ဘာပန်၊ ဖေဖဝ်ဝါရဳ ၁၀
တွဵုရးကရေၚ် ဒၞာဲဒပ်ပၠန်ဂတးတံ ကၟာတ်ဆိုအ်ဗတိုက်မံၚ် ဗျူဟာဘာပန်ဂှ် ဒပ်ပၞာန်ဗမာညံၚ်ဟွံကျအာ ဒုၚ်ဒဝ်မံၚ်ကဵုပၞာန်ကျာ ဇၞော်ကဵုဇြဟတ်ရောၚ် တမ်ရိုဟ်ကၞက်ပရိုၚ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူကဵုသၞာံ ၂၀၂၄ တေံရ ဒပ်ပၞာန်ဗၠးၜးကောန်ဂကူကရေၚ် KNLA မဟာဒပ် ၅ သ္ကိုပ်သ္က ပံၚ်တောဲကဵုဂကောံဇြဟတ်ပၠန်ဂတးတံတုဲ ကၟာတ်ဆိုအ်ဗတိုက်ကၠုၚ်လဝ် ဗျူဟာဘာပန် မဒှ်ရ။
ပေါဲဗတိုက်သီဗ္ဒိုပ် ဗျူဟာဘာပန်ဂှ် စနူကဵုဖေဖဝ်ဝါရဳ ၅ တေံရ အသိၚ်ဇြဟတ်ကလေၚ်ဇၞော်ကၠုၚ်တုဲ ညံၚ်ဗျူဟာ ဟွံဒးဒုၚ်သီဂှ် ဒပ်ကဝ်မယှေန်ပၞာန် ဒုၚ်ဒဝ်ဗတိုက်မံၚ်ကဵု ဇြဟတ်ပၞာန်ကျာ ဇၞော်ကဵုဇြဟတ်ရောၚ်။
ဟိုတ်နူဒပ်ကဝ်မယှေန်ပၞာန် ဒုၚ်ဒဝ်ဗတိုက်မံၚ်ကဵုပၞာန်ကျာဂှ် ရဲလပါ်ပၠန်ဂတးတံ ဒးလဝ်ဝပ်ဘဲဒဏ်နွံကီုလေဝ် ဒဵုကဵုကဆံၚ်ဒးဒှ်ဒွိၚ် ညးမွဲလေဝ် ဟၟဲပုဟ် ညးအခေါၚ်ဟီုဂးနွံ မဟာဒပ် ၅ သ္ကိုပ်ပၞာန်ဇၞော် သဝ်ဂလာဒို ဟီုကဵုဌာန်ပရိုၚ်သြၚ်လောန်တိုၚ်မ်ရ။
ရဲလပါ်ကဝ်မယှေန်ပၞာန်တံ ပ္ဍဲပေါဲဗတိုက်ဒးဂိလောန်တုဲ ကောန်ပၞာန်သီုဖအိုတ်ကလေၚ်ကောံမံၚ်ဒၟံၚ် ပ္ဍဲဗ္ဒိုပ်ဗျူဟာ သီုဖအိုတ်ရောၚ် သ္ဂးရ။
လပါ်အကံက် ရဲတြးမံၚ်ဝါဒ ကဝ်မယှေန်ပၞာန်ဂှ်တှ်ေ ပ္ဍဲပေါဲဗတိုက် ဗျူဟာဘာပန်ဏံ ရဲလပါ်ဒပ်ပံၚ်တောဲပၠန်ဂတးတံ ဒးလဝ်ဂိဂၠိုၚ်တုဲ သီဂွံလဝ်လွဟ်လက်နက် ဗွဲမဂၠိုၚ်ကီုရောၚ် တြးလဝ်ဝါဒဂှ် ဂွံဆဵုရ။
ပ္ဍဲပေါဲဗတိုက်သီဗ္ဒိုပ် ဗျူဟာဘာပန်ဏံ ဒပ်ပံၚ်တောဲ KNLA တံ ဗတိုက်သီဂွံလဝ် ဒၞာဲဗွဲမဂၠိုၚ်ရောၚ် တမ်ရိုဟ်ကၞက်ပရိုၚ်ပၠန်ဂတးတံ သ္ဂးရ။
အပ္ဍဲဗ္ဒိုပ်ဗျူဟာဘာပန်ဏံဂှ် ဒပ်ကဝ်မယှေန်ပၞာန်သၟးဟွံက သၞာဲဒါ ယိုက်ဝန်ဌာနအလဵုအသဳတံကဵု ရဲသ္ၚိဌာန်ကၟိန်အိန်ထံၚ် တမ်ဒပ်ဖျေံလဝ်သ္ဇိုၚ် ဍုၚ်ဘာပန်တံ နွံမံၚ်ရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – PDF