မုင်၊ ဂျာန်နဝါရဳ ၂၈
ရးဒေဇၞော်ဗဂေါ ပွိုၚ်ဍုၚ်မုင် ပ္ဍဲကွာန်ယေလေဝ်သြင်ပလိုတ်ဂှ် ဟိုတ်နူဒပ်ကဝ်မယှေန်ပၞာန် ကြဳဖျေံဗုၚ်ဂှ် ကောန်အရာပ်ပိတၠ ဒးအာလဝ်ဝပ်နွံမံၚ် နူကဵုဗော်သွးကောန်ဂကူကရေၚ် KNU လလောၚ်ပတိတ်ပရိုၚ်ရ။
လောန်ကၠုၚ်ဂျာန်နဝါရဳ ၂၄ ၜိုတ်အခိၚ်ဒေါဝ်တ္ၚဲ ၁၁ နာဍဳကဝက်ဂှ် ပေါဲဗတိုက်ဟၟဲမွဲသာ် ၜၚ်ကျာဂျက်ဖိုက်တာမွဲမ နူကဵုဒပ်ပၞာန်ကျာ တံၚ်ဥူဂှ် ကၠုၚ်ကြဳဖျေံလဝ်ဗုမ် ၄ မ ပ္ဍဲကဵုကွာန်ယေလေဝ် သြင်ပလိုတ်ဂှ်ရ။
ဟိုတ်နူၜၚ်ကျာကြဳဖျေံဗုမ်ဂှ် ညးဒေသ ဥူနိုင်ဥူ အယုက် ၅၅ သၞာံ၊ ဥူတိုဝ်ယှိုဲ အယုက် ၇၅ သၞာံ၊ မတဳတဳ အယုက် ၂၇ တံ ဒးဝပ်တုဲ သ္ၚိပိမ လီုလာ်အာရ။
တုဲကၠုၚ်ဂျာန်နဝါရဳ ၂၃ ဂှ်လေဝ် ပ္ဍဲကဵုကွာန်နိုတဝ် ပွိုၚ်ဍုၚ်မုၚ်ဂှ် ဟိုတ်နူဒပ်ကဝ်မယှေန်ပၞာန် ပန်လွဟ်ဇၞော်ဂှ်ရ နဝ်ဖဝ်တရာထဳ အယုက် ၂၅ သၞာံ ဒးအာဝပ်နွံရဂှ် နူကဵု KNU ဗဟဵု ပတိတ်လဝ် ပရိုၚ်ရ။
ပ္ဍဲကဵုဂျာန်နဝါရဳ ၂၀ တေံလေဝ် ပ္ဍဲကွာန်သၞေဟ်ကာတ်ကျဳ ပွိုၚ်ဍုၚ်မုၚ်ဂှ် ဟိုတ်နူကဝ်မယှေန်ပၞာန် ကြဳလဝ်ဗုမ်ကဵုဒရုၚ်တုဲ ကောန်ကွာန်ပိတၠ ဒးအာလဝ်ဝပ်နွံမံၚ် ဂွံတီရ။
ပရိုၚ်-သြၚ်လောန်တိုင်မ်
Photo – KNU