ကွာလာလမ်ပူ-အံက်တဝ်ပါ ၂၈
ပ္ဍဲကဵုဂၠးကဝ် အရာဟွံချိုတ်ပၠိုတ်ဟွံကၠးမးတံ ဂၠိုၚ်ကၠုၚ်မံၚ်တုဲ နကဵုအာသဳယာန် ညံၚ်ရဴမွဲဖျုန်မ္ဒးဒတူလိုၚ်အာကီု ဟွံသေၚ်မ္ဂး ဂလာန်ပတေဟ်လ္တူဂၠးကဝ်ကေုာံ အရာပရေၚ်ဆက်စပ်တံ အန္တရာဲမ္ဒးဟောံဗြောံဆောံလေၚ်အာမာန် နွံမံၚ်ရောၚ် သ္ကိုပ်ဝန်ဇၞော်သင်ကာပူ လဝ်ရေတ်သ် ဝေါၚ် ကဵုဏာသတိ ပ္ဍဲအံက်တဝ်ပါ ၂၆ ရ။
ပ္ဍဲကွာလာလမ်ပူ သဘင်သဳကၠဳအာသဳယာန် မရနုက်ကဵု ၄၇ ဝါ တ္ၚဲပထမတုဲ ပ္ဍဲကဵုကောံဓရီုမာတ်တြၚ်ဂှ် နကဵုအာသဳယာန် ပရေၚ်ဖျေံစိုတ်ပတေဟ်စမာန်တံဂှ် မ္ဒးထိၚ်ဒဝ်အာတုဲ ပရေၚ်လညာတ်ပါ်ခြာမံၚ်တံဂှ်လေဝ် အစောန်စရာဲသောၚ်ကလးမာန်နွံကီု ပွမၜိုဟ်လလမ် အကြာကောန်ဂကောံတံဂှ် အစောံထိၚ်ဒဝ်မာန်နွံမံၚ် ဒးထ္ၜးအာရေၚ် ညးဟီုရ။
ပ္ဍဲကဵုလိက်လလောၚ်တြး အံက်တဝ်ပါ ၂၇ မ္ဂး ပြဿနာပရေၚ်ဍုၚ်ကွာန် က္တဵုဒှ်မံၚ်ပ္ဍဲကဵုဍုၚ်ဗမာကီု၊ ပြဿနာတိဍာ်ပယျဵုအကြာသေံ-ခမေန် ဒှ်ကၠုၚ်လဝ်ပြဟ်ဟ်ဏံကီု သီုၜါတၚ်ဏံ ဗွဲမပြဟ်သွက်ဂွံပသောၚ်ကလးမာန် စၟဳစလဝ်ရောၚ် သ္ကိုပ်သန်ဇၞော် ဝေါၚ် ဟီုရ။
ပြဿနာတိဍာ်ပယျဵုအကြာသေံ-ခမေန် ဒှ်ကၠုၚ်လဝ်လအ်လံတုဲ အကြာဗွဝ်စှ်သၞာံဏံ ပ္ဍဲဂိတုဂျူလိုၚ် ပေါဲဗတိုက်ဇၞော်ကဵုဇြဟတ်ဒှ်ကၠုၚ်ဂှ် မၞိဟ် ၄၀ ချိုတ်အာလဝ်၊ ၃ ကိုတ်ပြၚ် ဒးဂြိပ်ပါဲဒဴလဝ်ရ။
နကဵုဥက္ကဌအာသဳယာန် သ္ကိုပ်ဝန်ဇၞော် အန်ဝါ အေဗရာဟေန် လုပ်အကြာပညဳပညပ်တုဲ သွက်ဂွံဒေါအ်ပန်ပှော် တုပ်လဝ်စိုတ် ပ္ဍဲဂျူလိုၚ် ၂၈ ရ။
ပ္ဍဲကဵုကောံဓရီုဗွိုၚ်မ္ၚးအာသဳယာန် အံက်တဝ်ပါ ၂၆ ဂှ် အကြာၜါဍုၚ် ဒှ်မံၚ်ပရေၚ်ဂၠာဲသၞတၚ် ဒၞာဲပယျဵုကယျာန်ဓဝါတ်တံ ညံၚ်ဂွံဒေါအ်အာ၊ ကောန်ပၞာန်ဒးဒုၚ်ရပ်လဝ်တံ ညံၚ်ဂွံကလေၚ်ဗလးကဵု ထပက်စၟတ်တဲတင်တုပ်စိုတ်တံရ။
ပ္ဍဲသၞာံ ၂၀၂၁ သီအဝဵုတုဲဗွဲကြဴဏံ ပၞာန်အပ္ဍဲဍုၚ်ဒှ်မံၚ်ကဵု ဍုၚ်ဗမာဂှ် ပြဟ်ဟ်ဏံ မ္ဒးကဵုဖျူန်ကၠောန်အာ ပရေၚ်ယှအ်ဖျေံပေါဲဗတိုက်မဒှ်တုဲ ညံၚ်သ္ဂောံဂွံအခေါၚ် ကဵုအရီုဗၚ် ပရေၚ်ဗ္စာရဏာမၞိဟ်တံ၊ အလုံသီုညးဖအိုတ်တံပါလုပ်မာန် ပေါဲသဳကၠဳတံ အကာဲအရာညံၚ်ဂွံဒှ်တိုန် မ္ဒးဖန်ဇန်အာရောၚ် သ္ကိုပ်ဝန်ဇၞော် ဝေါၚ် ဟီုရ။
နူကဵုပေါဲသဳကၠဳ လညာတ်သဘဴခိုဟ်တံမွဲအဆံၚ် အကြာဂကောံအဓိကတံ ပညဳပညပ်သဳကၠဳအာတုဲ သွဟ်ဍာ်ဇမၠိၚ်တန်ကြန်မာန်ကဵု ပရေၚ်ၜိုဟ်လလမ် ဍာ်ဇမၠိၚ် ကေတ်ဂွံမာန်ရောၚ် ညးဆက်ဟီုရ။
နူကၠာဟွံကၠောန်ပေါဲရုဲမာဲဂှ် ပရေၚ်အာသဳယာန်တုပ်လဝ်စိုတ် ၅ တၚ်ဂှ် ဍုၚ်ဗမာညံၚ်ဂွံထမံက်အာရုပ်ရဴ ဆက်ဗတုက်ဖအောဝ်လဝ်ရ။
Ref:CNA