တယိတ်ချံၚ်၊ အံက်တဝ်ပါ ၂၉
ရးတနၚ်သဳ ပ္ဍဲကဵုပွိုၚ်ဍုၚ်တယိတ်ချံၚ် ကရောၚ်ပၞာန်ဒပ်ကဝ်မယှန်ပၞာန် ထပက်ကၠုၚ်တုဲ စံၚ်ပလီုထောံလဝ်သ္ၚိ ၄၀ မပြၚ်ဂှ် ဂွံတီနူကဵု ဒပ်စဵုဒၞာညးဍုၚ်ကွာန် ပွိုၚ်ဍုၚ်တယိတ်ချံၚ်ရ။
ဒပ်ကဝ်မယှေန်ပၞာန်ဗမာ ဇြဟတ်ၜိုတ် ၁၅၀ တံ စနူအံက်တဝ်ပါ ၂၃ တေံဂှ် ပွိုၚ်ဍုၚ်တယိတ်ချံၚ် ပ္ဍဲကဵုကွာန် လဘ၊ သေန်ကျာန်၊ ပိတိုင် အပံၚ်ဖအိုတ် ၅ ကွာန်တံ ၜိုတ်ပွိုၚ်မွဲသတ္တဟ ထပက်လဝ်ကရောၚ်ပၞာန် မဒှ်ရ။
ကရောၚ်ပၞာန်ဏံ ဒးဒုၚ်ကြတ်တတ်ဗတိုက်ဏာ ပ္ဍဲကဵုအံက်တဝ်ပါ ၂၃ တေံဂှ် စံၚ်ထောံကွာန်လဘ သ္ၚိနွံမံၚ် ၁၀၀ မပြၚ်ဂှ်ရ။
ဟိုတ်နူဒပ်ပၞာန် စံၚ်ပလီုထောံဂှ် သ္ၚိ ၄၂ မ ပၟတ်တူလေၚ်ဆောံအိုတ်တုဲ သ္ၚိသှ်ေမံၚ် ၆၀ မပြၚ်တံပၠန်လေဝ် ဒးဒုၚ်ဂၠံက်ဂၟာဲ ဏာလဝ်ကီု ကပေါတ်ၚုဟ်မးနွံတံ ဒပ်ပၞာန်ဗမာကေတ်ဏာသီုဖအိုတ်ရ။
ကရောၚ်ပၞာန်ဒပ်ကဝ်မယှေန်ပၞာန်ဏံ ပ္ဍဲကဵုအံက်တဝ်ပါ ၂၆ ဂှ် ကလေၚ်တိတ်အာ လပါ်ဍုၚ်တယိတ်ချံၚ် သ္ဂးရ။
အခိၚ်ကရောၚ်ပၞာန်လုပ်လဝ်တေံ နူကဵုကွာန် လဘ၊ သေန်ကျာန်၊ ပိတိုင် အပံၚ်ဖအိုတ်ၜိုတ် ၅ ကွာန် ညးဍုၚ်ကွာန် ၂၀၀၀ ပြၚ် ဒးဂြိပ်ပါဲအာအိုတ်တုဲ အခိၚ်ကရောၚ်ပၞာန်ကလေၚ်တိတ်အာဂှ် ကောန်ကွာန်ဗွဲမဂၠိုၚ်တံ ကလေၚ်စဴမံၚ်ပ္ဍဲသ္ၚိဌာန်ညးတံမာန် ဂွံတီရ။
တုဲကၠုၚ်သိပ်တမ်ပါ ၂၈ တေံကီုလေဝ် ပ္ဍဲကဵုပွိုၚ်ဍုၚ်တယိတ်ချံၚ် ကျံက်လှေကာ၊ သဝ်ဖျာ၊ မိုဝ်ယှိုဲကုၚ် သ္ၚိ ၅၀ ပြၚ်တံဂှ် ဒပ်ကဝ်မယှေန်ပၞာန် စံၚ်ပလီုထောံလဝ်နွံ ဂွံတီရ။
ပရိုၚ်-သြၚ်လောန်တိုၚ်မ်
Photo – CJ