မတ်မလီု ၊ ဂျာန်နဝါရဳ ၁၁
ပ္ဍဲကဵုတွဵုရးမန် အခိင်ကာလကၠောန်ပေါဲရုဲမာဲဏံ ကဝ်မယှေန်ပၞာန်ပကောံမံၚ်ကောန်ပၞာန်တၟိယိုက်ဝန်ပၞာန် သွက်ဂွံပံက်ဘာပၞာန်လၟေၚ် ၂၁ ဆက်နွံမံၚ်ရောၚ်ဂှ် ညးဒေသတံကဵု ဂကောံအုပ်ဓုပ်ဟွံမိက်ထမံက်ယၟု ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျာန်နဝါရဳ သတ္တဟဒုတိယဏံ ကဝ်မယှေန်ပၞာန်စဳဇန်လဝ် သွက်ဂွံပံက်အာဘာပၞာန်လၟေၚ် ၂၁ နွံမံၚ်တုဲ သွက်ဂွံတိုန်တန်ဗတောန်ဏံ နဲလဵုဂွံဂွံနဲဂွံမာန်ဂှ် ဗက်ဂၠာဲပကောံမံၚ်ကောန်ပၞာန်တၟိတံရ။
ပ္ဍဲကဵုပကောံမံၚ်ကောန်ပၞာန်တၟိတံဂှ်တှ်ေ လိင်ကေတ်သၟတ်တံလေဝ်နွံ သၟတ်တိတ်မ္ၚးအခိၚ်ဗ္တံတံဂှ် ဗက်ရပ်ကေတ်နွံ၊ ညးတြုံၜါတၠဍိုက်မွဲကွဳလိုန်ဓါတ်ကီု၊ ဗက်တံၚ်ကေတ်ပဝ်တာတုဲ ရပ်ကေတ်လဝ်ရ။
သွက်ဂွံတိုန်အာဘာပၞာန်လၟေၚ် ၂၁ ဂှ် နူကဵုဒပ်ကဝ်မယှေန်ပၞာန် အာတ်မိက်လဝ်ကောန်ပၞာန်တၟိနွံတုဲ နဲဂွံမာန်ဂှ် ဒးဗက်ဂၠာဲကဵုလဝ်နွံမံၚ် ရဲဂကောံအုပ်ဓုပ်ဟွံထမံက်ယၟုမွဲတၠ ဟီုရ။
“ဘာပၞာန်ဂှ် ဍေံတံဆက်ပံက်အာမံၚ် အတိုၚ်လၟေၚ်ဍာံရ။ ပေါဲရုဲမာဲနွံဟဍေံ မုနွံနွံ လၟိဟ်ဍေံတံအတိုၚ်ခုတ်စၟတ်လဝ် ညံၚ်ဂွံပေၚ်ဂှ် အာတ်လဝ်သ္ကိုပ်အုပ်ဓုပ်တံရ။ ဍေံအာတ်လဝ်တှ်ေ ဟွံကဵုဒေါအ်ဟွံဂွံပုဟ်။ လ္ၚဵုရဲမုလေဝ်ဟွံကၠိုဟ်တံဟီုမံၚ် ပေါဲရုဲမာဲတုဲမ္ဂး ၜိုဟ်သြိဟ်အာဏောၚ် သွက်ဒးဗတိုက်ပၞာန်ဟၟဲရပုဟ် ဟီုဗီုတေံဗီုဏံတုဲ ကော်ဏာ။ ကဵုကမၠောန်ဟီုတုဲ ကော်ဏာရဲကမၠောန်ဟၟဲတံလေဝ်နွံကီု” သာ်ဝွံသ္ဂးရ။
ဗွဲတၟေၚ် စောဲစပ်ပရေၚ်ဖံက်ပကဝ်အမိၚ်ဒေသန္တရဂးတုဲ သၟတ်ဒးဒုၚ်ရပ်လဝ်တံဂှ် ကဝ်မယှေန်ပၞာန်ကဵု ဒပ်ဗၠာဲသၟိၚ်တံ သွံစကဵုသ္ကိုပ်အုပ်ဓုပ်တံ သၟတ်မွဲတၠမ္ဂးခုတ်စၟတ်လဝ်ၚုဟ်မး အကြာ ၄၀ ကိုတ်ကဵု ၈၀ ကိုတ်ဒကေဝ်တုဲ ပကောံကေတ်မံၚ်ကောန်ပၞာန်တံရ။
မွဲလပါ်ပၠန် သွက်ဂွံတိုန်ဘာပၞာန်လၟေၚ်ဂိတု အတိုၚ်ကဝ်မယှေန်ပၞာန် ခုတ်လဝ်ကဵုလၟိဟ်မၞိဟ် ညံၚ်ဂွံဍိုက်ပေၚ်ဂှ် သ္ကိုပ်အုပ်ဓုပ်အရာပ်/ကွာန်တံ ဒးပကောံအာတုဲ ယဝ်ရပကောံကဵုဟွံပေၚ်မ္ဂး ဒးဒုၚ်ကေတ်အရေဝ်ရောၚ် ဒုၚ်ဝန် ထပက်လဝ်စၟတ်တဲနွံရ။
ဟိုတ်နူကဝ်မယှေန်ပၞာန် ကဵုမံၚ်ဇြဟတ်ဟရိုဟ်နာနာသာ်တုဲ သ္ကိုပ်အုပ်ဓုပ်အရာပ်/ကွာန်တံ ထပက်အဇာမၞိဟ်ဟွံမာန်မ္ဂး ဒးကဵုဂၠံက်မာဲ ယိုက်ဝန်ပၞာန်၊ မၞိဟ်ဟွံကၠုၚ်ဂၠံက်မာဲတံဂှ်တှ်ေ နူကဵုရုၚ်ပလံၚ်ဗစိုပ် လိက်ရုၚ်ကော်တုဲ ပကောံကေတ်မံၚ်ကောန်ပၞာန်တၟိတံ မဒှ်ရ။
အတိုၚ်တင်နၚ်ဌာန်ပရိုၚ်သြၚ်လောန်တိုၚ်မ် ပကောံဂွံလဝ်မ္ဂး ပ္ဍဲတွဵုရးမန် စနူတန်ဗတောန်ဘာယိုက်ဝန်ပၞာန် လၟေၚ် ၁ ဒဵုကဵု ၂၀ သၟတ်ၜိုတ် ၄၀၀၀ နနဲအဓ္ဓမ ဒးဒုၚ်ပကောံလဝ်ကောန်ပၞာန်တၟိတံရ။
ပရိုၚ်-သြၚ်လောန်တိုၚ်မ်
Photo – MOI