လ္ဂုၚ်၊ အံက်တဝ်ပါ ၂၉
ဂကောံပၞာန်တံ ကၠောန်အာပေါဲရုဲမာဲဏံ ဒဒှ်ရဟွံလုပ်သၞောဝ်ကီု ဍုၚ်ဂၠးကဝ်တံ ဟွံသ္ပစၟတ်သမ္တီကီု သွက်ဂွံပံၚ်တောဲ လလောၚ်တြးအာဂှ် ကမ်မတဳကေၚ်ကာဗဟဵုဗော် NLD အာတ်မိက်ဏာ ဍုၚ်ဂၠးကဝ်တံရ။
ပ္ဍဲကဵု “တၚ်လလောၚ်တြးပရိုၚ် စပ်ကဵုပေါဲရုဲမာဲ ၂၀၂၀ လုပ်မံၚ် ဗဗွဲသၞောဝ်ဏီ ကေုာံ အကာဲအရာဍုၚ်ဗမာလၟုဟ်” ဂှ် အာတ်မိက်ဏာလဝ် မဒှ်ရ။
နကဵုဍုၚ်ဂၠးကဝ်တံဂှ် သွဟ်ပေါဲရုဲမာဲဂကောံပၞာန် ဟွံလုပ်သၞောဝ်ဂှ် ညံၚ်ဟွံသ္ပစၟတ်သမ္တီ ကေုာံ နူကဵုပေါဲရုဲမာဲဏံ ဂကောံတၟိ မံက်တိုန် တံဂှ်လေဝ် ညံၚ်ဟွံဂွံပံၚ်တောဲ ကၠောန်အာကီု လ္ပကဵု ပရေၚ်ထံက်ပၚ်ကီု ပရေၚ်မာတ်ဆိုအ်ဍုၚ်ဂၠးကဝ်တံ သွက်ဂွံဆက်စွံလဝ်ပၠန် NLD ဗတိုက်ဖအောဝ်လဝ်ရ။
တုဲပၠန် နကဵုပွဳဗွိုၚ်ဍုၚ်ဂၠးကဝ်တံဂှ် ညံၚ်သ္ဂောံစွံအဲပရဲသ္ပစၟတ်သမ္တီ ဆန္ဒဍာံညးဍုၚ်ကွာန်တံကီု ပေါဲရုဲမာဲအလီ ကဝ်မယှေန်ပၞာန် ကၠောန်မံၚ်ဂှ် ညံၚ်ဟွံဂွံကဵုအထံက်ပၚ် ဆေၚ်စပ်နဲကဲပညာကဵု သြန်တံကီု လ္ပဗလးနၚ် ညးမၚ်လ္ၚတ်ရံၚ် ပေါဲရုဲမာဲကီု ဗတိုက်ဖအောဝ်လဝ် မဒှ်ရ။
နူကဵုဂကောံပၞာန် ပလေဝ်စလဝ် ဗွဲအဓ္ဓမ သွက်ဂွံကၠောန်အာပေါဲရုဲမာဲအလီဂှ် ပတဝ်ဏာလဝ် ဍုၚ်ဗမာညံၚ်ဂွံဒကးပြးအာ၊ ပဋိပက္ခတံဟေၚ် ဘိုအ်ဂွံဂၠိုၚ်တိုန်ရနွံတုဲ နကဵုဗော် NLD ဟွံဒုၚ်တဲ ဟွံသ္ပစၟတ်သမ္တီ၊ ပံၚ်တောဲရေၚ်တၠုၚ်အာ ဟွံသေၚ်ပုဟ် လလောၚ်တြးရ။
ပ္ဍဲကဵုကဝ်မယှေန်ပၞာန်ကၠောန်အာ ပေါဲရုဲမာဲအလီဏံ ဟွံဂွံအခေါၚ် ထမံက်ထ္ၜးဆန္ဒ ဗွဲမသၠးပွးကီု အခေါၚ်စန်ဒက်၊ ချဳဒရာၚ်ပရေၚ်ဍုၚ်ကွာန် ညိလေဝ်ဟၟဲကီု၊ အခိၚ်ညးပါဲဒဴဘဲပၞာန်နွံမံၚ် ၃ ဒဿမ ၆ ပြကောတိကိုတ်ပြၚ်ဏံဂှ် ကၠောန်ပေါဲရုဲမာဲကီု၊ မွဲအလုံဍုၚ် ပ္ဍဲကဵုဒၞာဲပိဂအုံမွဲဂအုံရ ကၠောန်ပေါဲရုဲမာဲမာန်ကီု၊ နူကဵုပေါဲရုဲမာဲသ္ကုတ်ပထမ ပ္ဍဲကဵုစၠတ်ထဝ်မံက်တိုန်ဂှ် ညးစၞး ဒပ်ပၞာန်ကဝက်ပြၚ်ပါလုပ်မံၚ်တုဲ သ္ပစၞးညးဍုၚ်ကွာန်တံ ဟွံမာန်ပုဟ် NLD ထံက်ထ္ၜးလဝ်ရ။
နူကဵုပေါဲရုဲမာဲ ၂၀၂၀ တေံ ရုဲစှ်ပတိုန်လဝ်ကဵု ဗော်ဇၞးလဝ်မာဲ ဥက္ကဌဗော် NLD၊ ပူဂဵုကဵုကသပ်ဍုၚ်၊ ဝန်ဇၞော်ဍုၚ်သ္အာၚ် ဒဝ်အံၚ်သာန်သုကျဳ ကေုာံ ဒုဥက္ကဌဗော် သမ္မတဍုၚ် ဥူဝေန်မျေအ် တံကဵု ကောန်ထံၚ်ပရေၚ်ဍုၚ်ကွာန်သီုဖအိုတ်တံ သွက်ဂွံဗၠးၜး ရေၚ်တၠုၚ်ကဵုညိဂှ် ဗော် NLD အာတ်မိက်လဝ်ရ။
ပရိုၚ်-သြၚ်လောန်တိုၚ်မ်
Photo – MOI