နေပျဳတဝ် ၊ အံက်တဝ်ပါ ၂၉
သၟတ်အပ္ဍဲဍုၚ်တံ တိတ်ဍုၚ်မ္ၚးဂၠိုၚ်မံၚ်ရောၚ် က္ဍိုပ်သ္ကိုပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ပ္ဍဲအံက်တဝ်ပါ ၂၇ ကၠောန်လဝ် သဘၚ်ကၞာ ပတိတ်လိက်ဒုၚ်စဳရေၚ် စရၚ်လၟိဟ်မၞိဟ်ကောန်ဍုၚ် ဒၞာဲကဵုနေပျဳတဝ်ဂှ် ဟီုလဝ်ရ။
သၟတ်တံ ဆုဲပြံၚ်တိတ်မံၚ်ဍုၚ်မ္ၚး ဂၠိုၚ်မံၚ်ကီုလေဝ် ဟိုတ်နူဖဵု မွဲအခိၚ်တေံ လၟိဟ်ၜံၚ်ကောန်ဂၠိုၚ်လဝ်ဂှ် လၟိဟ်သၟတ် အဃောအဝဲ ကၠောန်ကမၠောန် ဂၠိုၚ်မံၚ်ဖိုအ်ရောၚ် ကလေၚ်ဗၠအ်ဟီုဏာလဝ်ကီုရ။
ပရေၚ်ပြံၚ်တိတ်ဍုၚ်မ္ၚးတံဝွံ တန်တဴမံၚ်ကဵု အကာဲအရာ ပရေၚ်ပိုန်ဒြပ်မၞိဟ် ဍုၚ်ဇကု၊ ပရေၚ်ဍုၚ်ကွာန်ညိၚ်ဝပ်၊ အခေါၚ်အရာ ကမၠောန်အပ္ဍဲဍုၚ် ကေုာံ ပရေၚ်ဖောအ်ဗြဳတဴတက် ဍုၚ်ဇိုၚ်ဝုတ်ဒိုဟ် ဇကုတံတုဲ သွက်အရာဍုၚ်ဇကု ပရေၚ်ဖောအ်ဗြဳအဓါန်ဂတ ညံၚ်သ္ဂောံနွံ ပတဝ်ဏာလဝ် ကိုန်အစဳဇန် ထိၚ်ပညဳမာန်တံ မ္ဒးဖျေံကၠောန်သ္ပ ဖန်ဇန်အာရောၚ် သ္ဂးရ။
ပရေၚ်သၟတ်တံ တိတ်ဍုၚ်မ္ၚးဂၠိုၚ်တိုန်ဟီုဂှ် ကမၠောန်အပ္ဍဲဍုၚ်ဇကု ဟွံခိုဟ်ကီု၊ ပရေၚ်ဍုၚ်ကွာန်ဟွံညိၚ်ဝပ်ကီု၊ စရိတ်သြန်ဂိတုအောန်ကီု ပရေၚ်ဂီုကၠီုဟၟဲသၟးဟွံက ကော်ဟပၠုပ်မံၚ် ယိုက်ဝန်ပၞာန်တံရဒှ်မံၚ် ညးချဳဒရာၚ်မံၚ် ပရေၚ်သၟာကမၠောန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“သၟတ်တံ တိတ်ဍုၚ်မ္ၚးဂၠိုၚ်တိုန်ဟီုဂှ် ကမၠောန်နွံမံၚ်အပ္ဍဲဍုၚ် ဟွံခိုဟ်လဝ်ပါမွဲတၚ်ကီု၊ ပရေၚ်ဍုၚ်ကွာန် ဟွံညိဝပ်ပုဟ်။ ဒၞာဲဒေသကမၠောန်နွံမံၚ်ဂှ်လေဝ် မံၚ်တန်တဴအာဟွံဂွံ ကိစ္စဏံလေဝ်ပါမံၚ်။ ဒၞာဲကမၠောန်နွံပၠန်လေဝ် ကမၠောန်ဟွံခိုဟ်ပုဟ်။ ကမၠောန်နွံပၠန်လေဝ် စရိတ်သြန်ဂိတုအောန်ကွေံကွေံ။ မွဲတၚ်ပၠန် ဟိုတ်နူကော်ထပၠုပ်လုပ်ပၞာန်တံလေဝ်ပါမံၚ်” သာ်ဝွံ သ္ဂးရ။
သွက်သၟတ်တံ ဂုဏ်ဖဵုဂွံနွံ ဓလိုက်ကဵုတမ်ရိုဟ်မာန်မ္ဂး ပ္ဍဲအနာဂတ် ဂုဏ်ဖဵု လာဘ်လၟိဟ်မၞိဟ်တံဂှ် ကေမ်ဇျှာပ်ဂွံအာမာန်တုဲ ဟွံရံၚ်စံၚ် ပရေၚ်သၟတ်တံ ယဝ်ရသ္ပလဝ်မတ်ဇျှဟ်မ္ဂး ဇြိုၚ်ကၠုၚ်ကဵုလျိုၚ်မၞိဟ် တံကီု ပရေၚ်ညိၚ်ဝပ်ၜိုဟ်သြိုဟ်အောန်အာတုဲ အကာဲအရာ ပရအ်အိုတ်ဂှ် နဒဒှ် ဘဲအန္တရာဲဆေၚ်စပ်ကဵု လၞိဟ်မၞိဟ်ဂၠိုၚ် က္တဵုဒှ်အာမာန်ရောၚ် သ္ဂးရ။
လၟိဟ်သၟတ်ဆုဲပြံၚ်တိတ်ဍုၚ်မ္ၚးတံ ဂွံဂၠိုၚ်မံၚ်ဂှ် ဟိုတ်နူ ကဝ်မယှေန်ပၞာန် တံၚ်ပဝ်တာတုဲ အနာဂတ်သၟတ်တံ ကၠေံအာဂှ် တိတ်မံၚ်ဍုၚ်မ္ၚးဂၠိုၚ်တိုန် သၟတ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အဓိက ပြဿနာ သၟတ်ပိုဲဒှ်မံၚ်ဂှ်တှ်ေ ဖေက်ရပ်ပဝ်တာတုဲ တိတ်အာရ။ အနာဂတ်သၟတ်တံဏံ ကၠေံအာ။ အတိုၚ်ဏံရပ်မံၚ်ပဝ်တာ ကၠောန်အာမံၚ်ဗီုဏံရတှ်ေ မုဒှ်အာမာန်ရော ဗွဲကြဴဏံ သၟတ်အယုက်ပေၚ်တံဂှ် စိုပ်အာဍုၚ်မ္ၚးအိုတ် တုဲပၠန် စိုပ်အာတိဍာ်ဗၠးၜးတံ မုတံနွံကီု” သာ်ဝွံ သ္ဂးရ။
တုဲပၠန် အကာဲအရာပြဟ်ဟ်ဏံမ္ဂး အခက်အခုဲကမၠောန် အပ္ဍဲဍုၚ်ကီု၊ ပြဿနာ သြန်လုပ်သြန်တိတ် ဟွံညဳသၟဟ်ကီု၊ ကောန်ထပၠုပ်ကောန်ပၞာန် အတေၚ်အဓ္ဓမဟွံက ပရေၚ်အခက် အခုဲနာနာသာ်တုဲ သၟတ်ဗွဲမဂၠိုၚ်တံ ဟွံမိက်ဆက်မံၚ်အပ္ဍဲဍုၚ်ကီု ဂွံဆဵုမံၚ်ဂှ် ညးဆက်ဟီုရ။
ပ္ဍဲကဵုစရၚ်တၚ်နၚ်လၟိဟ်မၞိဟ် သၞာံ ၂၀၂၄ ပြဟ်ဟ်ဏံမ္ဂး အပ္ဍဲကဵုဗွဝ်စှ်သၞာံဏံ လၟိဟ်မၞိဟ်အပ္ဍဲဍုၚ် ယအ်စှ်ေအာဂွံဆဵုလဝ် ဟီုကီုလေဝ် လၟိဟ်မူစိအောန်ယအ်စှ်ေအာဂှ် ဟီုဗတိတ်လဝ်ဟၟဲဏီ။
အတိုၚ်ဗီုလၟုဟ်ဏံ လၟိဟ်မၞိဟ်တံယအ်စှ်ေအာဂှ်တှ်ေ ဟိုတ်နူ လၟိဟ်ၜံၚ်ကောန် အောန်စှ်ေအာကီု၊ ပရေၚ်ဆုဲပြံၚ်ဒၞာဲ ဂၠိုၚ်တိုန် ကေုာံ ဗီုပြၚ်ကၟိန်အိန်ထံၚ်တံ မံၚ်စံၚ် ပြံၚ်သၠာဲအာမဒှ်တုဲ ပရေၚ်တံဏံဂှ် တၚ်ကော်ဆောကီု အခေါၚ်အရာမွဲကီု စွံလဝ်သမ္တီမာန်မံၚ် က္ဍိုပ်သ္ကိုပ် ကဝ်မယှေန်ပၞာန် သ္ဂးလဝ်ရ။
အတိုၚ်စရၚ်လၟိဟ်မၞိဟ် သၞာံ ၂၀၂၄ ကဝ်မယှေန်ပၞာန်မ္ဂး သီုကဵုဒၞာဲဒေသ ကံက်လဝ်စရၚ်ဟွံဂွံတံ လၟိဟ်မၞိဟ်ချိၚ်ဆကေတ်လဝ် ၁၉ ဒဿမ ၂ ပြကောတိကိုတ်လေဝ်ပါလုပ်မံၚ်တုဲ သရောပ်ထောံ လၟိဟ်မၞိဟ်ကောန်ဍုၚ်ဗမာမ္ဂး နွံမံၚ် ၅၁ ဒဿမ ၄ ပြကောတိကိုတ် မဒှ်ကီု စပ်ကဵုညးဆုဲပြံၚ်တိတ်အာဍုၚ်မ္ၚးတံဂှ် လၟိန်ကောန်ဍုၚ်ဗမာ နွံမံၚ် ၁ ဒဿမ ၁၂ ပြကောတိကိုတ်ပြၚ် သ္ဂးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media