လံၚ်လုၚ်၊ ဂျာန်နဝါရဳ ၂၂
ရးတနၚ်သြဳ ပွိုၚ်ဍုၚ်လံၚ်လုၚ် ပ္ဍဲဂအုံကွာန်သခါန်ဂျဳ ဗုမ်ဒရုၚ် ဒတုံခတိုဟ်အာဂှ် ညးဗြဴချိုတ်အာပိတၠတုဲ၊ ဒးလဝ်ပိတၠနွံမံၚ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုင်မ်ရ။
ဂကောံကဝ်မယှေန်ပေါဲရုဲမာဲ ကၠုၚ်ပလံၚ်လဝ်စက်စုတ်မာဲ ပ္ဍဲဂအုံကွာန်သခါန်ဂျဳတုဲ အခိၚ်စှ်ေမံၚ်ပရေၚ်စန်ဒက် ပ္ဍဲဂျာန်နဝါရဳ ၂၀ အခိၚ်တ္ၚဲစေၚ်ၜိုတ် ၂ နာဍဳဂှ် ဂကောံပၠန်ဂတးတံ ကြဳဖျေံဗုမ် ဗတိုက်လဝ်ကဵုဒရုၚ်ရ။
အတိုင်ညးဒေသတံဟီုမ္ဂး ဒရုၚ်ဂကောံပၠန်ဂတးတံ ကြဳဖျေံလဝ်ဗုမ်ဂှ် ဟွံဒးရဲဒပ်ကဝ်မယှေန်တံတုဲ ဒတုံစှ်အာ ဒၞာဲသ္ၚိကရပ်မွဲဒၞာဲ သ္ဂးရ။
ဟိုတ်နူ ဗုမ်ဒရုၚ်ဒတုံခတိုဟ်အာဂှ် ရဲကွာန်သခါန်ဂျဳ ဒဝ်ချို အယုက် ၆၀ သၞာံ၊ ကောန်ညး မခေန်မာဧ၊ ဒဝ်မာလာတံ ပိတၠချိုတ်တုဲ သီုကောန်ၚာ်မွဲမပါလုပ် ကောန်အရာပ် ၃ တၠ ဒးလဝ်ဝပ်ရဂှ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲအကြာတ္ၚဲတံဏံပၠန် နူကဵုခလရ ၁၀၄ ဖျေံသ္ဇိုၚ်ကွာန်တဝ်ယှေ ဂအုံကွာန်သခါန်ဂျဳဂှ် ဟိုတ်နူဂကောံပၠန်ဂတးတံ ကြဳဖျေံဗုမ်ကဵုဒရုၚ် တုဲ နူဒပ်ကဝ်မယှေန် ကလေၚ်ပန်လဝ်ကဵုလွဟ်ဇၞော်တံရ။
ပေါဲရုဲမာဲသ္ကုတ် ၃ သွက်ဂွံကၠောန်အာ ဂျာန်နဝါရဳ ၂၅ ပ္ဍဲပွိုၚ်ဍုၚ် လံၚ်လုၚ်ဂှ် အကြာဒပ်ပၞာန်ဗမာကဵု ဂကောံဇြဟတ်ပၠန်ဂတးတံ ပရေၚ်ပၞာန်ကြံၚ်မ္ၚိုဟ်မံၚ်တုဲ နူကဵုလပါ်ကဝ်မယှေန်ပၞာန် သွက်ဂွံကၠောန်ပေါဲရုဲမာဲမာန် ပတေၚ်ဓရတ်လဝ် ပရေၚ်ဂီုကၠီုနာနာတံရဂှ် ဂွံတီရ။
ပရိုင်-သြၚ်လောန်တိုၚ်မ်
Photo – Social Media