နေပျဳတဝ် ၊ ဂျာန်နဝါရဳ ၁၁
ပရေၚ်သီလဝ်အဝဵု ညံၚ်ဂွံလုပ်အာ ဗဗွဲသၞောဝ်ပရၚ်ဍုၚ်ကွာန်မာန် ကၠောန်ပေါဲရုဲမာဲသ္ကုတ်ကဵုသ္ကုတ်တုဲ သွက်ၜိုဟ်လလမ်ထာဝရဂှ် ခြာဟွံလံမ္ဂး ပ္ဍဲဇၟာပ်ဒေသတံဒးဂိုတ်ဂစာန်ရောၚ် က္ဍိုပ်သ္ကိုပ်ပၞာန် စကဵုကၠုၚ်အရေဝ်ရ။
ပ္ဍဲလိက်သဝဏ် က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော်မေန်အံၚ်လှိုၚ် ပလံၚ်ဗစိုပ်ဏာလဝ်ကု အခန်ကၞာ တ္ၚဲတွဵုရးကချေၚ် မရနုက်ကဵု ၇၈ သၞာံ ပ္ဍဲဂျာန်နဝါရဳ ၁၀ ဂှ် စပ်ကဵုပရေၚ်ၜိုဟ်လလမ်တုဲ ဟီုစုတ်လဝ်ရ။
ပြဿနာပရေၚ်ဍုၚ်ကွာန်ဂှ် နနဲဂၠံၚ်ဍာန်ပရေၚ်ဍုၚ်ကွာန် သွက်ဂွံသောၚ်ကလးအာ ၜိုဟ်ဟ်သြိုဟ်ဟ်မဒှ်တုဲ အတိုၚ်ဗီုလၟုဟ်ဏံ ပ္ဍဲဇၟာပ်ပ်ဒေသကောန်ဍုၚ်အရၚ်တံ သ္ပပဓာန်ကဵုလွဟ် အာတ်မိက်ဗတိုက်ကေတ်မံၚ်တံဂှ် ဂုဏ်ဖဵု သွက်ဍုၚ်မွဲသာ်လေဝ်ဟွံဒှ် ဒှ်သၞောတ်ပကီုပရာတ် ဒစဵုဒစးမံၚ်ကဵု ပရေၚ်ဒဳမဝ်ကရေသဳ ဟီုရ။
တုဲပၠန် ကလေၚ်ကဵုမံၚ်ဒဒိုက်ကဵု ကောန်ဍုၚ်အရၚ်ဇကုတံရမဒှ်တုဲ ထေက်ကဵုမ္ဒးစင်ခြၚ် စွံအာသတိမာန်ကီု၊ ပဋိပက္ခရပ်လွဟ်ပ္ဍဲဇၟာပ်ဒေသတံဒးကၠေံဗ္ဒန်အာတုဲ သွက်ၜိုဟ်လလမ်ထာဝရဂှ် မ္ဒးရေၚ်တၠုၚ်အာ သွက်ဇၟာပ်ဒေသတံ ဒးဂိုတ်ဂစာန်ရောၚ် ဟီုလဝ်ရ။
သွက်ကၟိန်ဍုၚ်ဖောအ်ဗြဳတဴတက်အာမာန်ဂှ် အလုံဍုၚ်မွဲ ဒးၜိုဟ်သြိဟ်ညိၚ်ဝပ်တုဲ ပရေၚ်ပဋိပက္ခရပ်လွဟ် ကၠောန်ပွမပကီုပရာတ် ပ္ဍဲဇၟာပ်ဒေသတံဟၟဲအိုတ်မှ ဍုၚ်ၜိုဟ်သြိဟ်မှ ဆက်အာပရေၚ်ဖောအ်ဗြဳတဴတက်မာန် ရောၚ် သ္ဂးရ။
ဟိုတ်ဂှ်ရ ဂကောံရပ်လွဟ် တန်တဴမံၚ်ပ္ဍဲတွဵုရးတံဂှ် ရန်တၟံပတဝ်ကဵုဏာသွက်ဂုဏ်ဖဵုတွဵုရး၊ သွက်ညးဍုၚ်ကွာန် ကောန်တွဵုရးတံတုဲ ပေါဲဗတိုက်ဂမၠိုၚ်ညံၚ်ဂွံဒေါအ်အာ၊ ပရေၚ်ကတူကတာန်ပကီုပရာတ်တံ ညံၚ်ဂွံကၠောန်ဗ္ဒန်အာ အခိၚ်အခါကဵုဖျုန်ကၠောန်အာဂှ် စိုပ်မံၚ်ယျရောၚ် က္ဍိုပ်သ္ကိုပ်ပၞာန် ဗတိုက်ဖအောဝ်လဝ်ရ။
ပေါဲရုဲမာဲတုဲမ္ဂး ညံၚ်ဂွံသဳကၠဳအာကဵု ကောန်ဍုၚ်အရၚ်တံမာန် ဒပ်ပၞာန်ဗမာသရောပ်ချုက်ဏာတုဲ ပရေၚ်လဝေၚ်ပၞာန် လပါ်ရးဒေသဇၞော်တံ ဂၠိုၚ်တိုန်ရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်ရ။
“ပေါဲရုဲမာဲတုဲမ္ဂး ဒပ်ပၞာန် ညံၚ်ဂွံချုက်ဂွံ ကောန်ဍုၚ်အရၚ်တံမာန် ကၠောန်အာဏောၚ်။ အတိုၚ်အာတ်မိက်ဂှ် ဗက်ကဵုဏောၚ်။ ဆဂး လပါ်ဇြဟတ်ပၠန်ဂတး နွံမံၚ်ပ္ဍဲရးဒေသဇၞော်တံဂှ် ဍိုက်ကဵုဇြဟတ်ပၞာန်ပေၚ်ၚ်ဏောၚ်။ မွဲလပါ်ဂှ် ဒပ်ပၠန်ဂတးဖျေံလဝ်သ္ဇိုၚ်ပ္ဍဲဒေသ ကောန်ဍုၚ်အရၚ်တံဂှ် ဗီုလဵုဆက်မံၚ်အာရော ဗီုပြင်လဵုဆက်ဗတိုက်အာရော။ ဒပ်ပၞာန် ထပ်ချုက်ကေတ်မာန်ဏောၚ်။ အေဂှ်တှ်ေ ပေါဲရုဲမာဲတုဲမ္ဂး ဝိုၚ်တက်ကျာသဳကၠဳ ဒပ်ပၞာန်ကဵုကောန်ဍုၚ်အရၚ်တံ ဒှ်တုဲ ပရေၚ်ပၞာန်ဂှ် ပတဝ်ကၠုၚ်လပါ် ရးဒေသဇၞော်တံဏောၚ်။ ပဵုတုဲကဵုကၠုၚ်ဖျုၚ်မာန်ရောၚ် အဲသ္ၚဳဂၠိပ်” သာ်ဝွံသ္ဂးရ။
ပ္ဍဲအခိၚ်ကာလသီအဝဵုဏံ ကောန်ဍုၚ်အရၚ်ထပက်လဝ်စၟတ်တဲ ပရေၚ်ဒေါအ်ပန်ပှော် ၇ ဂကောံကဵု ကောန်ဍုၚ်အရၚ်ဟွံထပက်လဝ်စၟတ်တဲ ၃ ဂကောံ၊ ဗော်ပရေၚ်ဍုၚ်ကွာန်တံကီု ဆဵုဂဗလဝ်အလန်ဂၠိုၚ်ကဵုဝါတုဲ ပ္ဍဲကဵုသ္ဇိုၚ်သၞောဝ်ဥပဒေ ၂၀၀၈ ဂှ် သွက်ဂွံပလေဝ် ၄၃ တင်ဂှ်လေဝ် တုပ်လဝ်စိုတ်ညးသ္ကံနွံရ။
သွက်ဂွံဗတိုက်သရိုဟ်သၠောတ်တၠအဝဵုပၞာန် ဒပ်ကဝ်က MNDAA ကဵု ဒပ်တအာၚ် TNLA ပါကၠုၚ်တံ ဟိုတ်နူအလဵုအသဳကြုက် ကဵုဇြဟတ်ဟရိုဟ်ဂှ်ရ ဒေါအ်ပန်ပှော်ကဵုဒပ်ပၞာန်ဗမာတုဲ ဒေါအ်အာလဝ်ပ္ဍဲကဵုဂၠံၚ်တရဴ ပရေၚ်ပၠန်ဂတးယျ။
က္ဍိုက်သ္ကိုပ်ပၞာန် ဆက်ကၠောန်အာပေါဲရုဲမာဲသ္ကုတ် ၃ တုဲ အလဵုအသဳတၟိမံက်တိုန်ဂှ် ဒပ်ပၞာန်ဗမာခြာဟွံလံ သၠောဲပအပ်ကဵုအဝဵုရောၚ် ပ္ဍဲလိက်သဝဏ်ဂှ် ချူထ္မံက်လဝ်ရ။
ပ္ဍဲကဵုဆန္ဒမာဲမ္ဂး အလံၚ်ညးစၞးပံၚ်တောဲကၠောန်အာမာန်ကဵု ဒပ်ပၞာန်ဂှ် ညံၚ်ဂွံစုတ်ကဵုအာမာဲဂှ် ပၟိက်ဇၞော်မံၚ်ကီု ပ္ဍဲကဵုတရဴက္ဍိုပ်သ္ကိုပ်ပၞာန် အာလဝ်ဍုၚ်ပါၚ်တံၚ်ဂှ် စန်ဒက်လဝ်ကီုရ။
မွဲလပါ်ပၠန် ဒပ်ပၞာန်စဵုဒၞာညးဍုၚ်ကွာန် နွံမံၚ်သၟဝ်တဲ ဌာနဝန်ဇၞော်အလဵုအသဳညဳသၟဟ်ကောန်ဂကူ NUG သွက်ဂွံထပိုတ်ရိုဟ်ကၞက် သၠောတ်တၠအဝဵုပၞာန် ပ္ဍဲဂျာန်နဝါရဳ ၉ ဂှ် လုပ်ဗတိုက်လဝ်ဗ္ဒိုပ်ပၞာန် ၁၄ ဒၞာဲနွံမံၚ် ဂၠံၚ်ကွဳစက်ဇၞော် လ္ဂုၚ်-မာန္တလေဝ်ရ။
ပ္ဍဲပေါဲဗတိုက်တံဏံ လပါ်ဒပ်ပၞာန်ဗမာချိုတ်ဟွံအောန်နူကဵု ၅၀ တၠ၊ ဒးဘဲဝပ်ဂၠိုၚ်၊ သီုသီဂွံလဝ်လွဟ်မကမ် နာနာတံရောၚ် လလောၚ်ပတိတ်လဝ်ပရိုၚ်ရ။
တုဲပၠန် ဒၞာဲဒပ်ပၞာန်ဖျေံလဝ်ဗ္ဒိုပ် ဂၠံၚ်ကွဳပၟတ် ဍုၚ်တာယာကုၚ်၊ ပွိုၚ်ဍုၚ်ကျံက်တဂါဂှ် နူကဵု KNLA တမ်ဒပ် ၉ လုပ်ပံၚ်တောဲဗတိုက်လဝ်ကီု ဂွံတီရ။
ပရိုၚ်-သြၚ်လောန်တိုၚ်မ်
Photo – MOI