန်တေံ။ တုဲ ပ္ဍဲကွာန်ကွေန်တေံလေဝ် ဒးဒုၚ်တံၚ်ပဝ်တာနွံ။ ကော်ဏာသာသာယာယာရဏောၚ် ဒပ်ဗၠာဲသၟိၚ်ကဵု ပျူသဝ်ထဳတံ ရပ်မၞိဟ်ဂၠိုၚ်အိုတ်ရ” သာ်ဝွံ သ္ဂးရ။
တုဲပၠန် ပ္ဍဲတ္ၚဲအကြာတံဏံ ဒၞာဲပၞော်လုပ်တိတ်ဍုၚ် သၞေဟ်ကၚ်တံဂှ် စၟဳစၟတ်ဂၠိုၚ်တိုန်၊ အပ္ဍဲလ္တူဍုၚ်ပၠန် ဒၞာဲဟွံထေၚ်ခယျလဝ်တံ ဗက်မာတ်ဆိုအ် ဂၠိုက်ဂၠာဲသၟးဟွံက ဂေတ်ဍုၚ်တုဲ ဗက်ဂၠိုက်ဂၠာဲ စၟဳစၟတ်မံၚ် ဟဂှ်ရ။
ပ္ဍဲကဵုစန်ဒက်မာဲမ္ဂး နကဵုအလံၚ်အမာတ်တံ ပကောံမၞိဟ်ဇက်ဂၠောဲအာကၠုၚ် ကၠောန်အာပရေၚ်စန်ဒက်တံဂှ် ထ္ၜးဟိုတ်ပရေၚ်ဂီုကၠီုတုဲ ဟွံကဵုအခေါၚ် မာတ်လဝ်ရ။
ပ္ဍဲကဵုတွဵုရးမန် ပ္ဍဲကဵုကဝ်မယှေန်ပၞာန် ကၠောန်အာပေါဲရုဲမာဲဏံဂှ် နူကဵုဗော် ၉ ဗော်တံဂှ် အလံၚ်ညးစၞးအမာတ် ၂၅၀ ပြၚ် ပၠုပ်လဝ်စရၚ်တုဲ သွက်ဂွံပြိုၚ်အာပေါဲရုဲမာဲ ပလေဝ်ပလေတ်မံၚ်ရ။
စိုပ်ဒဳဇြမ်ပါ ၂၈ မ္ဂး ပ္ဍဲကဵုကဝ်မယှေန်ပၞာန် ကၠောန်အာပေါဲရုဲမာဲ သ္ကုတ် ၁ ဏံ အပ္ဍဲတွဵုရးမန်ဂှ် ပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ပွိုၚ်ဍုၚ်ကျာ်မြဟ်တံ ဘိုအ်ဂွံကၠောန်အာပေါဲရုဲမာဲ နွံမံၚ်ရ။
ပရိုၚ်-သြၚ်လောန်တိုၚ်
Photo – CJ