ရေဝ်၊ ဂျာန်နဝါရဳ ၁၁
တွဵုရးမန် လ္တူဂၠံၚ်ဇၞော်ကၟိန်ဍုၚ်စၟတ် (၈) ပ္ဍဲအကြာသ္ကုတ်ဂၠံၚ်ရေဝ်-ဇြပ်ဗု ဒပ်ပၠန်ဂတးမန်တံ ဗက်လုပ်စၟဳစၟတ်မံၚ်ရောၚ် ကံၚ်သဳဖိတ်ဒရေဝ်ဍုၚ်မန် MSFC လလောၚ်တြးလဝ် ပ္ဍဲဂျာန်နဝါရဳ ၉ ရ။
ဒပ်ပၠန်ဂတးဍုၚ်မန် MSRF နွံသၟဝ်တဲပရေၚ်အုပ်ဓုပ် MSFC ၊ ဒပ်စဵုဒၞာညးဍုၚ်ကွာန်ရေဝ် YPDF ကေုာံ ဒပ်ဗၠာဲသၟိၚ်ရာမညတံ ပံၚ်တောဲထမံက်မံၚ်ရုပ်ရဴရ။
ဗက်စၟဳစၟတ်လဝ် ကွဳစက်ယာန်ကဵုကွဳလိုန်ဓါတ် အာမံၚ်လ္တူဂၠံၚ်ဇၞော်တံကီု၊ စၟဳစၟတ်လိက်ဆေင်စပ်နာနာတံ၊ ကပေါတ်သွက်ဂွံဒှ်ဘဲအန္တရာဲ ပရေၚ်ဂီုကၠီုပါဟွံပါ စၟဳစၟတ်လဝ်ရောၚ် ပ္ဍဲလိက်လလောၚ်တြး ချူလဝ်ရ။
တုဲပၠန် ညးဍုၚ်ကွာန်တံ ညံၚ်ဂွံဒဂတ်ဗက်စေဝ်ပၞောန်ဂၠံၚ်ဍာန်ကီု အကာဲအရာဟွံသင်ကာ ယဝ်ရဆဵုညာတ်မ္ဂး ညံၚ်ဂွံပလံၚ်ပရိုၚ်ကဵုညးတာလျိုၚ်တံကီု ကဵုပညာဟီုဂးလဝ်သ္ဂးရ။
ပ္ဍဲကဵုဒေသ သွက်ဂွံညိၚ်ဝပ်ၜိုတ်သြိုဟ်ကေုာံ စွံအဓိကကဵုပရေၚ်ဂီုကၠီုညးဍုၚ်ကွာန်တံတုဲ သွက်ဂွံဆက်ကၠောန်အာ ပရေၚ်ဗက်စၟဳစၟတ် နကဵုအခိၚ်ကာလအပိုၚ်အခြာရောၚ် ကံၚ်သဳဖိတ်ဒရေဝ်ဍုၚ်မန် MSFC ကဵုလဝ်သမ္တီရ။
ပ္ဍဲအကြာသ္ကုတ်ဂၠံၚ်ရေဝ်-ဇြပ်ဗု ဒပ်ပၠန်ဂတးမန်တံဗက်လုပ်စၟဳစၟတ်မံၚ် ပွိုၚ်ဍုၚ်ရေဝ်ကဵုပွိုၚ်ဍုၚ်ဇြပ်ဗုဂှ် ပ္ဍဲနူတနေံတေံ ကၠောန်လဝ်ပေါဲရုဲမာဲသ္ကုတ် ၂ တုဲဒှ်အာရ။
အခိၚ်သွက်ဂွံကၠောန်ပေါဲရုဲမာဲသ္ကုတ် ၂ ဏံဂှ် နူကဵုကဝ်မယှေန်ပၞာန် ဖျေံစွံလဝ် ဇြဟတ်ပရေၚ်ဂီုကၠီု ပ္ဍဲကဵုၜါပွိုၚ်ဍုၚ်ဏံတုဲ အပ္ဍဲဍုၚ်ကီု ဗွိုၚ်မ္ၚးဍုၚ်ကီု ဗက်မာတ်ဆိုအ်စၟဳစၟတ်မံၚ်ကွေံကွေံရောၚ် ညးဒေသတံဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – MSFC