မတ်မလီု ၊ ဒဳဇြမ်ပါ ၄
ပ္ဍဲကဵုတွဵုရးမန် ၜိုန်ရ ကြပ်ကၠုၚ်ကဵု အခိၚ်ပေါဲရုဲမာဲကီုလေဝ် ညံၚ်ဂွံထပ်ဂၠာဲထပေၚ်ကဵု ကောန်ပၞာန်တၟိပၠန်ဂှ် ကဝ်မယှေန်ပၞာန် ထပ်ကဵုမံၚ် ဇြဟတ်ဟရိုဟ်ရ သ္ကိုပ်အုပ်ဓုပ် ဟွံမိက်ထမံက်ယၟု မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်ဂွံပံက်အာ ဘာယိုက်ဝန်ပၞာန် လၟေၚ် ၂၀ ပ္ဍဲကဵုဂိတုဏံဂှ် ညံၚ်ဂွံထပ်ပလံၚ်နၚ်ကဵု ကောန်ပၞာန်တၟိတံပၠန်ဂှ် ကဝ်မယှေန်ပၞာန် ထပ်ကဵုမံၚ်ဇြဟတ်ဟရိုဟ်ကဵု သ္ကိုပ်အုပ်ဓုပ်ကွာန်/အရာပ် မဆေၚ်စပ်တံ မဒှ်ရ။
သွက်ဂွံယိုက်ဝန်ပၞာန် ပ္ဍဲဂိတုဏံ မွဲကွာန်မ္ဂး ကောန်ပၞာန်တၟိမွဲတၠ ဟွံကဵုဟွံဂွံ ညံၚ်ဂွံပလံၚ်နၚ် ကဵုမံၚ်ဇြဟတ်ဟရိုဟ်တုဲ သ္ကိုပ်အုပ်ဓုပ် ပလံၚ်ကောန်ပၞာန်တၟိ ဟွံမာန်တံမ္ဂး ဒးဒုၚ်ကေတ်အရေဝ်ဏောၚ် သ္ကိုပ်အုပ်ဓုပ် ဟွံမိက်ထမံက်ယၟု မွဲတၠ သ္ဂးရ။
ဒဒှ်ရ သ္ကိုပ်အုပ်ဓုပ် ပလံၚ်ကောန်ပၞာန်တၟိဟွံမာန်တံ ဒးဒုၚ်ကေတ် အရေဝ်ဏောၚ် တုဲကၠုၚ်အကြာတ္ၚဲတံဏံဂှ်ရ ကဝ်မယှေန်ပၞာန် ကဵုထပက်လဝ်စၟတ်တဲ ဒုၚ်ဝန်နွံမံၚ်ရောၚ်ဂှ် စၟဳစၟတ်ဂၠိုက်ဂၠာဲ ဂွံတီလဝ် ကီုရ။
ညံၚ်ဂွံပလံၚ်နၚ်ကဵု ကောန်ပၞာန်တၟိယိုက်ဝန်ပၞာန်ဂှ် ဟိုတ်နူ ကဝ်မယှေန်ပၞာန်ကဵုမံၚ်ဇြဟတ်ဟရိုဟ်တုဲ လ္တူသၟတ် အရာပ် လ္ၚဵုဂှ်တှ်ေ ကော်ကေတ်ကဵုလိက်အမိၚ်ရုၚ်ကေုာံ စဳဇန်မံၚ် သွက်ဂွံဂၠံက်ကေတ်မာဲလေဝ်နွံ သ္ဂးရ။
ဆဂး သ္ကိုပ်အုပ်ဓုပ်အရာပ်/ကွာန်လ္ၚဵုလ္ၚဵုတံဂှ်တှ်ေ သွက်ကောန်ပၞာန်တၟိ ယိုက်ဝန်ပၞာန်မွဲတၠမ္ဂး နူကဵုသြန် ၅၀ ကိုဋ် ဒကေဝ် ဒဵုကဵု ၁၀၀ ကိုဋ် ဗက်ရာန်ကေတ်ကဵုသြန်လေဝ်နွံမံၚ် မဒှ်ရ။
မွဲလပါ်ပၠန် သၟတ်ဖံက်ပကဝ်မံၚ် အမိၚ်ဒေသန္တရတံဂှ်ရပ်ကေတ်တုဲ ကဝ်မယှေန်ပၞာန် ပလံၚ်ကဵုမံၚ်သွက်ယိုက်ဝန်ပၞာန်လေဝ် နွံမံၚ်ရ။
ဒၞာဲတွဵုရးမန် ကဝ်မယှေန်ပၞာန် ထိၚ်ချုက်လဝ်တံဂှ်တှ်ေ ပံက်မံၚ်ဘာယိုက်ဝန်ပၞာန် လၟေၚ်ဂိတုအဆက်က်မာန်ကၠုၚ်တုဲ ကောန်ပၞာန်တၟိတံ စှ်ေကၠုၚ်ဘာဟွံဂတာပ် မွဲအလန်ဓဝ် ပလံၚ်ဗစိုပ်ဏာ မုက်ပၞာန်တေံ မဒှ်ရ။
အတိုၚ်ဌာန်ပရိုၚ်သြန်လောန်တိုၚ်မ် ပကောံဂွံလဝ်တၚ်နၚ်မ္ဂး ပ္ဍဲကဵုတွဵုရးမန် ကဝ်မယှေန်ပၞာန် ပံက်လဝ်ဘာယိုက်ဝန်ပၞာန် နူကဵုလၟေၚ် ၁ ဒဵုစိုပ်လၟေၚ် ၁၉ ဂှ် သၟတ်ဒေသတံ ဟွံအောန်နူကဵု ၃၅၀၀ ဒးဒုၚ်ပကောံလဝ်ကောန်ပၞာန်တၟိတံ နွံရ။
ပရိုၚ်-သြၚ်လောန်တိုၚ်မ်
Photo – MOI