ၜဳကလေၚ်၊ ဂျာန်နဝါရဳ ၂၂
တွဵုရးမန် ပွိုၚ်ဍုၚ်ၜဳကလေၚ် ပ္ဍဲကဵုသ္ကုတ်ဂၠံၚ်ကွဳစက်ကၟိန်ဍုၚ် ဒၞာဲညးဍုၚ်ကွာန်တံ အာကၠုၚ်မံၚ်ဂှ် ဆဵုညာတ်လဝ်မာၚ်တပ်တိ မွဲဏှမွဲဏှတုဲ ဖေက်လကိုတ်မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုင်မ်ရ။
ပ္ဍဲကဵုပွိုၚ်ဍုၚ်ၜဳကလေၚ် ဂၠံၚ်ကွဳစက်ကၟိန်ဍုၚ် သ္ကုတ်ဂၠံၚ်လ္ဂုၚ်-မတ်မလီု၊ သ္ကုတ်ဂၠံၚ်ၜဳကလေၚ်-မုဟ်ဒဵု၊ သ္ကုတ်ဂၠံၚ်ၜဳကလေၚ်-နာတ်ဂျဳတံဂှ် ပ္ဍဲကဵုအကြာဂိတုဏံ ညးဍုၚ်ကွာန်တံ ဆဵုမံၚ်မာၚ်တပ်တိ မွဲဏှမွဲဏှ သ္ဂးရ။
ပ္ဍဲကဵုဂၠံၚ်ကွဳစက် ဒၞာဲညးဍုၚ်ကွာန်အာကၠုၚ်မံၚ်တံ ဟိုတ်နူ ဆဵုညာတ်လဝ် မာၚ်တပ်တိမွဲဏှမွဲဏှတုဲ သွက်ဂွံအာ ဥဒျာန်ကၠအ်သွဝ်ကီု ဒၞာဲဌာန်ကမၠောန် ဂမျိုၚ်ဗုၚ်ဂၞဴညးတံကီု သွက်ဂွံအာကၠုၚ်ချဳဒရာၚ် လၟေၚ်ၚ်တ္ၚဲဂှ် ဒးဖေက်လကိုတ်မံၚ် ကွေံကွေံရောၚ် ညးဒေသတံ သ္ဂးရ။
စနူကဵုသၞာံတၟိဏံမံက်တုဲ ပ္ဍဲကဵုသ္ကုတ်ဂၠံၚ်ကွဳစက် ပွိုၚ်ဍုၚ်ၜဳကလေၚ် ဒၞာဲညးဍုၚ်ကွာန်အာကၠုၚ်မံၚ်ဂှ် ဆဵုညာတ်လဝ်မာၚ်တပ်တိ ဟွံအောန် နူကဵု ၁၀ ဝါ ဂွံတီရ။
ဗွဲတၟေၚ် ပ္ဍဲသ္ကုတ်ဂၠံၚ်ၜဳကလေၚ်-မုဟ်ဒဵု ဒပ်ကဝ်မယှေန်ပၞာန် ထိၚ်ချုက်လဝ်ကေုာံ ပ္ဍဲကဵုသ္ကုတ်ဂၠံၚ်ၜဳကလေၚ်-နာတ်ဂျဳ ဒပ်ပၠန်ဂတးတံထိၚ်ချုက်လဝ်ဂှ် ဆဵုလဝ်မာၚ်တပ်တိဂၠိုၚ်အိုတ် မဒှ်ရ။
ပ္ဍဲဂျာန်နဝါရဳ ၁၆ တေံလေဝ် ပွိုၚ်ဍုၚ်ၜဳကလေၚ် ပ္ဍဲကဵုသ္ကုတ်ဂၠံၚ် ကွာန်မေဝ်လာန် ကိုပျေအ်ဖျိုဝ်ကျဝ် ရဲကွာန်မေဝ်လာန် အဃော ဍိုက်အာမံၚ်ကွဳလိုန်ဓါတ်ဂှ် မာၚ်တပ်တိခတိုဟ်တုဲ ဒးလဝ်ဝပ် ဇၞော်ကဵုဇြဟတ်ရောၚ် ဂွံတီနူကဵုညးဒေသတံရ။
တပ်လဝ်မာၚ်တပ်တိဗီုဏံဂှ်တှ်ေ ဂကောံရပ်လွဟ်ဆေင်စပ်တံ ကၠုၚ်ပသောၚ်သ္အးကဵုပြဟ်ဟ်ညိဂှ် ညးဍုၚ်ကွာန်တံ နွံမံၚ်ပၟိက် အိုတ်အစောန်ရ။
အတိုၚ်လိက်ဒုၚ်စဳရေၚ် ဂကောံဆဝ်ဗ္ၚုဟ်စန်ဒက် ပရေၚ်တာဒၞာ စကာမာၚ်တပ်တိဂၠးကဝ် ICBL တံမ္ဂး ပ္ဍဲဍုၚ်ဗမာ စနူအခိၚ် ဒပ်ပၞာန်သီအဝဵုတုဲ စကာကၠုၚ်မာၚ်တပ်တိ မွဲအလုံဂၠးကဝ်မ္ဂး ဍုၚ်ဗမာ ဂၠိုၚ်အိုတ် ဂွံတီရ။
ပရိုင်-သြၚ်လောန်တိုၚ်မ်
Photo – Social Media