တဳဟဳရာန်၊ ဂျာန်နဝါရဳ ၁၁
ရဲထ္ၜးဆန္ဒဒစဵုဒစးမံၚ်အလဵုအသဳတံ စိုတ်ထရ ညံၚ်ဂွံမိပ် ဂစာန်ဖန် ဂၠာဲမံၚ်ပြဿနာရောၚ် က္ဍိုပ်သ္ကိုပ်အဳရာန် အယာတိုလာ အလဳ ခါမေနဳ ဟီုရ။
ပေါဲထ္ၜးဆန္ဒအဳရာန်တံ ညံၚ်ဂွံဒှ်ပရေၚ်ပကီုပရာတ် ဗတိုက်ပလီုပလာ်သၠဲသၠဲလးလး ညံၚ်ဂွံဒှ် ကၠောန်အာမံၚ်ရောၚ် လိက်ပတိုန်ဒုဟ်မွဲတၞး နူကဵုအဳရာန် ဗစိုပ်လဝ်ကဵု ဇရေၚ်ကံၚ်သဳပရေၚ်ဂီုကၠီုကုလသမဂ္ဂရ။
ပ္ဍဲအကြာဏံ အဳရာန်တံ ပြဿနာက္တဵုဒှ်မံၚ်ဇၞော်ကဵုဇြဟတ် ထရ ဟီုရ။
ပေါဲထ္ၜးဆန္ဒ ဒှ်ကၠုၚ်လဝ်ပွိုၚ် ၁၅ တ္ၚဲတုဲ စပ်ကဵုပြဿနာပရေၚ်ပိုန်ဒြပ်ဒှ်ကၠုၚ်လဝ်တံဂှ် လၟုဟ်ဒှ်ပေါဲထ္ၜးဆန္ဒဇၞော်အိုတ်ရ။
လ္ၚဵုတံ သွက်ဂွံစွံသၞောတ်ဧကရာၚ် ကလေၚ်မိက်တုဲ လ္ၚဵုတံဂှ် ကၟိန်ဍုၚ်အေတ်သလာန်မေတ် ညံၚ်ဂွံဒေါအ်ထောံ အာတ်မိက်မံၚ်ရ။
ရဲထ္ၜးဆန္ဒ ၄၈ တၠကေုာံ ဒပ်ပရေၚ်ဂီုကၠီု ၁၄ တၠချိုတ်လဝ် ဂကောံအခေါင်အရာမၞိဟ်တံ ဟီုရ။
အမေရိကာန် မၚ်ရံၚ်အာ အကာဲအရာပေါဲထ္ၜးဆန္ဒအဳရာန် နူကဵုကြပ်ကြပ်တုဲ အမေရိကာန်လုပ်ပါရောၚ်ဟီုမ္ဂး ဗလးဏာကောန်ပၞာန်ဟွံသေၚ်ပုဟ် ဂွံတီရ။
အလုံဍုၚ်မွဲ ထပိုတ်လဝ်လိုၚ်အေန်တာနိတ်တုဲ ဒၞာဲအဳရာန် ဂိအိုတ်ဂှ် ထပက်ဗတိုက်အာရောၚ် ထရဟီုလဝ်ရ။
နူကဵုအလဵုအသဳအဳရာန် ဂစိုတ်ရဲထ္ၜးဆန္ဒတံမ္ဂး အမေရိကာန် လုပ်အကြာတုဲ ဒးသောၚ်ကလးရောၚ် ထရကဵုလဝ်သတိ နူအခိၚ်ပြဟ်ဟ်တေံရ။
ပရေၚ်အပ္ဍဲဍုၚ်အဳရာန်ဂှ် အမေရိကာန် လုပ်ပလာတ်ပထုဲမံၚ်အကြာရောၚ် အမာတ်ကလုတ်အဳရာန် ဆေင်စပ်ကဵုကုလသမဂ္ဂ စောဲစပ်လဝ်ရ။
ပရေၚ်ဟွံညိၚ်ဝပ်ကဵု ပကီုပရာတ်တံညံၚ်ဂွံက္တဵုဒှ် အမေရိကာန် ဖန်ဖက်ကဵုမံၚ်ဇြဟတ်ရောၚ် ပ္ဍဲကဵုလိက်အဳရာန်ကဵုဏာလဝ် ကံၚ်သဳပရေၚ်ဂီုကၠီုဂှ် ချူလဝ်ရ။
စနူဒဳဇြမ်ပါ ၂၈ ပေါဲထ္ၜးဆန္ဒဒှ်ကၠုၚ်လဝ်တုဲ ဗွဲကြဴ ရဲထ္ၜးဆန္ဒ ချိုတ် ၄၈ တၠတုဲ ဒးဒုၚ်ရပ်လဝ် ၂၂၇၇ နွံမံၚ်ရောၚ် ဂကောံအခေါၚ်အရာမၞိဟ် (HRANA) ဖျေံလဝ်သ္ဇိုၚ်အမေရိကာန် ဟီုရ။
ရဲထ္ၜးဆန္ဒ ၅၁ တၠချိုတ်အာလဝ်ဂှ် ကောန်ၚာ် ၉ တၠပါလုပ်မံၚ်ရောၚ် ဂကောံအခေါင်အရာမၞိဟ်ဖျေံသ္ဇိုၚ်နဝ်ဝေ (IHRNGO) ထမံက်ပတိတ်လဝ်ရ။
ပ္ဍဲကဵုလိက်ပံၚ်တောဲလလောၚ်တြး က္ဍိုပ်သ္ကိုပ်အဂႅလိက်၊ ဂျာမဏဳကဵု ပြၚ်သေတ်တံမ္ဂး ဟိုတ်နူဂွံမိၚ် ဒပ်ဂီုကၠီုအဳရာန် ကၠောန်မံၚ်ပရေၚ်ပကီုပရာတ်တံဂှ် ဂွိင်ဂွာဲဗွဲမလောန်တုဲ ပရေၚ်ဂစိုတ်မံၚ် ရဲထ္ၜးဆန္ဒတံဂှ် ပျုတ်ဗဒေက်ဒစဵုဒစးအာ ဗွဲမသကာတ်မြဟ်ရောၚ် ချူလဝ်ရ။
Ref:BBC