ၜဳကလေၚ်၊ ဖေဖဝ်ဝါရဳ ၇
တွဵုရးမန် ပွိုၚ်ဍုၚ်ၜဳကလေၚ် ပ္ဍဲကအ်ဂမာဂှ် ဗၠာဲသၟိၚ်ထိၚ်နေဝ်မွဲတၠ ဒးဒုၚ်ပန်ဂစိုတ်တုဲ နူကဵုဒပ်ကဝ်မယှေန်ပၞာန် ဗက်ရပ်စၟဳစၟတ်မံၚ် ညးဒေသတံရဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ်ဖေဖဝ်ဝါရဳ ၂ တေံ ပ္ဍဲဆေင်အရက် ဒဝ်လေဝ်သဳ ကွာန်ကအ်ဂမာ သ္ကုတ်ဂၠံၚ်ၜဳကလေၚ်-မုဟ်ဒဵုဂှ် ဗၠာဲသၟိၚ်ထိၚ်နေဝ် ဒုအကြာပ်ဒပ် ဇြဝ်မေန်ထောန် အခိၚ်ဂဇအ်သုၚ်မံၚ်အရက်ဂှ် ဂကောံပၠန်ဂတးတံ လုပ်ပန်ဂစိုတ်လဝ်ရ။
ဗၠာဲသၟိၚ်ထိၚ်နေဝ် ဒးဒုၚ်ပန်ဂစိုတ်တုဲ ညးတြုံကောန်ကွာန်နွံမံၚ် ဆေၚ်အရက် ၄ တၠဂှ် နူကဵုဗ္ဒိုပ်ဗၠာဲသၟိၚ်မုဟ်ဒဵု ကော်သၟာန်စၟဳစၟတ်လဝ် ပွိုၚ်ပိတ္ၚဲတုဲ ပ္ဍဲဖေဖဝ်ဝါရဳ ၄ အခိၚ်သဝ်တ္ၚဲ ကလေၚ်ဗလးဖျဴရ။
လၟုဟ်ပၠန်လေဝ် မၞိဟ်ဟွံသၚ်ကာမံၚ်တံဂှ် ဒပ်ကဝ်မယှေန်ပၞာန် ဗက်ရပ်စၟဳစၟတ်မံၚ်ဖိုအ်တုဲ ပ္ဍဲကဵုသ္ကုတ်ဂၠံၚ် ၜဳကလေၚ်-မုဟ်ဒဵုဂှ် ဖျေံဟလိုၚ်လဝ် ဇြဟတ်ပရေၚ်ဂီုကၠံတံနွံမံၚ်ရောၚ် ညးဒေသတံဟီုတုဲ ဂွံတီရ။
ဗၠာဲသၟိၚ်ထိၚ်နေဝ် ဒုအကြာပ်ဒပ် ဇြဝ်မေန်ထောန် ဒးဒုၚ်ပန်ဂစိုတ်ဂှ်တှ်ေ ဒှ်နူဗ္ဒိုပ်ဗၠာဲသၟိၚ်မုဟ်ဒဵုမဒှ်တုဲ ကရောံညး ဒုဂအုပ်ဗၠာဲသၟိၚ် ဖုၚ်မျေအ်နိုၚ်ဂှ် အခိၚ်ပန်မံၚ်ဂြိပ်တိတ်ဗၠးအာ မဒှ်ရ။
ဗၠာဲသၟိၚ်ထိၚ်နေဝ် ဒုအကြာပ်ဒပ် ဇြဝ်မေန်ထောန်ဂှ် နူကဵုဒပ်ဒမၠုက် အာဠာဝက ချဳဒရာၚ်မံၚ်ပွိုၚ်ဍုၚ်ၜဳကလေၚ် လုပ်ပန်ဂစိုတ်လဝ်ရဂှ် ဂွံလဝ်ပရိုၚ်ရ။
ပ္ဍဲပွိုၚ်ဍုၚ်ၜဳကလေၚ် ဒၞာဲကွာန်ဂကောံပၠန်ဂတးထိၚ်လဝ်တံဂှ် နူကဵုဒပ်ကဝ်မယှေန်ပၞာန် ပန်မံၚ်ကဵုလွဟ်ဇၞော်ကေုာံ ပၞာန်ကျာတံ ဗတိုက်မံၚ်ဇၟာပ်ပ်တ္ၚဲ မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media