နေပျဳတဝ် ၊ အံက်တဝ်ပါ ၂၈
ကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန်တံဂှ် ထပ်ကလေၚ်ပလေဝ်လဝ် နဲကဲဥပဒေ သွက်ဇၟာပ်စၠတ်ထဝ်တံတုဲ စရိတ်စကာသုၚ်စောဲ ပ္ဍဲကဵုပေါဲရုဲမာဲ အလံၚ်အမာတ်မွဲမွဲတံဂှ်လေဝ် ခုတ်စၟတ်သၠုၚ်ပတိုန်လဝ်ရဂှ် ပ္ဍဲကဵုလိက်ပရိုၚ်တြးဝါဒ အလဵုအသဳတံချူလဝ်ရ။
သွက်ဇၟာပ်စၠတ်ထဝ်တံ အတိုၚ်အပ်ပြာပ်ကဵုလဝ် အခေါၚ်အရာ ထမံက်ပရေၚ်ကမၠောန် ဥပဒေပေါဲရုဲမာဲ ၝောံပိုဒ် ၉၀ ဂှ် သုၚ်စောဲစကာတုဲ ပ္ဍဲအံက်တဝ်ပါ ၂၆ ဏံ ကလေၚ်ထပ်ပလေဝ်ဏာ နဲကဲဥပဒေပၠန်ရဂှ် ဥက္ကဌကဝ်မယှေန်မာဲ ဥူတာန်သိုဝ် ထပက်လဝ် စၟတ်တဲ မဒှ်ရ။
ပ္ဍဲကဵု ကလေၚ်ထပ်ပလေဝ်ဏာ နဲကဲဥပဒေ စၠတ်ထဝ်ညးဍုၚ်ကွာန် ကဵု စၠတ်ထဝ်ကောန်ဂကူ အတိုၚ်ၝောံပိုဒ် ၉၉ မ္ဂး အလံၚ်အမာတ် မွဲမွဲတၠ သွက်ပေါဲရုဲမာဲ ဒဵုကဵု ၃၀၀ ကိုတ်ဒကေဝ် စကာသုၚ်စောဲအာ စရိတ်မာန်ရောၚ် ကဵုလဝ်အခေါၚ်ရ။
အတိုၚ်ၝောံပိုဒ်တြေံတေံမ္ဂး သွက်ပေါဲရုဲမာဲ ၜက်အာနူကဵု ၁၅၀ ကိုတ်ဒကေဝ် စကာသုၚ်စောဲစရိတ်ဟွံဂွံဂှ် ထပက်ဏာအဇာတုဲ ထပ်ပလေဝ်ဏာ စရိတ်အိုတ်ပေါဲရုဲမာဲ မဒှ်ရ။
ပၞောဝ်ဗက်အာကဵုအနှေန်ၚုဟ်မး ကပေါတ်သၠုၚ်တိုန်မံၚ်ဂှ် သၠုၚ်ပတိုန်လဝ် စရိတ်အိုတ်ပေါဲရုဲမာဲဒှ်မာန်တုဲ လၟိဟ်သြန် ၜက်အာကဵုနူဏံ စကာရပ်စပ်အာဟွံဂွံပုဟ် ဥက္ကဌဗော်ဒဳမိုကရေက်တေတ် ကောန်ဂကူကရေၚ် မာန်အံၚ်ပျဳသိုဝ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“နကဵုအဲညာတ်ဂှ်တှ်ေ ဗီုလၟုဟ် အနှေန်ၚုဟ်မးကပေါတ်သၠုၚ်တိုန်မံၚ်ဏံဂှ် ဂွံကယျောဝ်ဗက်အာမာန် ညံၚ်ရဴကဵုဏာလဝ်အခေါၚ်ဟာ သ္ၚဳဂၠိပ်ဒးညိညိ။ (သွက်စရိတ်ပေါဲရုဲမာဲအလံၚ်ညးစၞးမွဲမွဲ) ၜိုတ်ညးသ္ပမာန် သုၚ်စောဲအာ။ ဆဂး ၜက်ပြၚ်အာနူကဵု ၃၀၀ ကိုတ်ဟွံဂွံပုဟ်။ ၅၀ ကိုတ်ဒှ်ဒှ် ၁၀၀ ကိုတ်ဒှ်ဒှ် စကာအောန်အာဂွံ။ ကၠာတေံလေဝ် ဗီုဏံရ။ သုၚ်စောဲၜက်အာဟွံဂွံပုဟ်” သာ်ဝွံ သ္ဂးရ။
အတိုၚ်ၝောံပိုဒ် ၉၉ မ္ဂး ပ္ဍဲကဵုရးဒေသဇၞော်၊ တွဵုရးမွဲမွဲ သွက်ညးစၞး အလံၚ်အမာတ်မွဲတၠ ဒဵုကဵု ၃၀၀ ကိုတ်ဒကေဝ် ကဵုအခေါၚ်စကာတုဲ ပ္ဍဲကဵုၝောံပိုဒ် ၉၉ (ခ) မ္ဂး သွက်အလံၚ်အမာတ် ဂကူ ကောန်ဍုၚ်အရၚ်မွဲမွဲတၠဂှ် ဒဵုကဵု ၅၀၀ ကိုတ်ဒကေဝ်ရ စကာသုၚ်စောဲမာန် ကလေၚ်ထပ်ပလေဝ်လဝ်နွံရ။
အတိုၚ်ၝောံပိုဒ်ဏံ ပ္ဍဲကဵုအခိၚ်ကၠာတေံမ္ဂး ၜက်နူကဵုသြန် ၁၅၀ ဒကေဝ်တုဲ စကာသုၚ်စောဲဟွံဂွံကီု သွက်အလံၚ်အမာတ် ဂကူကောန်ဍုၚ်အရၚ်မွဲတၠဂှ် ဒဵုကဵု ၃၀၀ ကိုတ်ဒကေဝ်ရ ကဵုလဝ်အခေါၚ် စကာသုၚ်စောဲ မဒှ်ကီုရ။
ပ္ဍဲကဵုဥပဒေ ပွမ ပတိုန်စၟတ်သမ္တီ ဗော်ပရေၚ်ဍုၚ်ကွာန်ဂမၠိုၚ်ပၠန်လေဝ် ပ္ဍဲကဵုၝောံပိုဒ် (၂၁) “စၞးမအရေဝ် ၁၅၀ ကိုတ်ဒကေဝ်ဂှ် သြန်ဒကေဝ် ၃၀၀ ကိုတ်၊ စၞးမအရေဝ် သြန်ဒကေဝ် ၃၀၀ ကိုတ်ဂှ် သြန်ဒကေဝ် ၅၀၀ ကိုတ် ထပက်အဇာ ပလေဝ်လဝ်နွံရ။
အတိုၚ်ၚုဟ်မးအနှေန်ကပေါတ်တံတိုန်မံၚ်ဏံ နူကဝ်မယှေန် ပြံၚ်လှာဲကဵု စရိတ်အိုတ်ပေါဲရုဲမာဲမဒှ်တုဲ အတိုၚ်ခုတ်စၟတ်လဝ်ဏံ ညံၚ်ဂွံရုံဂပ် ရပ်စပ်စကာအာရောၚ် က္ဍိုပ်သ္ကိုပ်ဗော်မန်တဴတက်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လၟုဟ်ပၠန်လေဝ် အရာရာအိုဿီု အနှေန်ကပေါတ်ၚုဟ်တိုန်မံၚ်တုဲ UEC (စရိတ်အိုတ်ပေါဲရုဲမာဲ) ပြံၚ်ကဵု။ အဲခယျ ဗီုဏံရ။ ပိုဲတံပၠန်လေဝ် (အလံၚ်ညးစၞးမွဲမွဲ စရိတ်အိုတ်) ကဵုစကာ ၁၀၀ တှ်ေ ညံၚ်ဂွံရုံဂပ် ၁၀၀ စကာအာဏောၚ်၊ ကဵု ၃၀၀ တှ်ေ ၃၀၀ လေဝ်။ နွံဗီုဏံရ။ တၞဟ်ဟ်တၚ်တၟေၚ်ဟၟဲ” သာ်ဝွံ သ္ဂးရ။
ကဵုအခေါၚ်စကာစရိတ်အိုတ် သၠုၚ်ပတိုန်လဝ်ဗီုဏံဂှ် သွက်ဗော်စန်ဒက်အလုံကၟိန်ဍုၚ်တံ ကာလစှ်ေပရေၚ်စန်ဒက်မာဲတှ်ေ ဂွံအခေါၚ်စကာ စရိတ်ပဵုဂၠိုၚ်တိုန်တုဲ တင်လပါ်သာတံနွံအာမာန်ရောၚ် ညးလ္ၚတ်ပေါဲရုဲမာဲတံ ပါ်ပါဲရ။
ပၞောဝ်အာကဵု စၠတ်ထဝ်ဆေၚ်စပ်တံဂှ်တုဲ အတိုၚ်ၝောံပိုဒ် ၉၈ (ခ) မ္ဂး သွက်စရိတ်အိုတ်ပေါဲရုဲမာဲ အလံၚ်ညးစၞးမွဲမွဲတံဟီုဂှ် နကဵုသြန်ဇကုဒှ်ဒှ် သြန်ကောန်ဍုၚ်မွဲမွဲတၠ နွံမံၚ်အပ္ဍဲဍုၚ်ဒှ်ဒှ်၊ သြန်ကာန်ပနဳ သြန်အစု ကာန်ပနဳဒှ်ဒှ် ဗွဲမလုပ်သၞောဝ် သြန်ဂွံလဝ်တံဂှ် နကဵုသြန် ကဵုဒါန်ဒှ်ဒှ် သြန်နူကဵုဗော် မဆေၚ်စပ်တံ ထံက်ပၚ်ကဵုလဝ်ဒှ်ဒှ် ဒုၚ်ဖအိုတ်ကဵုလဝ် စရိတ်တံဂှ်ရောၚ် သ္ဂးလဝ်ရ။
မွဲလပါ်ပၠန် သွက်အလံၚ်အမာတ် ညးလုပ်ပြိုၚ်ပေါဲရုဲမာဲတံ ကြပ်ကၠုၚ်မံၚ်ကဵု အခေါၚ်ဟီုတွံကဵု တ္ၚဲစန်ဒက်တံၚ်မာဲတံတုဲ ဆေၚ်စပ်ကဵုနဲကဲဥပဒေ စၠတ်ထဝ်နာနာတံဂှ် ချူခၞံပလေဝ်ကဵုလဝ် မဒှ်ရ။
တ္ၚဲစန်ဒက်မာဲ စနူအံက်တဝ်ပါ ၂၈ ဒဵုကဵု ဒဳဇြမ်ပါ ၂၆ တေံ ပွိုၚ် ၆၀ တ္ၚဲ နူကဵုကဝ်မယှေန်ပေါဲရုဲမာဲကၟိန်ဍုၚ် ခုတ်စၟတ်လလောၚ်ကဵုလဝ်ရ။
ဆဂးဂှ် ပကောံမၞိဟ်တုဲ ဟလောဲမၞိဟ်ဇက်ဂၠောဲ ဂေတ်ဂေၚ်စန်ဒက်မာဲတံဂှ်တှ်ေ ထ္ၜးဟိုတ်ပရေၚ်ဂီုကၠီုတုဲ ကၟာတ်လဝ်အခေါၚ်ရ။
စပ်ကဵုပေါဲဟီုတွံတုဲ နူကဵုဗော်ဟွံဂွံစဳဇန်ဏီကီုလေဝ် ဘိုအ်ဂွံ ပစူတဆိပ်စၟတ်သမ္တီဗော် ပစူဂတဝ်မုက်တံ စဳဇန်ဖန်ဖက်အာရောၚ် မာန်အံၚ်ပျဳသိုဝ် ဟီုလဝ်ရ။
ပ္ဍဲကဵုတွဵုရးကရေၚ် ဒၞာဲဆန္ဒမာဲ ကောန်ဍုၚ်အရၚ်တံကီု ပ္ဍဲကဵုစၠတ်ထဝ်ပိတန်ဂှ်ကီု နကဵုဗော် ဒဳမဝ်ကရေက်တေတ်ကောန်ဂကူကရေၚ် အလံၚ်အမာတ် ၂၆ တၠ ဘိုအ်ဂွံလုပ်ပြိုၚ်အာ မဒှ်ရ။
ပ္ဍဲကဵုကၞောတ်ဂိတုဒဳဇြမ်ပါဏံ စကၠောန်အာပေါဲရုဲမာဲ သ္ကုတ်ကဵုသ္ကုတ်တံမ္ဂး နူကဵုကဝ်မယှေန်ပေါဲရုဲမာဲကၟိန်ဍုၚ် စၟဳစၟတ်လဝ်တုဲ ကဵုလဝ်အခေါၚ်ညးလုပ်ပြိုၚ်မာဲ အလံၚ်ညးစၞး ၄၉၃၀ ပြၚ် နွံမံၚ်ရ။
အပ္ဍဲဏံ အလံၚ်ညးစၞးမွဲတၠဟေၚ်နွံတုဲ ညးဆောပြိုၚ်မာဲဟၟဲ ပ္ဍဲကဵုဒၞာဲဆန္ဒမာဲ ၃၁ ဒၞာဲ ညးသွက်ဂွံဒှ်အမာတ် အလဵုလဵု နွံမံၚ် ၃၁ တၠတံဂှ် နူကဵုဗော်ပျဳခိုၚ်ဖျိုဝ် ဓယံက်ဒပ်ပၞာန်တံ ဂွံလဝ်ဇၞးမာဲ ၂၈ ဒၞာဲတုဲတုဲရ။
အတိုၚ်ကဝ်မယှေန်ပၞာန် ခၞံလဝ်သၞောဝ်ဥပဒေပေါဲရုဲမာဲ အတိုၚ်ၝောံပိုဒ် ၄၁(က) မ္ဂး အပ္ဍဲကဵုဒၞာဲဆန္ဒမာဲ အလံၚ်အမာတ် မွဲတၠဓဝ်ရနွံမံၚ်မ္ဂး ပ္ဍဲကဵုဒၞာဲဆန္ဒမာဲဏံ ဟွံဒးကၠောန်ပေါဲရုဲမာဲ လ္တူပူဂဵု ဏံဝွံ နဒဒှ် အမာတ်စၠတ်ထဝ်ဂွံဇၞးမာဲ ဒးလလောၚ်တြးရောၚ် ချူထမံက်လဝ်နွံရ။
ပရိုၚ်-သြၚ်လောန်တိုၚ်
Photo – MOI