မတ်မလီု ၊ ဂျာန်နဝါရဳ ၂၈
ပ္ဍဲကဵုတွဵုရးမန် ဆေၚ်သွံတြးမံၚ်ကၠောန်စက်တံ ယဝ်ရတၟော်အာကဵုဍုၚ်လ္ဂုၚ်ကီု ဒၞာဲရးဒေသဇၞော်ကဵု တွဵုရးတၞဟ်ဟ်တံမ္ဂး ၚုဟ်မးသၠုၚ်အိုတ်ဒှ်မံၚ်ရဂှ် အတိုၚ်လလောၚ်တြးကမ္မတဳကောပ်ကာဲ ပရေၚ်သွံတြးကၠေၚ် ကဝ်မယှေန်ပၞာန်တံ ဂွံတီရ။
အတိုၚ်ကမ္မတဳဏံ လလောၚ်တြးလဝ်ဂှ်မ္ဂး ပ္ဍဲကဵုဆေင်ကၠေၚ်တွဵုရးမန်တံ ကၠေၚ်ဓါတ် 92 မွဲလေတ် ၂၆၂၅ ဒကေဝ်၊ ကၠေၚ်ဓါတ် 95 မွဲလေတ် ၂၆၆၅ ဒကေဝ်၊ ကၠေၚ်ဒဳဇြေဝ် ၂၉၀၀ ဒကေဝ်ပြၚ်ခုတ်စၟတ်လဝ် ၚုဟ်မးနွံရ။
ၚုဟ်မးခုတ်လဝ်လၟုဟ်ဏံဂှ် တၟော်အာကဵု လ္ဂုၚ်၊ မာန္တလေဝ်၊ နေပျဳတဝ်၊ ဖာအင်၊ ထဝါဲ၊ ဖာသီ၊ မုၚ်ယွာတံမ္ဂး မွဲလေတ် ၃၀၀ ပြၚ်ၚ် ၚုဟ်သၠုၚ်တိုန်မံၚ် မဒှ်ရ။
ၚုဟ်မကၠေင်စပ်တွဵုရးမန် ဟိုတ်နူဂွံသၠုၚ်တိုန်မံၚ်နူကဵုဒၞာဲတၞဟ်ဟ်တံဂှ်တှ်ေ သွက်ကၠေၚ်စက်လုပ်ကၠုၚ်လဝ် နူမုဟ်ဍုၚ်ဂှ် ကဝ်မယှေန်ပၞာန် ဟွံသွံကဵုဒဝ်ဠာကီု ဟိုတ်နူၜၚ်ဇၞော်ဇၞော်တံလုပ်တိတ်ဟွံမာန်ကီုရဂှ် ညးတၠဆေင်ကၠေၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဍေံနွံမံၚ်ၜါတင်။ သွက်ရဲထပၠုပ်ကၠေၚ် ပ္ဍဲကဵုသၞေဟ်တဳလဝါ လ္ဂုၚ်တေံဂှ် အလဵုအသဳသွံပတိတ်ကဵုမံၚ်ဒဝ်ဠာ။ ဂွံဒဝ်ဠာနူအလဵုအသဳတှ်ေ သက်သာအာနူကဵု မ္ၚးရ။ သွက်ကၠေၚ်လုပ်နူမုဟ်ဍုၚ်ဂှ် ဟွံဂွံဒဝ်ဠာ။ ဒးရာန်ကေတ်ကဵုသြန်ဇကု။ ပ္ဍဲကဵုပိုဲ ၜၚ်လျိုၚ်တန် ၅၀၀၀ ရလုပ်ဂွံ။ နူကဵုၜၚ်ဇၞော်တေံ ဒးအာကေတ်မွဲအဆံၚ်ပၠန်။ ဟိုတ်ဂှ်ရ ၚုဟ်သၠုၚ်တိုန်အာ နူလ္ဂုၚ်ညိ” သာ်ဝွံသ္ဂးရ။
တုဲပၠန် သွက်ကၠေၚ်လုပ်နူကဵုသၞေဟ်မုဟ်ဍုၚ်ဂှ် ကဝ်မယှေန်ပၞာန်သွံကဵုဒဝ်ဠာမှ ၚုဟ်မးသဝ်စှ်ေအာမာန်တုဲ ၜၚ်ဇၞော်ဇၞော် ညံၚ်ကဵုလုပ်သၞေဟ်တဳလဝါတေံ ကၠောန်ကဵုမာန်မှၚုဟ်သက်သာစှ်ေအာမာန်ရောၚ် ညးဆက်ဟီုရ။
မွဲလပါ်ပၠန် နူကဵုသၞေဟ်တဳလဝါတေံ ဟွံဒးအာဖ္ဍိုက်ကေတ်ကၠေၚ်စက်ဂှ်ကီု ဂွံမံၚ်ကၠေၚ်စက်တံဒးအာဖ္ဍိုက်မံၚ် နူကဵုသၞေဟ်ကရပ်မုဟ်ဍုၚ်ကီုလေဝ် ၚုဟ်မးဂွံသၠုၚ်မံၚ်နူကဵုညးတၞဟ်ဗီုတံဏံဂှ်တှ်ေ အကြာညးဒေသတံ ပရေၚ်ပါ်ပါဲ ဒှ်မံၚ်ရ။
အခိၚ်ပၞာန်သီအဝဵုတုဲ ပ္ဍဲကဵုတွဵုရးမန်ဂှ် ကၠေၚ်စက်တံပိုတ်အာ မွဲဏှမွဲဏှကီု၊ မၞိဟ်တံဒးပြေၚ်ရာန်မံၚ်အခိၚ်လအ်၊ အတိုၚ်ပၟိက်စိုတ်ဂှ်ရာန်ကေတ်ဟွံဂွံ ၚုဟ်သၠုၚ်မံၚ်နူကဵုညးတၞဟ် မဒှ်ရ။
ပရိုၚ်-သြၚ်လောန်တိုင်မ်
Photo – CJ