မတ်မလီု ၊ ဂျာန်နဝါရဳ ၂၂
အနှေန်ၚုဟ်ထဝ်ဂၠးကဝ် တိုန်သၠုၚ်အာတုဲ အနှေန်ထဝ်မဳလေၚ် အပ္ဍဲဍုၚ်ဗက်တိုန်စိုပ်အာ လျိုင်မွဲဒကေဝ် ၁၀၀ ကိုတ်ပြင်အာဂှ် ဒးဒေါအ်လဝ်ပရေၚ်သွံရာန်ရောၚ် ညးတၠကမၠောန်ဆေင်ထဝ်တံ ဟီုကဵုဌာန်ပရိုၚ်သြၚ်လောန်တိုင်မ်ရ။
ဟိုတ်နူကဵု အကာဲအရာပရေၚ်ဍုၚ်ကွာန်ဂၠးကဝ်ကဵု ဍုၚ်အမေရိကာန် ကီု ဟွံညိဝပ်မံၚ်ဂှ် ထဝ်လျိုၚ်မွဲအံၚ်သ စိုပ်အာကရပ် ၄၈၄၇ ဒဝ်ဠာ ပ္ဍဲဂျာန်နဝါရီ တ္ၚဲ ၂၁ ဂှ်ထပက်တိုန်အာ ၜက်အာနူသၞောတ်ထ္ၜတ်ရ။
မွဲကရောံကဵုအနှေန်ထဝ်ဂၠးကဝ်တိုန်ဏံ အနှေန်ထဝ်အပ္ဍဲဍုၚ်လေဝ် လျိုၚ်မွဲဒကေဝ် စိုပ်အာ ၁၀၂ ကိုတ် တိုန်အာၜက်သၞောတ်တုဲ အပ္ဍဲကဵုဗွဝ်ဖျာအပ္ဍဲဍုၚ်ဂှ် အကာဲအရာဒးကၟာတ်ဖျာ အကာဲအရာတံ ဇီုကပိုက်မံၚ်ရ။
ဟိုတ်နူအနှေန်ထဝ် ပတဝ်မံၚ်ကဵုလပါ်တိုန်သၟးတုဲ အပ္ဍဲကဵုဗွဝ်ဖျာမ္ဂး ပရေၚ်သွံရာန်ထဝ်ဟၟဲပုဟ်ရောၚ် တၠဆေင်ထဝ်မွဲတၠ ဟီုကဵု ဌာန်ပရိုၚ်သြၚ်လောန်တိုင်မ်ရ။
“ပ္ဍဲဗွဝ်ဖျာ မၞိဟ်သွံထဝ်ဟၟဲပုဟ်၊ ၚုဟ်ထဝ်သွက်ဂွံတိုန်သၟးနွံတုဲ မၞိဟ်တံ ရပ်လဝ်ထဝ်ဖအိုတ်ရ။ ဆေင်ထဝ်တံပၠန် ရာန်ထဝ်ဒကောၚ်ဏောၚ်ဂးလေဝ် ထဝ်ဟၟဲပုဟ်။ ကပေါတ်ပိုတ်မံၚ်အိုတ် ဟီုမံၚ်ရ။ အနှေန်ထဝ်ဂၠးကဝ် အကာဲအရာ သွက်ဂွံတိုန်ရနွံတုဲ မၞိဟ်သွံထဝ်တံ ဟၟဲပုဟ်” သာ်ဝွံ သ္ဂးရ။
ဒၟာနူအကာဲအရာ ပရေၚ်ဍုၚ်ကွာန်ဂၠးကဝ်ဂှ် တၠုၚ်လအာ အနှေန်ထဝ် ဂၠးကဝ် သွက်ဂွံဆက်တိုန်အာရနွံမံၚ်တုဲ အနှေန်ထဝ်အပ္ဍဲဍုၚ် ထပ်တိုန်ပၠန်ဂှ်ရ ဒှ်အာဆဆဵုမာန်ရောၚ် ညးဆက်ဟီုရ။
ဟိုတ်နူ အနှေန်ထဝ်အပ္ဍဲဍုၚ် တိုန်ကၠုၚ်ၜက်အာနူသၞောတ်ဂှ် နူကဵုကဝ်မယှေန်ပၞာန် မင်ရံၚ်မံၚ်တုဲ ကော်သၟာန်မံၚ် တၠကမၠောန် ဆေင်ထဝ်လ္ၚဵုတံလေဝ်နွံ ဂွံတီရ။
နူကဵုကမ္မတဳခုတ်စၟတ်အနှေန်ထဝ် ကဝ်မယှေန်ပၞာန် ဖျေံလဝ် သ္ဂုတ်သွာတ် ထဝ်ဍာ်ဒကေဝ်ပေၚ်ၚ် လျိုၚ်မွဲဒကေဝ်မ္ဂး ၆၀ ကိုတ် ဒကေဝ်ဟီုကီုလေဝ် တၟော်အာကဵု အနှေန်ထဝ်သွံရာန်မ္ၚးမ္ဂး ၚုဟ်မးခြာမံၚ် ၄၀ ကိုတ် မဒှ်ရ။
ပရိုင်-သြၚ်လောန်တိုၚ်မ်
Photo – Social Media