အေတ်သလာမ်မာဗက်၊ ဂျာန်နဝါရဳ ၂၈
အကြာဍုၚ်ဗမာကဵု ပါကေတ်သတာန် ညံၚ်ဂွံဒှ်ပရေၚ်အထံက်ပၚ် ပ္ညဳပ္ညပ်လၟေၚ်ဍာံ၊ အကြာၜါဍုၚ် စပ်ကဵုဒေသကေုာံ အရာကိစ္စပရေၚ်ဂၠးကဝ်တံတုဲ သွက်ဂွံကၠောန်အာပရေၚ်ဍာ်ဇမၠိၚ်မာန် ပ္ဍဲဂျာန်နဝါရဳ ၂၆ ဂှ် ချုက်လိက်ပရေၚ်ကၠိုဟ်ခၠၚ် အရာတေင်ဗေင်သဳကၠဳပရေၚ်ဍုၚ်ကွာန်တံရ။
နူကဵုဍုၚ်ပါကေတ်သတာန်ဂှ် ဒုသ္ကိုပ်ဝန်ဇၞော်၊ ဝန်ဇၞော်ပရေၚ်ဍုၚ်သ္အာၚ် အမတ်စၠတ်ထဝ် မိုဟာမက် အဳယှက်တာ ကေုာံ ဝန်ဇၞော်ပရေၚ်ဍုၚ်သ္အာၚ် ဍုၚ်ဗမာ ဥူတာန်သိုဲတံ ထပက်လဝ်စၟတ်တဲ ပ္ဍဲကဵုလိက်ကသုက်ဏံရ။
ပ္ဍဲအကြာၜါဍုၚ် သွက်ဂွံသဳကၠဳအာလၟေၚ်ဍာံမာန်ဂှ် ညံၚ်ဂွံစဒတန်အာယန္တရာမွဲ တုပ်လဝ်ဝိုတ်ညးသ္ကံရ။
ပ္ဍဲကဵုဂျာန်နဝါရဳ ၂၄ အခိၚ်ဗတံဂှ် ဝန်ဇၞော်ဍုၚ်သ္အာၚ် ဍုၚ်ဗမာ ဥူတာန်သိုဲ စိုပ်ကၠုၚ်လဝ် ဍုၚ်အေတ်သလာမ်မာဗက်ဂှ် နူဌာနဝန်ဇၞော်ဍုၚ်သ္အာၚ် ပါကေတ်သတာန် ချူလဝ်ပ္ဍဲလိက်လလောၚ်တြးရ။
လၟေၚ်တရဴဏံဂှ် ရန်တၟံလဝ် သွက်ပရေၚ်ဆက်ဆောံအကြာၜါဍုၚ် ညံၚ်ဇြဟတ်ဂွံခိုဟ်တိုန်ရောၚ် ပ္ဍဲကဵုလိက်လလောၚ်တြးဌာနဝန်ဇၞော်ဍုၚ်သအာၚ် ချူလဝ်ရ။
ပရေၚ်သဳကၠဳလဝ်ကဵု ဝန်ဇၞော်ဥူတာန်သိုဲ တၠလအာခိုဟ် ဍိုက်ပေၚ်မံၚ်ရောၚ် ဝန်ဇၞော်ဍုၚ်သ္အာၚ် ပါကေတ်သတာန် ဟီုဂးလဝ် ပ္ဍဲပေါဲသောၚ်ကလးပရိုၚ်ရ။
ဍုၚ်ပါကေတ်သတာန်ကဵု ဍုၚ်ဗမာတံ အခိၚ်ဂစာန်ကလေၚ်ပၠုပ်မံၚ်လမျီုပရေၚ်ဆက်ဆောံ အကြာၜါဍုၚ်ဏံဂှ် လၟေၚ်တရဴ ဝန်ဇၞော်ဥူတာန်သိုဲ မံက်တိုန်ကၠုၚ် လိက်ပရိုၚ် ပါကေတ်သတာန်တံ ချူလဝ်ရ။
သွက်ဍုၚ်ဗမာ ဂွံၜိုဟ်လလမ်၊ ဂွံညိၚ်ဝပ်အာကေုာံ ညံၚ်ဂွံဖောအ်ဗြဳသာယာတိုန်အာ ဍုၚ်ပါကေတ်သတာန် ကဵုအာအရီုဗင်ရောၚ် ဝန်ဇၞော်ဍုၚ်သအာၚ် ဟီုလဝ်ရ။
ပ္ဍဲကဵုဍုၚ်ဗမာ သွက်ဂွံကၠောန်အာ အရာကလေၚ်ပ္ညဳပ္ညပ်ကောန်ဂကူဂှ် နူဍုၚ်ပါကေတ်သတာန် ထံက်ဂလာန် ဝန်ဇၞော်ဍုၚ်သအာၚ် အဳယှက်တာ သ္ဂးရ။
စပ်ကဵုပရေၚ်ၜိုဟ်လလမ်၊ ပရေၚ်ဂီုကၠီုဒေသတံတုဲ ဝန်ဇၞော်ဍုၚ်သအာၚ်ၜါတၠဏံ သၠာဲဂတးလဝ်လညာတ်နွံမံၚ် ဂွံတီရ။
သွက်ဂွံဒက်ပတန်အစောန်စရာဲ၊ ပရေၚ်ဖောအ်ဗြဳကေုာံ ပ္ဍဲဗွိုၚ်ပရေၚ်ဗ္စာရဏာမၞိဟ်တံဂှ် ပရေၚ်ပံၚ်တောဲရေၚ်တၠုၚ်အာ အကြာၜါဍုၚ် ညံၚ်ဂွံခိုဟ်တိုန်ကၠောန်အာရောၚ် အကြာပါကေတ်သတာန်ကဵု ဗမာတံ တုပ်စိုပ်ညးသ္ကံရ။
Ref:Brecorder