မတ်မလီု ၊ ဖေဖဝ်ဝါရဳ ၁၀
ပ္ဍဲတွဵုရးမန် ကာလပံက်ဂကောံအလဵုအသဳတၟိမ္ဂး သွက်ဂွံရုဲစှ်ပတိုန်အာ သ္ကိုပ်ဝန်ဇၞော်မန်မွဲတၠဂှ် သ္ကိုပ်ဝန်ဇၞော် ဥူအံၚ်ကျဳတိၚ်ကဵု ဝန်ဇၞော် ဥူတေၚ်ဇြဝ်ထောန်တံ ၜါတၠ ယၟုဇၞော်မံၚ်ရောၚ် ဂွံတီနူညးကြပ်ကဵု ဗော်ပျဳခိုၚ်ဖျိုဝ်တံရ။
ပ္ဍဲပေါဲရုဲမာဲတုဲကၠုၚ်ဏံ သ္ကိုပ်ဝန်ဇၞော်ဥူအံၚ်ကျဳတိၚ်ကဵု ဝန်ဇၞော်ပရေၚ်မၞိဟ် ဥူတေၚ်ဇြဝ်ထောန်တံၜါတၠ နကဵုဗော်ဒပ်ပၞာန် ညးစၞးဗော်ပျဳခိုၚ်ဖျိုဝ် လုပ်ပြိုၚ်အမာတ်တုဲ ဂွံလဝ်ဇၞးမဒှ်ရ။
ပြဟ်ဟ်ဏံ သ္ကိုပ်ဝန်ဇၞော်ဥူအံၚ်ကျဳတိၚ်ဂှ် ဒှ်အမာတ်စၠတ်ထဝ်တွဵုရး ပွိုၚ်ဍုၚ်ၜါသွာၚ်၊ ဝန်ဇၞော်ပရေၚ်မၞိဟ် ဥူတေၚ်ဇြဝ်ထောန်ဂှ် ဒှ်အမာတ်စၠတ်ထဝ် တွဵုရး ပွိုၚ်ဍုၚ်မတ်မလီု ဇၞးလဝ်မာဲရ။
စလာဘ်ဗဇဴကီု ကဵုအခေါၚ်ပံက်ဝိုၚ်ဝေၚ်ကီု သွက်ဖဵုပရေၚ်ပူဂဵု ဖျေံကဵုကမၠောန် ကိုန်အစဳတံ၊ ကဵုအခေါၚ် ကၠောန်ပရေၚ်ကမၠောန်တံ တုဲ ဥူအံၚ်ကျဳတိၚ် ယၟုဇၞော်တုဲ ဒးဒုၚ်ပါ်ပါဲမံၚ် အကြာညးဒေသတံ မဒှ်ရ။
ညးကေၚ်ယိုက်ဂၠေၚ်တာလျိုၚ် သ္ကိုပ်ဗၠာဲသၟိၚ်ဇၞော်တွဵုရးမန် ဥူတေၚ်ဇြဝ်ထောန် ၜိုန်ရ ဒှ်မံၚ် ဝန်ဇၞော်ပရေၚ်မၞိဟ်ကီုလေဝ် ပ္ဍဲကဏ္ဍပရေၚ်ပညာ၊ ပရေၚ်ထတ်ယုက်ကဵု ပရေၚ်ကေၚ်ကာမၞိဟ် သွက်ညးဒေသတံ ပတုဲဖဵု ဗက်ကၠောန်ကဵုအောန်မံၚ်တုဲ ဒှ်မံၚ်မၞိဟ်တီညာတ်အောန် မွဲတၠရောၚ်။
အတိုၚ်ရိုဟ်ကၞက် ဌာန်ပရိုၚ်သြၚ်လောန်တိုၚ်မ်မ္ဂး ပ္ဍဲဂကောံအလဵုအသဳတွဵုရးမန်တၟိဏံ သွက်တာလျိုၚ် ဒၞာဲသ္ကိုပ်ဝန်ဇၞော်ဂှ် နူဗော်ပျဳခိုၚ်ဖျိုဝ်ဟေၚ် ကေတ်အာတုဲ တန်တဴကဵု ပံက်ခၞံဒက်ပတန်အာ ဌာနဝန်ဇၞော်တံဂှ် သွက်ဂွံကဵုအာ ဗော်ညဳသၟဟ်မန် ဒၞာဲဝန်ဇၞော်မွဲတၠ ဟွံသေၚ် ၜါတၠနွံမာန်ရောၚ် ဂွံတီရ။
ပ္ဍဲကဵုဂိတုမာတ် အကြာသတ္တဟတတိယဂှ် သွက်ဂွံကော်အာ ကောံဓရီုပထမ စၠတ်ဓဝ်တွဵုရးမန် အလန်တတိယနွံမံၚ်တုဲ နူလပါ် ကဝ်မယှေန်ပၞာန် ဒစးဒုၚ်ပလေဝ်ပလေတ်စမံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media