မတ်မလီု ၊ ဂျာန်နဝါရဳ ၂၈
ဂကောံထမံက်ရုပ်ရဴပရေၚ်ၜိုဟ်လလမ်ဍုၚ်ဗမာ နူကဵုပေါဲရုဲမာဲမွဲကဆံၚ်မၚ်စၟဳအာ လဟီုလဂး ပရေၚ်ထံက်ဂလာန်ကြုက်ဂှ်တုဲ အခိၚ်အိုတ်အာရောၚ် NUG ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂျာန်နဝါရဳ ၂၆ ပေါဲသောၚ်ကလးလိက်ပရိုၚ်ကြုက်လၟေၚ်ဍာံဂှ် စပ်ကဵုပေါဲရုဲမာဲဍုၚ်ဗမာတုဲ အစာပရိုၚ်တံသၟာန်လဝ်ဂှ် နူကဵုညးအခေါၚ်ဟီုဂးနွံ ဌာနဝန်ဇၞော်ကြုက်ကဝ်ကျာခေါန် သှ်ကဵုလဝ်ရ။
လ္တူပေါဲရုဲမာဲကၠောန်တုဲအာဏံ ကုလသမဂ္ဂ၊ ဍုၚ်ဂၠးကဝ်ဂမၠိုၚ်တံကဵု ရဲဒစဵုဒစးသၞောတ်တၠအဝဵုပၞာန်တံ ညာတ်လဝ်ပေါဲရုဲမာဲအလီ ဟွံလုပ်သၞောဝ်ကီုလေဝ် အလဵုအသဳဍုင်ကြုက်ဂှ်ပတိုန်ဏာစရာဲ သ္ဂးရ။
ကြုက်၊ ရတ်ယှာ၊ အေန္ဒိယ၊ ဍုၚ်အာသဳယာန်တံကဵု ဂကောံဂၠးကဝ်တံ ဗလးညးစၞး လ္ၚတ်ရံၚ်လဝ်ပေါဲရုဲမာဲဂှ် လၟေၚ်ကမၠောန်ညးတံ စှ်ေသၞောတ်ညိၚ်ဝပ်တုဲ တၠဆန္ဒမာဲဂမၠိုၚ်တံဂှ်စုတ်လဝ်မာဲ စိုတ်က္တိုၚ်ၚ်ကၟိုဟ်ဟ်ရောၚ် ကဝ်ကျာခေါန် ဟီုရ။
သွက်အကာဲအရာ ပရေၚ်ဍုၚ်ကွာန်ဂွံညိၚ်ဝပ်အာ ဂကောံဍုၚ်ဗမာဇၟာပ်ပ်လပါ်တံဂှ် နူကဵုပေါဲရုဲမာဲဏံမွဲအဆံၚ် သွက်ဂွံထမံက်အာပရေၚ်ၜိုဟ်လလမ်ကေုာံ ပရေၚ်အရာမပ္ညဳပ္ညပ်အာညးသ္ကံဂှ် ဍုၚ်ကြုက်ထံက်ဂလာန်ရောၚ် သ္ဂးရ။
တုဲပၠန် သ္ပအဲပရဲကဵုပရေၚ်ညးဍုၚ်ကွာန် ဍုၚ်ဗမာတံရုဲစှ်လဝ်ဂှ်တုဲ ပံၚ်တောဲအာကဵုပွဳဗွိုၚ်ဍုၚ်ဂၠးကဝ်တံတုဲ သွက်ဍုၚ်ဗမာညံၚ်ဂွံၜိုဟ်လလမ်ညိၚ်ဝပ်အာကေုာံ ပရေၚ်ဖောအ်ဗြဳတဴတက်အာမာန် အရီုဗၚ်တၠုၚ်လအာလပါ်ခိုဟ်တံဂှ် ဍုၚ်ကြုက်ဆက်ရီုဗၚ်အာရောၚ် ဟီုရ။
နူကဵုပေါဲရုဲမာဲအလီ အလဵုအသဳထ္ၜးစရုပ်ရမံက်ကၠုၚ်တုဲ တင်အလဵုအသဳကြုက်စၟဳစလဝ်ဂှ် မုလေဝ်ဒှ်ကၠုၚ်မာန်ဟွံသေၚ် ညးအခေါၚ်ဟီုဂးနွံ ရုၚ်အလဵုအသဳ NUG ဥူနေဖုၚ်လာတ် ဟီုရ။
“တင်အလဵုအသဳကြုက် စၟဳစလဝ်။ အဲမိက်ဂွံဟီုဂှ် အလဵုအသဳကြုက် စၟဳစမံၚ်တင်စၟဳစဏံသက်သက်တုဲ တုဲဒှ်အာအတိုၚ်ဏံရနွံ။ နူကဵုပေါဲရုဲမာဲအလီဏံ အလဵုအသဳထ္ၜးရုပ် နူကဵုမေန်အံၚ်လှိုၚ် ကောန်ရာဇဝတ်ပၞာန်တံ ၜးကယျိုၚ်ပၞာန်တုဲ ညံၚ်ရဴအလဵုအသဳညးဍုၚ်ကွာန် ဗဂေတ်လဝ်မတ်ဂၠးကဝ်ရ။ အေဂှ်တှ်ေ မုလေဝ်ပရေၚ်အပြံၚ်လှာဲတံ ဒှ်ကၠုၚ်ဟွံမာန်ပုဟ်” သာ်ဝွံ သ္ဂးရ။
ကာလကၠောန်ပွမအပြံၚ်အလှာဲဍုၚ်ဗမာမ္ဂး စိုတ်ဓါတ်မိက်ဂွံပြံၚ်သၠာဲ ပရေၚ်ဍုၚ်ကွာန်ဍာံဍာံဂှ်ကိစ္စဇၞော်တုဲ ပြဟ်ဟ်ဏံ ပ္ဍဲကဵုဒပ်ပၞာန် စိုတ်ဓါတ်ဟွံမိက်ပြံၚ်လှာဲပရေၚ်ဍုၚ်ကွာန်နွံတုဲ သွက်ဂွံပခိုၚ်ကၠောန်အာ အကာဲအရာလၟုဟ်ဏံရ ဂစာန်ကၠောန်မံၚ်ရောၚ် ညးဆက်ဟီုရ။
တုဲပၠန် အတိုၚ်ရန်တၟံပရေၚ်ဍုၚ်ကွာန် ၆ တၚ်ဂှ် ဟွံဂွံဟွံဒေါအ်ဆက်ကၠောန်အာ ပၠန်ဂတးစောအ်အ်ပေါတ်တ် ရောၚ်မဒှ်တုဲ နူကဵုပေါဲရုဲမာဲအလီဟွံလုပ်သၞောဝ်ဏံ ဗီုအလဵုအသဳကြုက် စၟဳစလဝ်ပရေၚ်ၜိုဟ်လလမ်ကဵု အရာပလေၚ်ပ္ညဳပ္ညပ်တံ ဒှ်ကၠုၚ်ဟွံမာန်ပုဟ် ဥူနေဖုၚ်လာတ် ထပ်ကဵုလဝ်သတိရ။
ပ္ဍဲတၚ်ရန်တၟံ ၆ တၚ်မ္ဂး ဒပ်ပၞာန်ဒးတိတ်အာနူကဵုပရေၚ်ဍုၚ်ကွာန်တုဲ ဂကောံဇြဟတ်ရပ်လွဟ်ဖအိုတ် ဒးနွံမံၚ်သၟဝ်တဲပရေၚ်အုပ်ဓုပ် အလဵုအသဳကောန်အရာပ်ကီု၊ သ္ဇိုၚ်သၞောဝ်ဥပဒေ ၂၀၀၈ ဂှ်ဟွံဒုၚ်တဲ၊ သွက်ဂွံထပ်ချူခၞံအာ သ္ဇိုၚ်သၞောဝ်ဒုၚ်သ္ဇိုၚ်ကဵု ပရေၚ်ဖိတ်ဒရေဝ်ဒဳမဝ်ကရေသဳ မဒှ်ရ။
အတိုၚ်သ္ဇိုၚ်သၞောဝ်ဏံ ဒက်ပတန်အာကၟိန်ဍုၚ်ဖိတ်ဒရေဝ် ဒဳမဝ်ကရေသဳတုဲ ညးကလိလောန်လဝ် ပရေၚ်ရာဇဝတ်ပၞာန်တံဂှ် အတိုၚ်တင်ကေတ်လျိုၚ်ဒုၚ်လျိုၚ်နွံနွံ ပ္ဍဲကာလအကြာပွမအပြံၚ်အလှာဲ လၟေၚ်ပရေၚ်ဓရ်ဍာံညးဍုၚ်ကွာန်တံ စဳရေၚ်ဏာဂှ် ဒးဒုၚ်တဲမာန်ရောၚ် လလောၚ်တြးလဝ်ရ။
စပ်ကဵုလဝေၚ်ပၞာန် ၁၀၂၇ က္တဵုဒှ်အာလဝ် ဒေသသေံသၟဝ်ကျာဂှ်တုဲ အလဵုအသဳကြုက် ဒးဒုၚ်ပါ်ပါဲ ပရေၚ်လုပ်ၜက်ၜေတ်လဝ် ပရေၚ်ဍုၚ်ဗမာဂှ် လၟုဟ်မ္ဂးအလဵုအသဳကြုက်ကဵုဒပ်ပၞာန်ဗမာတံ သြိုဟ်ကဵုသြိုဟ် စးကဵုစး ဗာန်စွံလဝ် အကာဲအရာစိုပ်မံၚ်ယျ။
အတိုၚ်ဍုၚ်ကြုက် ဒဂေတ်ဗက်ကၠုၚ်လဝ် မူဝါဒဇၞော် ၅ တၚ် ပံၚ်တောဲမံၚ်စံၚ်အာ ၜိုဟ်ဟ်သြိုဟ်ဟ်မွဲစွံ ကာလဇမၠိၚ်ဏံ ပ္ဍဲအရာကိစ္စပရေၚ်ဍုၚ်ဗမာဂှ် ကြုက်လုပ်ၜက်ၜေတ်ဖန်ဖက်လဝ်ဟၟဲပုဟ် ညးအခေါၚ်ဟီုဂးနွံ ဌာနဝန်ဇၞော်ဍုၚ်သအာၚ် ကြုက်တးပါဲလဝ်ရ။
တုဲပၠန် နကဵုဍုၚ်ကြုက် ပံၚ်တောဲအာကဵုဍုၚ်ဗမာမွဲစွံတုပ်ပ်တုဲ စွံလဝ်ပရေၚ်ဇြိုဟ်နက်ကဵု သွက်ဂွံထမံက်အာရုပ်ရဴ မဟာဗျူဟာ ပံၚ်တောဲဇၟာပ်သွာၚ်မာန်ရောၚ် ဟီုလဝ်ပေါဲသောၚ်ကလးပရိုၚ်ဂှ် ပ္ဍဲကဵု မုက်လိက် Faceboo ရုၚ်ကလုတ်ကြုက် ဆေင်စပ်ကဵုဍုၚ်ဗမာ ချူလဝ်ရ။
ပရိုၚ်-သြၚ်လောန်တိုင်မ်
Photo – MOI