မတ်မလီု ၊ ဖေဖဝ်ဝါရဳ ၇
ပၞောဝ်အာကဵုအနှေန်ထဝ်ဂၠးကဝ်တုဲ ၚုဟ်ထဝ်အပ္ဍဲဍုၚ် သၠုၚ်တိုန်ၜက်အာနူကဵုသၞောတ်ဂှ် ပ္ဍဲတွဵုရးမန် ညးတၠကမၠောန်ဆေင်ထဝ် သီုဖအိုတ်တံ ဒးဒုၚ်ကော်စၟဳစၟတ်မံၚ်ရောၚ် ညးကြပ်ကဵုဆေင်ထဝ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူကဵု အကာဲအရာပရေၚ်ဍုၚ်ကွာန် အမေရိကာန်ကဵု ဂၠးကဝ်တံဟွံညိၚ်ဝပ်မံၚ်ဏံ ပ္ဍဲကဵုမွဲဒမြိပ်ဝင်မ္ဂး အနှေန်ထဝ်ဂၠးကဝ်တိုန်ၜက်အာနူသၞောတ်တုဲ ၚုဟ်ထဝ်အပ္ဍဲဍုၚ်လေဝ်သၠုၚ်တိုန်အာ စိုပ်ကၞောတ်အိုတ်ရ။
ဟိုတ်နူကဵု အနှေန်ၚုဟ်ထဝ်အပ္ဍဲဍုၚ် သၠုၚ်တိုန်ၜက်အာနူသၞောတ် စိုပ်အာကၞောတ်အိုတ်ဂှ်ရ နူကဵုကဝ်မယှေန်ပၞာန် ကော်စၟဳစၟတ်မံၚ် ညးတၠဆေင်ထဝ်၊ ညးသွံရာန်ထဝ်၊ ရဲသွံထဝ်တံရ။
ဗွဝ်ဖျာအနှေန်ၚုဟ်ထဝ်အပ္ဍဲဍုၚ် ညံၚ်ဟွံဂွံညိၚ်ဝပ်ရန်တၟံတုဲ ခြိုၚ်စွံသွံတြးဏာလဝ် ထဝ်ကလောအ်အ်တံဂှ် ရပ်ကၠေၚ် ကေတ်ထောံအရေဝ် ဥက္ကဌ၊ ဒုဥက္ကဌကဵု ညးအုပ်ကာ ဂကောံသွံရာန် ကပေါတ်သတ္ထုၚုဟ်မးနွံ(ထဝ်) နူဍုၚ်လ္ဂုၚ်တံရဂှ် နူကဝ်မယှေန်ပၞာန် လလောၚ်တြး ပ္ဍဲဖေဖဝ်ဝါရဳ ၅ ရ။
အနှေန်ၚုဟ်ထဝ်အပ္ဍဲဍုၚ် သၠုၚ်တိုန်စိုပ်အာၜက်သၞောတ်ဂှ် ဟိုတ်နူအနှေန်ထဝ်ဂၠးကဝ်မဒှ်တုဲ ကေတ်အရေဝ် လ္တူတၠမၠောန်ဆေင်ထဝ်တံ ဟွံထေက်ကီု အတိုၚ်ၚုဟ်မးခုတ်စၟတ်လဝ် မိက်ဂွံကဵုသွံရာန်မ္ဂး ဖျေံထောံၚုဟ်မးဒဝ်လာမှ ဒှ်မာန်ရောၚ် ညးတၠကမၠောန်ဆေၚ်ထဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဟီုဍာံဍာံ တန်တဴကဵုအနှေန်ထဝ်ဂၠးကဝ်တုဲမှ ၚုဟ်မးထဝ်ဍုၚ်ဗမာဒှ်ကၠုၚ်ဏောၚ်။ ဍုၚ်ဏံမွဲဍုၚ်ဓဝ် တိုန်မံၚ်ဟွံသေၚ်ပုဟ်။ မဂၞန်မွဲ ဒးဖျေံကဵုအနှေန်သြန်ဒဝ်လာကၠာဏောၚ်။ ဒးကေတ်အရေဝ် ညးတာလျိုၚ် တၠကမၠောန်ထဝ်တံဟွံပုဟ်။ အနှေန်ထဝ်ဂၠးကဝ် ၄၈၇၅ ဒဝ်လာနွံတှ်ေ တၟော်အာကဵု ဒဝ်လာ ၂၅၀၀ မ္ဂး အတိုၚ်ရန်တၟံ ၜိုတ် ၆၅ ကိုတ်ရဒှ်မာန်။ ယဝ်ရညးတံ တံၚ်ဖျေံအနှေန်ဒဝ်လာ ၜိုတ် ၂၅၀၀ မာန်မ္ဂး အတိုၚ်ၚုဟ်ထဝ်ညးတံရန်လဝ် စိုပ်ကၠုၚ်မာန်ဏောၚ်” သာ်ဝွံသ္ဂးရ။
လ္တူအနှေန်ၚုဟ်ထဝ်အပ္ဍဲဍုၚ် သၠုၚ်တိုန်စိုပ်အာဂှ် ဆၜိုတ် ဗက်ရပ်ထောံညးတၠဆေၚ်ထဝ်တံ ဂှ် အနှေန်ၚုဟ်ထဝ်ကလေၚ်စှ်ေအာဟွံသေၚ်တုဲ ပွမကၠောန်မံၚ်ဗီုဗီုတံဏံဂှ် သွက်ထဝ်ဖျာဒမၠု ညံၚ်ဂွံ ဇၞော်တိုန်အာ ညံၚ်ရဴကဵုမံၚ်ဇြဟတ်ကီုရောၚ် ညးဆက်ဟီုရ။
ကဝ်မယှေန်ပၞာန်တံ ဗက်ရပ်စၟဳစၟတ်မံၚ်ညးဆေၚ်စပ်ကဵု ကမၠောန်သွံရာန်ထဝ်တံ အဆက်က်ဂှ် ပရေၚ်သွံရာန်ထဝ် ကလောအ်၊ ထဝ်ဒကောင် ပ္ဍဲဗွဝ်ဂအာၚ်ဖျာသွံရာန်ထဝ်တံ ဒေါအ်လဝ်ဖအိုတ်ရ။
ပ္ဍဲဖေဖဝ်ဝါရဳ ၆ အနှေန်ထဝ်ဂၠးကဝ် လျိုၚ်မွဲအံၚ်သ ဒဝ်လာ အမေရိကာန် ၄၉၀၀ ပွဳပွူနွံမံၚ်တုဲ အနှေန်ၚုဟ်ထဝ်ဒကောၚ်အပ္ဍဲဍုၚ် လျိုၚ်မွဲဒကေဝ်ဂှ် ဒဵုကဵုပွဳပွူ ၁၀၄ ကိုတ်ဒကေဝ် ၚုဟ်မးနွံမံၚ်ရ။
ပရိုၚ်-သြၚ်လောန်တိုၚ်မ်
Photo – Social Media