မြဝတီ၊ ဂျာန်နဝါရဳ ၂၈
ဟိုတ်နူဒပ်ပၞာန်ဗမာကဵုဇြဟတ်ဟရိုဟ်ဂှ်တုဲ စနူဂျာန်နဝါရဳ ၂၇ အခိၚ်နူဂယးပြဟ်ဂှ် ဒပ် KNA လ္ၚဵု စတိတ်အာနူဍုၚ်ဗြဝတဳယျဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စၟတ်တ္ၚဲ ၂၅ ဂျာန်နဝါရီဂှ် စွံလက်ကရဴအိုတ်တုဲ ဒပ် KNA ညံၚ်ဂွံတိတ်အာနူဍုၚ်ဗြဝတဳ ကဝ်မယှေန်ပၞာန်ကဵုလဝ်စၞောန်ပၟိၚ်ကီုလေဝ် ဒဵုကဵုဂျာန်နဝါရဳ ၂၆ ဂှ် ဒပ် KNA ဟွံတိတ်နူကဵုဍုၚ်ဗြဝတဳဏီရ။
စနူကဵုဂျာန်နဝါရဳ ၂၇ ဂှ်တုဲ နူကဵုဍုၚ်ဗြတဳ ၃ ဒၞာဲဂှ် ဒပ် KNA တိတ်အာတုဲ ဒပ်ကဝ်မယှေန်ပၞာန် လုပ်ကေတ်လဝ်ဒၞာဲရဂှ် ဂွံတီရ။
ဆဂး ပ္ဍဲကဵုဍုၚ်ဗြဝတဳ ဒၞာဲလ္ၚဵုတံဂှ်တှ်ေ ပလှ်လဝ်တဆိပ်ပၞး KNA တုဲ ဆက်မံၚ်အာလေဝ်နွံ ဒပ်ဟွံပလှ်တဆိပ်ပၞး KNA လေဝ်ဆက်မံၚ်ဒၟံၚ်နွံမံၚ်ရောၚ် ညးဒေသဗြဝတဳတံ သ္ဂးရ။
တုဲပၠန် ဒပ်ဟွံပြံၚ်လဝ် KNA တံကီု ဒပ် BGF ဒေသဒပ် ၄ ဒုသ္ကိုပ်ပၞာန် သဝ်မုက်တုၚ်တံဆက်သှ်ေမံၚ်တုဲ ပံၚ်တောဲလဝ်ကဵုဒပ်ကဝ်မယှေန်ပၞာန် ဆက်ကေတ်လဝ်တာလျိုၚ်ပရေၚ်ဂီုကၠီု ဍုၚ်ဗြဝတဳ ဂွံတီရ။
ဒပ်ကဝ်မယှေန် ဂွိင်ဖေက် တမ်ဒပ်ခလရ ၂၇၅ လ္တူဍုၚ်ဗြဝတဳ ဒးဒုၚ်ဗတိုက်တုဲ သွက်ပရေၚ်ဂီုကၠီု ကဵုလဝ်စၞောန် ကော်လဝ် ဒပ်ကရေၚ်ထပက်လဝ်လိက်ကသုက် NCA, ဒပ် DKBA ကဵု KNU KNLA PC တံရ။
ယဝ်ရ တမ်ဒပ်ခလရ ၂၇၅ ဒးဒုၚ်ဗတိုက်မ္ဂး ပ္ဍဲဍုၚ်ဗြဝတဳ ၁၈ ဒၞာဲဂှ် သွက်ဂွံကြဳဖျေံဗုမ် သ္ကိုပ်ၝောံဒပ် ၂၂ နူကဵုဒပ်ကဝ်မယှေန်ပၞာန် ကဵုလဝ်သတိနွံရ။
က္ဍိုပ်သ္ကိုပ် BGF ဒပ်သ္ကိုပ်ပၞာန်သဝ်ချေတ်တူ ဒေသဒပ် ၂ ကဵု ဒုသ္ကိုပ်ပၞာန်သဝ်တေၚ်ဝေၚ် ဒေသဒပ် ၃ တံ စနူဂျာန်နဝါရီ ၁ ဂှ် ပြံၚ်သၠာဲအာယၟု ဒပ်ပၞာန်ကောန်ဂကူကရေၚ် KNA ကီုလေဝ် ဒေသဒပ် ၁ ကဵု ဒေသဒပ် ၄ တံ ဟွံပြံၚ်လှာဲ KNA ပုဟ် ဂွံတီရ။
လ္တူပြံၚ်သၠာဲအာ ဒပ် KNA ဂှ် ဒပ်ကဝ်မယှေန်ပၞာန်ဟၟဲပၟိက်ဂှ် ဒပ်ကဝ်မယှေန်ပၞာန်ဗက်ကြဳဗုၚ်ဗတိုက်လဝ် ဒၞာဲဒပ် KNA လ္ၚဵုနွံကီုတုဲ ဂိက်ဒပ် KNA လ္ၚဵုနွံမံၚ်လ္တူဂၠံၚ် ပလံၚ်ကပေါတ်ဗၞိက်ဒေသပယျဵုတံ ညံၚ်ဂွံကၟာတ်ထောံဂှ် ကဝ်မယှေန်ပၞာန်ကဵုလဝ်ဇြဟရိုဟ်ရ။
ပရိုၚ်-သြၚ်လောန်တိုင်မ်
Photo – KNA