ဝါယှေန်တန်၊ ဖေဖဝ်ဝါရဳ ၉
သမ္မတအမေရိကာန် ဒဝ်နေဝ်ထရ ပ္ဍဲဖေဖဝ်ဝါရဳ ၆ ပ္ဍဲကဵုထပက်လဝ်စၟတ်တဲ စၞောန်ပ္ညုၚ်တၟေၚ်မွဲသာ်ဂှ် လ္တူ ဍုၚ်ကူသာန်မံၚ်ဗၞိက်ကဵု ဍုၚ်အဳရာန်တံဂှ် ထပ်ထပဵုကံက်အခေါၚ်မာန်ရောၚ် ဟီုလဝ်ရ။
ကူသာန်မံၚ်ဗၞိက်ကဵု ဍုၚ်အဳရာန် တိုက်ရိုက်ဒှ်ဒှ် တိုက်ရိုက်ဟွံသေၚ်ဒှ်ဒှ် ထပ်ထပဵုကံက်အခေါၚ်မာန်ရောၚ် ပ္ဍဲတင်စၞောန်ပ္ညုၚ် သ္ဂးလဝ်ရ။
သၞောတ်ထ္ၜတ်အခေါန် ၜိုတ်လဵုကံက်အာဂှ် ထရ ဟွံထမံက်လဝ်ချိုတ်တ်ပၠိုတ်တ်ကီုလေဝ် ဥပမာ ၂၅% ကံက်အာမာန်ရောၚ် သ္ဂးရ။
ရာန်ကပေါတ်နူအဳရာန်ကီုဒှ် ဟွံသေၚ်မ္ဂး ရာန်ကေတ်ပွမရေၚ်တၠုၚ်တံ၊ ပၠုပ်နၚ်ကပေါတ်၊ ဍုၚ်ရာန်မံၚ်ကပေါတ်နူကဵုအဳရာန်တံ ယဝ်ရပလံၚ်နၚ်ကပေါတ်ဗၞိက်ကု အမေရိကာန်မ္ဂး ဒးထပ်ကဵုအခေါန်ပဵု ဒှ်မာန်ရောၚ် ထရ ဟီုရ။
သွက်ဍုၚ်အဳရာန် လွဟ်နျူကလဳယာ နွံဟွံဂွံရောၚ် ထရ ဟီုလဝ်လ္တူၜၚ်ကျာ Air Force One ပ္ဍဲဖေဖဝ်ဝါရဳ ၆ ရ။
အကြာၜါလပါ် သတ္တဟဗွဲမလံလ မွဲလပါ်ကဵုမွဲလပါ် ဘပလမံၚ်တုဲ ပ္ဍဲဍုၚ်အိုမာန် ညးတာလျိုၚ်အဆံၚ်လှုၚ်အမေရိကာန်တံ ဆဵုဂဗအလန်ပထမတုဲ စၞောန်ပၟိၚ်ထရ မံက်တိတ်ကၠုၚ် မဒှ်ရ။
ဍုၚ်ကၠောန်မံၚ်ပိုန်ဒြပ်ကဵု အဳရာန်တံဂှ် သွက်ဂွံကံက်အာအခေါန် ၂၅ ရောၚ် ပ္ဍဲသၞာံဏံပြဟ်ဟ်တေံ ထရ ဘပလလဝ်ကီုရ။
ဍုၚ်အဳရာန် ဂစာန်လွဳပတိတ်မံၚ် လွဟ်နျူကလဳယာတုဲ ထံက်ပၚ်မံၚ်ဝါဒပကီုပရာတ်တံဂှ် ဒးဒုၚ်လျိုၚ်ရောၚ် ပ္ဍဲလိက်စၞောန်ပၟိၚ်ထရ ချူလဝ်ရ။
တုဲပၠန် အဳရာန် ကၠောန်ဖန်မံၚ် မကမ်သၠောဝ်ထိၚ်သၠသၞေဝ်တုဲ ပ္ဍဲအကြာဒေသ ညံၚ်ဟွံညိၚ်ဝပ် ဖန်ဇန်မံၚ်ဂှ် ပရေၚ်ဂီုကၠီုအမေရိကာန်၊ ဂုဏ်ဖဵုပိုန်ဒြပ်မဟာမိတ်တံ ဒှ်အန္တရာဲမာန်ရောၚ် ပ္ဍဲလိက်စၞောန်ပၟိၚ် ချူလဝ်ရ။
လ္တူလိက်စၞောန်ပၟိၚ်ဏံ နူကဵုအဳရာန် မုလေဝ်ဟွံကလေၚ်ဟီုလဝ်ဏီ။
ဆဵုဂဗလဝ်ကဵုအမေရိကာန် ပ္ဍဲအိုမာန်ဂှ် အစခိုဟ်မံၚ်တုဲ ဆက်သဳကၠဳအာရောၚ် ဝန်ဇၞော်ဍုၚ်သ္အာၚ်အဳရာန် ဟီုလဝ်ရ။
Ref:BBC