နာရာ၊ ဂျာန်နဝါရဳ ၂၂
ပ္ဍဲသၞာံ ၂၀၂၂ ပေါဲကောံဓရီုဍုၚ်နာရာမွဲဒၞာဲ ညးပန်ဂစိုတ်လဝ် သ္ကိုပ်ဝန်ဇၞော်ဂျပါန် ယှေန်ဇြိုအာဗေ လံကၠုၚ်ပွိုၚ်ပိသၞာံဘာ်ဂှ် ဖျေံဏာထံၚ် မွဲအယုက်မွဲကအ်ရ။
ပ္ဍဲကဵုသၞာံအာတေံ ညးဒးဒုၚ်စောဲဒုဟ် တာတ်သူယာ ယာမာဂါမဳဂှ် အမှုညးတေံဖန်လဝ်ဏံ ဒုဟ်နွံမံၚ်ရောၚ် ဟီုပတိတ်လဝ်ကီုလေဝ် လ္တူညးတေံ ဒုဟ်ဗီုသာ်လဵု ဖျေံထေက်ဂှ် အကြာညးဍုၚ်ကွာန်ဂျပါန်တံ လညာတ်ပါ်ခြာမံၚ်ညးသ္ကံရ။
နဒဒှ်ညးဂစိုတ်မၞိဟ်ရောၚ် လ္တူယာမာဂါမဳ အယုက် ၄၅ ဂှ် မၞိဟ်ဗွဲမဂၠိုၚ်ညာတ်လဝ်တုဲ ညးလ္ၚဵုတံ ဗ္စာရဏာမံၚ် ဒဒိုက်ညးတေံဒးဇီုကပိုက်ကၠုၚ်လဝ်ရ။
ယာမာဂါမဳ သွက်ကၠောန်လဝ် ပွညးတေံဂံၚ်ၚ်ဂှ် ထေက်ကဵုဒုဟ်ဒဏ် မွဲအယုက်မွဲကအ်ရောၚ် သၟာဗက်ဂဗုတ် အလဵုအသဳတံ ဟီုရ။
ပ္ဍဲဍုၚ်ဂျပါန် ပရေၚ်ပကီုပရာတ်ရပ်လွဟ်ညံၚ်ကဵုဟၟဲ အောန်မံၚ်ဂှ် ဟိုတ်နူယှေန်ဇြိုအာဗေ ဒးဒုၚ်ဂစိုတ်တုဲ မၞိဟ်ဂမၠိုၚ်တံ ဖေက်လကိုတ်အာရ။
သွက်ဂွံယှအ်ဖျေံဒုဟ်ဒဏ် လ္တူယာမာဂါမဳမာန် သၟာဗက်ဂဗုတ်ညးတေံ ခၠေဝ်သှ်ပတိုန်ထ္ၜးလဝ် မၞိဟ်ဒးဒုၚ်ဇီုကပိုက်လဝ် ပရေၚ်ဘာသာရောၚ် ဟီုလဝ်ကီုရ။
ဟိုတ်မိညးတေံ စွံလဝ်ဂလာန်ပတေဟ် လ္တူဘာလကျာ်ပရေၚ်ပံၚ်တောဲ ဇြိုဟ်နက်ဍိုက်ပေၚ်တုဲ သ္ၚိကၟိန်အိန်ထံၚ်ညးတံ ဒးဝါတ်ခါဲဒိုက်ဒုဲစှ်ေအာအိုတ်ရ။
အကြာပရေၚ်ဘာလကျာ်မ္ဒးသၠေဟ်ပၟာနွံကဵု အာဗေတံ ပရေၚ်ဆက်စပ်နွံမံၚ်ဂှ် ယာမာဂါမဳ ဂွံတီအာတုဲ ပၞောတ်လဝ်စိုတ် လ္တူညးတေံရ။
ပ္ဍဲဂျာန်နဝါရဳ ၂၁ ရုၚ်သၞောဝ်ဓဝ်ဍုၚ်နာရာ သွက်ဂွံဖျေံသ္ဂုတ်သွာတ် အခိၚ်စၟဳစၟတ်မံၚ်အမှုဏံ မၞိဟ်ၜိုတ် ၇၀၀ ကောံမံၚ်အိုတ်ရ။
အခိၚ်ဒေါဝ်တ္ၚဲ ဟီုမံၚ်ဂလာန် အာဗေ ဒးဒုၚ်ပန်ဂစိုတ်တုဲ ပရေၚ်ဘာလကျာ်မ္ဒးသၠေဟ်ပၟာနွံမံၚ်တံဂှ် ရဲအုပ်ဓုပ်တံ ဗက်စၟဳစၟတ်ရ။
အမှုကိစ္စဏံ ဆက်စပ်မံၚ်ကဵု ဗော်ပရေၚ်ဍုၚ်ကွာန် ဂွံလဝ်အဝဵု လေတ်ဗရာဒဳမဝ်ကရိတ်တေတ်ရောၚ် စၟဳစၟတ်တီကၠုၚ်တုဲ ဝန်ဇၞော်လ္ၚဵုတံ နုက်တိတ်အာနူဂကောံအလဵုအသဳရ။
အာဗေဂှ် ပ္ဍဲကဵုရာဇဝင်ဂျပါန်မ္ဂး ဒှ်လဝ်သ္ကိုပ်ဝန်ဇၞော် အခိၚ်ဂၠိၚ်အိုတ်တုဲ ဒှ်မံၚ်ပူဂဵု ညးဂွံလဝ်ပရေၚ်ထံက်ဂလာန်ညးဍုၚ်ကွာန်ဂၠိုၚ်အိုတ်မွဲတၠ မဒှ်ရ။
အပါ ယာမာဂါမဳ စုတိအာတုဲ သြန်ဂွံလဝ်နူဌာနဒုၚ်လျိုၚ်လမျီုကဵု ကပေါတ်သ္ၚိဌာန်ပိုၚ်ပြဳလဝ်အိုဿီုတံဂှ် အမေညးတေံ ကဵုထောံဒါန်ဘာလကျာ်ပရေၚ်ပံၚ်ကောံဂှ်တုဲ စိုတ်လီုအာဇၞော်ကဵုဇြဟတ်ရ။
သွက်ဂွံဗတိုက်ဘာလကျာ် ကိုပ်ကၠာတဲ ညးတေံစဳဇန်လဝ်တုဲ သွက်ဂွံဂစိုတ်အာဗေ ဟွံသေၚ်ပုဟ် ဂွံတီလဝ်ရ။
Ref:BBC