မိုဝ်မံက်၊ ဂျာန်နဝါရဳ ၂၂
ပ္ဍဲကဵုဒပ်ပၞာန် ဆက်ကၠောန်အာ ပေါဲရုဲမာဲသ္ကုတ် ၃ ဂျာန်နဝါရဳ ၂၅ ဏံ မ္ဂး ဒၞာဲဒေသဆန္ဒမာဲ ဗစူကဠာမာဲဟွံမာန်တံ ထပ်ပဵုတိုန်ကၠုၚ် နွံမံၚ်ရောၚ် ကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန် လလောၚ်တြးရ။
ရးဒေသဇၞော်ကဵု တွဵုရး ၈ဒၞာဲ ပ္ဍဲကဵု ၆၃ ပွိုၚ်ဍုၚ်ဂှ် လလောၚ်တြးလဝ် သွက်ဂွံ ဆက်ကၠောန်အာ ပေါဲရုဲမာဲသ္ကုတ် ၃ ကီုလေဝ် ပွိုၚ်ဍုၚ်မာန်သဳ ကဵု ပွိုၚ်ဍုၚ်မိုဝ်မံက် တွဵုရးကချေၚ်ဂှ် လလောၚ်တြးဏာ ဒၞာဲကၠောန်ပေါဲရုဲမာဲဟွံမာန် သ္ဂးရ။
ပ္ဍဲၜါပွိုၚ်ဍုၚ်ဏံ သွက်ဒၞာဲဆန္ဒမာဲစၠတ်ဓဝ်ညးဍုၚ်ကွာန် ၂ ဒၞာဲကေုာံ သွက်စၠတ်ဓဝ်တွဵုရး သၞောတ် FPTP ဒၞာဲဆန္ဒမာဲ ၂ ဒၞာဲတံဂှ် အကာအရာသွက်ဂွံကၠောန် ပေါဲရုဲမာဲမၞုံကဵုပရေၚ်ဓဝ်ယာသၠးပွးဂှ် ဒှ်ဟွံမာန်ပုဟ် သ္ဂးရ။
ဆဂး သွက်ဒၞာဲဆန္ဒမာဲ စၠတ်ထဝ်ကောန်ဂကူ သၞောတ် PR ဂှ် ပသှ်ေစွံလဝ်တုဲ လလောၚ်တြးလဝ် ညးစၞးစၠတ်ဓဝ်ညးဍုၚ်ကွာန် ပွိုၚ်ဍုၚ်မာန်သဳ နူကဵုဗော်ပျဳခိုၚ်ဖျိုဝ် ဥူကောန်သာန်ဂှ်လေဝ် ကလေၚ်ပါဲတးလဝ်ရ။
ပွိုၚ်ဍုၚ်မာန်သဳဂှ် ပါမံၚ်ပ္ဍဲကဵုပေါဲရုဲမာဲသ္ကုတ် ၃ ကီုလေဝ် သွက်ပွိုၚ်ဍုၚ်ဏံ ဒၞာဲဆန္ဒမာဲစၠတ်ထဝ်ညးဍုၚ်ကွာန်ဂှ် ညးလုပ်ပြိုၚ် နွံမံၚ်မွဲတၠဓဝ်တုဲ နဒဒှ်ညးစၞးဂွံဇၞး နူကဵုကဝ်မယှေန်ပေါဲရုဲမာဲကၟိန်ဍုၚ် ဒစးဒုၚ်လလောၚ်တြးလဝ် ပ္ဍဲဂျာန်နဝါရဳ ၂ တုဲ စိုပ်အခိၚ်လၟုဟ် နဒဒှ် ပွိုၚ်ဍုၚ်ကၠောန်ပေါဲရုဲမာဲဟွံမာန် ကလေၚ်ပလီုထောံလဝ် မဒှ်ရ။
တုဲပၠန် အကြာဒပ်ပၞာန်ဗၠးၜးကောန်ဂကူကချေၚ် KIA ကဵု ဒပ်ပၞာန်ဗမာ ပေါဲပၞာန်ၜါလပါ်ဒှ်မံၚ် ဍုၚ်ဗမဝ် အရာပ်နွံမံၚ် ၁၁ ဒၞာဲ ဂှ်လေဝ် နဒဒှ်ဒၞာဲကၠောန်ပေါဲရုဲမာဲဟွံမာန် လလောၚ်တြးလဝ်ရ။
ဟိုတ်ဂှ်တုဲ ပေါဲရုဲမာဲသ္ကုတ် ၃ ဂှ် ဆက်ကၠောန်အာ ပ္ဍဲ ၆၁ ပွိုၚ်ဍုၚ် မဒှ်တုဲ ပ္ဍဲကဵုပွိုၚ်ဍုၚ်ဗမဝ်မ္ဂး ဒၞာဲကွာန်/အရာပ်သှ်ေမံၚ်တၞဟ်ဟ်တံဂှ်ရ အကာဲအရာ ကၠောန်ပေါဲရုဲမာဲနွံတုဲ အလုံမွဲဍုၚ် ၆၇ ပွိုၚ်ဍုၚ်ဂှ် ညိလေဝ် ဗစူကဠာမာဲဟွံမာန် ဒှ်အာရ။
တုဲကၠုၚ်ပေါဲရုဲမာဲသ္ကုတ် ၁ ကဵု ၂ တေံ ကၠောန်လဝ်ပ္ဍဲ ၂၀၂ ပွိုၚ်ဍုၚ်ဂှ် ဂအုံကွာန်ကြပ် ၃၀၀၀ ဗစူကၠုၚ်ကဠာမာဲမာန်တုဲ ၆၅ ပွိုၚ်ဍုၚ်ဂှ်လေဝ် အကာဲအရာကၠောန်ပေါဲရုဲမာဲဟၟဲပုဟ် ကဝ်မယှေန်ပေါဲရုဲမာဲကၟိန်ဍုၚ် ဒုၚ်လဝ်ဝန်နူကဵုအခိၚ်ကၠာတေံရ။
သွက်ဂွံကော်ကောံဓရီုစၠတ်ထဝ် ပ္ဍဲအကြာဂိတုမာတ်ချ်နွံတုဲ အတိုၚ်လၟေၚ်ကမၠောန် သၠောဲပြံၚ်အပ်ပြာပ်ကဵုအဝဵု ဂကောံအလဵုအသဳ ဂွံလဝ်ဇၞးမာဲတံရောၚ် ပ္ဍဲဂျာန်နဝါရဳ ၂၀ အခိၚ်က္ဍိုပ်သ္ကိုပ်ပၞာန် လ္ၚပ်မိက်ဂွံဒှ်သမ္မတ စိုပ်ကၠုၚ်လဝ် ဌာန်ဂအုပ်ပၞာန်ရးဒေသ လဒေါဝ်ဗၟံက်ဂှ် ဟီုလဝ်နွံရ။
ပရိုင်-သြၚ်လောန်တိုၚ်မ်
Photo – MOI