မတ်မလီု ၊ ဖေဖဝ်ဝါရဳ ၉
ကဝ်မယှေန်ပၞာန်သီအဝဵု သွက်ဂွံကော်ကောံဓရီု အလန်တတိယ စၠတ်ဓဝ်တွဵုရးမန်ဂှ် ပလေဝ်ပလေတ်စမံၚ်ယျရောၚ် ဂွံတီနူကဵုတၚ်လလောၚ်တြး ကဝ်မယှေန်ပၞာန်တံရ။
သွက်ဂွံကော်ကောံဓရီုဂှ် နူကဵုဝန်ဇၞော်ပရေၚ်မၞိဟ်တွဵုရးမန် ဥူတေၚ်ဇြဝ်ထောန် သ္ကိုပ်သ္ကတုဲ ပ္ဍဲဖေဖဝ်ဝါရဳ ၆ ဂှ် ကၠောန်လဝ် ကောံဓရီုပ္ညဳပ္ညပ်ရ။
ဟိုတ်နူကၠောန်ဗ္ဒျ်ပေါဲရုဲမာဲတုဲအာတုဲ ခြာဟွံလံမ္ဂး သွက်ဂွံကော်ကောံဓရီု စၠတ်ဓဝ်တွဵုရးမန်ဂှ် ပရေၚ်ကမၠောန်ဆေၚ်စပ်ကဵုစၠတ်ဓဝ်တံ ညံၚ်ဂွံရေၚ်တၠုၚ်ဗွဲမပြဟ်မာန် ဘိုၚ်ရီုဗၚ်ကဵုအာညိ ဥူတေၚ်ဇြဝ်ထောန် ဟီုဏာပ္ဍဲကောံဓရီုရ။
တုဲပၠန် စၠတ်ဓဝ်တွဵုရးမန် အလန်တတိယဏံ ဗွဲမအံၚ်ဇၞးညံၚ်ဂွံကၠောန်ဗ္ဒျ်မာန်ဂှ် ညးတာလျိုၚ်ဌာနဆေၚ်စပ်တံ ဒၞာဲအခန်ကဏ္ဍ ဇကုတံစှ်ေတာလျိုၚ် ဘိုၚ်ပံၚ်တောဲရေၚ်တၠုၚ်ကဵုညိဂှ် ကဵုလဝ်စၞောန်ပ္ညုၚ်ရ။
ယဝ်ရစၠတ်ဓဝ်တွဵုရးမန် ကလေၚ်စမ္ဂး နကဵုသၞောတ် ညးဂွံမာဲဂၠိုၚ်ဇၞး FPTP ဂှ် ညးစၞး ၁၀ ဒၞာဲ၊ သၞောတ်သ္ပစၞး PR ဂှ် ညးစၞး ၁၀ ဒၞာဲ၊ ညးစၞးကောန်ဍုၚ်အရၚ် ၃ ဒၞာဲ ကေုာံ ညးစၞးဒပ်ပၞာန် ၈ ဒၞာဲ အပံၚ်ဖအိုတ် အမာတ် ၃၁ ဒၞာဲ နွံမံၚ်ရောၚ်။
အတိုၚ်သွဟ်ပေါဲရုဲမာဲဒပ်ပၞာန်မ္ဂး ပ္ဍဲစၠတ်ဓဝ်တွဵုရးမန်ဂှ် ဗော်ပျဳခိုင်ဖျိုဝ် ဂွံလဝ်ညးစၞး ၁၁ ဒၞာဲဂၠိုၚ်အိုတ်မဒှ်တုဲ ဗော်ညဳသၟဟ်မန် MUP ဂွံလဝ် ညးစၞး ၇ ဒၞာဲ ဒုတိယဂၠိုၚ်အိုတ် မဒှ်ရ။
တုဲပၠန် ဗော်တစည၊ ဗော်ဖောအ်ဗြဳတောတက် ကောန်ဂကူပအိုဝ်၊ ဗော်ညးဍုၚ်ကွာန်၊ ဗော်အာဂတညးဍုၚ်ကွာန်၊ ဗော်တောတက်ဂုဏ်ဖဵုပိုန်ဒြပ် ကောန်ဂကူတံလေဝ် ညးစၞးမွဲမွဲဒၞာဲ ဂွံလဝ်ကီုရောၚ်။
ကောံဓရီုပထမ စၠတ်ဓဝ်တွဵုရးမန် အလန်တတိယလၟေၚ်ဍာံဂှ် ပ္ဍဲဂိတုမာတ် သတ္တဟတတိယတေံ သွက်ဂွံကော်ဘိက်အာနွံမံၚ် ဂွံတီလဝ် နူကဵုညးကြပ်ကဵုကဝ်မယှေန်ပၞာန်တံရ။
ပရိုၚ်-သြၚ်လောန်တိုၚ်မ်
Photo – Social Media